અપેક્ષા / મંદી અને મોંઘવારીનો પડછાયો પડતા બ્રાસ ઉધોગને બુસ્ટર ડોઝની જરૂર, બજેટમાં જામનગરના ઉદ્યાગકારોની માંગ કેન્દ્રમાં લેવાશે?

• 1 ફેબ્રુઆરીએ રજૂ થશે વર્ષ 2023-24 નું બજેટ
• નાણાંમંત્રી સીતારમન સંસદમાં બજેટ રજૂ કરશે
• બ્રાસ ઉદ્યોગકારોને બજેટમાં સહાયની જાહેરાત કરાય તેવી આશા

 ગણતરીના દિવસોમાં બજેટ 2023 રજૂ થવા જઈ રહ્યું છે. સંસદમાં 1 ફેબ્રુઆરી 2023ના રોજ કેન્દ્રીય નાણાંમંત્રી નિર્મલા સીતારમન નાણાકીય વર્ષ 2023-24નું યુનિયન બજેટ રજૂ કરશે. ત્યારે આ બજેટમાં જામનગરના બ્રાસ ઉદ્યોગ માટે નાણાં ફાળવી સહાયની જાહેરાત કરવામાં આવે તેવી જામનગરના ઉદ્યોગકારો માંગ અને આશા અપેક્ષા રાખી રહ્યા છે.

જીએસટી રિબેટ તાત્કાલિક ચુકવવામાં આવે તેવી માંગ
જામનગરનો બ્રાસ ઉદ્યોગ વિશ્વભરમાં જાણીતો છે અહીંની અનેક પ્રોડક્શનની વિદેશમાં પણ મોટી માંગ રહે છે અને વિદેશમા આ વસ્તુની મોટે પાયે નિકાસ પણ કરવામાં આવે છે પરંતુ હાલ આ ઉદ્યોગ અનેક સમસ્યાઓથી ઘેરાયો છે. મંદી અને મોંઘવારીનો પડછાયો પડતા બ્રાસ ઉધોગ સહાયનો બુસ્ટર ડોઝ જંખી રહ્યો છે. જામનગરમા બ્રાસ ઉદ્યોગ સાથે સંકળાયેલા જય વસોયાએ જણાવ્યું કે તેઓ, જાપાન, જર્મની, ચીન સાહિતના દેશોમાં બ્રાસ પ્રોડકટનું એક્સપોર્ટ કરી રહ્યા છે. જેમાં 18 ટકા જીએસટી ભરવામાં આવે છે. પરંતુ જીએસટીના રિબેટ લેવામાં સમય લાગતો હોવાથી ઉદ્યોગકારોના નાણાં અટવાયેલા રહે છે. જેથી તેઓ મુશ્કેલી ભોગવી રહ્યા છે ત્યારે આ લોકોની પરેશાની પારખી જીએસટી રિટર્ન તાત્કાલિક ચુકવવામાં આવે તેવી વ્યવસ્થા કરવા માંગ ઉઠી છે.

મશીનરી ખરીદવા માટે ઉદ્યોગકારોને 15 ટકા જેટલી સહાય પણ કરવામાં આવતી હતી
વધુમાં સરકાર દ્વારા મશીનરી ખરીદવા માટે ઉદ્યોગકારોને 15 ટકા જેટલી સહાય પણ કરવામાં આવતી હતી. જે હાલ બંધ કરી દેવામાં આવી છે જેને ફરી શરૂ કરવામાં આવે તે જરૂરી બન્યું છે. મોદી સરકારના બીજા કાર્યકાળનું છેલ્લું સંપૂર્ણ બજેટ હોવાથી તે મહત્વનું સાબિત થઈ રહ્યું છે. વધુમાં એક્સપોર્ટ કરતા ઉદ્યોગકારોને દોઢ ટકા ડ્રો બેક અપાઈ રહ્યું છે જેમાં વધારો કરી 5 ટકા કરવામાં આવે તો બ્રાસ પ્રોડક્ટની કોસ્ટ ઘટી શકે છે જેથી વિદેશ બજારમાં આ પ્રોડક્ટ ટકી શકે અને વિદેશી હૂંડિયામણ કમાઈ શકે. તેવી વેપારીઓ માંગ કરી છે.

TCS નું રિફંડ પાછું આવતા એક થી દોઢ વર્ષ જેટલો સમય લાગે છે
અન્ય મટીરીયલ કરતા બ્રાસનું મટીરીયલ સૌથી ઊંચા ભાવે મળે છે. બ્રાસના રો મટીરીયલનું રજીસ્ટર ટુ રજીસ્ટર ટ્રેડિંગ કરવામાં આવે છે ત્યારે સરકાર દ્વારા એક ટકા TCS લગાવવામાં આવે છે. જેથી ઉદ્યોગકારોને TCS પાછળ લાખો રૂપિયાનું રોકાણ કરવું પડે છે. અને TCS નું રિફંડ પાછું આવતા એક થી દોઢ વર્ષ જેટલો સમય લાગે છે. ઉદ્યોગ કરો તેવી માંગ કરી રહ્યા છે કે બ્રાસ ઉદ્યોગમાં ટીસીએસ નાબૂદ કરવામાં આવે.

કચેરીઓએ પરમિશન લેવા ધક્કા ખાવા ન પડે તેવી માંગ
બીજી તરફ બ્રાસ ઉદ્યોગકારો તેવી પણ માંગ કરી રહ્યા છે કે તમામ ડિપાર્ટમેન્ટોને એક એક ડિપાર્ટમેન્ટમાં સાંકળી લેવામાં આવે તો ઉદ્યોગકારોને જુદી જુદી કચેરીઓએ કોઈપણ પ્રકારની પરમિશન લેવા માટે ધક્કા ખાવા ન પડે. તેમજ લેબર એક્ટ માં પણ છૂટ છાટ આપવામાં આવે. હાલ ઉદ્યોગકારો માત્ર 10 વ્યક્તિને રોજગારી આપે છે જ્યારે 10 વધુ વ્યક્તિઓને રોજગારી આપે તો પહેલા મંજૂરી અને ડોક્યુમેન્ટ પ્રોસેસ કરવી પડે છે. જેના કારણે ઉદ્યોગ કરો 10 વધુ લોકોને રોજગારી આપતા નથી. ઉદ્યોગ કરો આવી માંગ કરી રહ્યા છે કે બ્રાસ ઉદ્યોગમાં 40 લોકો સુધી કાયદાકીય છૂટછાટ આપવામાં આવે.