દુનિયાભરમાં ઘાતક કોરોના મહામારીએ કાળો કેર વર્તાવ્યો છે. દિવસે દિવસે નવા પોઝિટિવ કેસ અને મોતનો આંકડો સતત વધતો જ જાય છે. સમગ્ર વિશ્વમાં અત્યાર સુધીમાં ૬૦,૨૯,૯૫૦ લોકોને જીવલેણ કોરોનાનો ચેપ લાગ્યો છે. સારવાર લીધા બાદ ૨૬,૫૯,૨૩૯ લોકો સંપૂર્ણ સાજા પણ થયા છે. કુલ મૃત્યુઆંક વધીને ૩,૬૬,૮૦૨ પર પહોંચી ગયો છે.
દુનિયાભરમાં ૩,૬૬,૮૦૨ લોકોનાં મોતઃ અમેરિકામાં સૌથી વધુ ૧,૦૪,૫૪૨ લોકોએ જીવ ગુમાવ્યો
બીજી તરફ, બ્રાઝિલમાં અત્યાર સુધીમાં કોરોનાના કારણે કુલ ૨૭,૯૪૪ લોકોનાં મોત નીપજ્યાં છે. આ આંકડો સ્પેન (૨૭,૧૨૧) કરતા વધારે છે. બ્રાઝિલમાં એક જ દિવસમાં વધુ ૧,૧૨૪ લોકોનાં મોત થયાં છે. બ્રાઝિલ હવે અમેરિકા બાદ વિશ્વનો બીજો સૌથી ચેપગ્રસ્ત દેશ બની ગયો છે. અહીં કોરોના પોઝિટિવ દર્દીઓની કુલ સંખ્યા ૪.૬૮ લાખથી પણ વધુ છે.
ફ્રાન્સમાં ૨૪ કલાકમાં ૫૨ લોકોએ જીવ ગુમાવ્યો
ફ્રાન્સમાં છેલ્લા ૨૪ કલાકમાં ૫૨ લોકોનાં મોત નીપજ્યાં છે. મૃત્યુઆંક વધીને ૨૮,૭૧૪ પર પહોંચી ગયો છે. આરોગ્ય મંત્રાલયે માહિતી આપી કે, અત્યાર સુધીમાં ૧,૦૧,૩૯૦ લોકોને અહીંની હોસ્પિટલોમાં દાખલ કરવામાં આવ્યા હતા, જેમાંથી ૧૭,૯૦૪ લોકોની હાલત ગંભીર છે. ૬૭,૮૦૩ દર્દીઓને સાજા થયા બાદ હોસ્પિટલમાંથી રજા આપવામાં આવી છે.
દક્ષિણ આફ્રિકામાં રેકોર્ડ ૧,૮૦૦થી વધુ નવા કેસ સામે આવ્યા
દક્ષિણ આફ્રિકામાં માર્ચ મહિનામાં કોરોનાનો પ્રથમ કેસ નોંધાયો હતો. ત્યારબાદ પ્રથમ વખત ગઈકાલે શુક્રવારે સૌથી વધુ ૧,૮૩૭ નવા પોઝિટિવ કેસ સામે આવ્યા છે. દેશમાં ચેપગ્રસ્ત લોકોની સંખ્યા હવે વધીને ૨૯,૨૪૦ થઈ ગઈ છે. એક જ દિવસમાં વધુ ૩૪ લોકોનાં મોત થયાં છે. આ સાથે જ દેશમાં મૃત્યુઆંક ૬૧૧ થઈ ગયો છે. અહીં અત્યાર સુધીમાં ૧૫,૦૯૩ લોકોનો ઈલાજ કરવામાં આવ્યો છે. ૨૪ કલાકમાં ૨૪,૪૫૨ લોકોના ટેસ્ટ કરવામાં આવ્યા છે. કુલ મળીને ૬.૮૦ લાખથી વધુ ટેસ્ટ કરવામાં આવ્યા છે.
અમેરિકામાં એક જ દિવસમાં ૧,૨૫૫ લોકોનાં મોત
અમેરિકામાં છેલ્લા ૨૪ કલાકમાં જ વધુ ૧,૨૫૫ લોકોનાં મોત નીપજ્યાં છે. હવે અહીં મૃત્યુઆંક વધીને ૧,૦૪,૫૪૨ થઈ ગયો છે.અમેરિકાનું સૌથી વધુ ચેપગ્રસ્ત રાજ્ય ન્યૂયોર્ક આગામી ૮ જૂનથી ખોલવામાં આવશે. ન્યૂયોર્ક સ્ટેટના ગવર્નર એન્ડ્ર્યૂ ક્યૂમોએ કહ્યું કે, બિનજરૂરી બાંધકામો અને મેન્યુફેક્ચરિંગ ખોલ્યા બાદ લગભગ ચાર લાખ લોકો કામ પર જશે. અહીં હંમેશા બસ અને ટ્રેનોની સફાઇ કરવામાં આવે છે. પબ્લિક ટ્રાન્સપોર્ટ સિસ્ટમ (જાહેર પરિવહન પ્રણાલી) લોકો માટે એકદમ સલામત રહેશે.
મેક્સિકોમાં મૃત્યુઆંક વધીને ૯,૪૧૫ થયો
મેક્સિકોમાં છેલ્લા ૨૪ કલાકમાં ૩૭૧ લોકોનાં મોત નીપજ્યાં છે. હવે કુલ મૃત્યુઆંક વધીને ૯,૪૧૫ થઈ ગયો છે. મેક્સિકોના નાયબ આરોગ્ય પ્રધાન હ્યુગો લોપેઝ-ગેટેલે જણાવ્યું હતું કે, આ સમયગાળા દરમિયાન દર્દીઓની સંખ્યામાં ૩,૨૨૭નો વધારો થતાં ચેપગ્રસ્ત લોકોની કુલ સંખ્યા વધીને ૮૪,૬૨૭ થઈ ગઈ છે.