અમદાવાદ / ગુજરાત યુનિવર્સિટીની બોયસ હોસ્ટેલ બની 'દાદા'ઓનો અડ્ડો, NSUI અને ABVPની બબાલમાં વિદ્યાર્થીઑમાં ફફડાટ, પોલીસ ચૂપ

• ગુજરાત યુનિવર્સિટીની બોયસ હોસ્ટેલમાં ફરી હુમલો
• પાલીસની હાજરીમાં હુમલો કરાયાનો આરોપ
• ABVPના કાર્યકરોએ હુમલો કર્યાનો આક્ષેપ

અમદાવાદની LD આર્ટ્સ કોલેજમાં ગઈકાલે તોડફોડની ઘટના સામે આવ્યા બાદ આજે ફરી ગુજરાત યુનિવર્સિટી બોયસ હોસ્ટેલમાં હુમલોનો બનાવ સામે આવતા ચકચાર જાગી છે. યુનિવર્સિટી હોસ્ટેલના વિદ્યાર્થીઓ પર હુમલો કરવામાં આવતા ભાગદોડ મચી જવા પામી હતી. બીજી તરફ આજે પોલીસની હાજરીમાં હુમલો કરાયો હોવાનો વિદ્યાર્થીઓએ આક્ષેપ કર્યો હતો. એટલું જ નહિ હુમલાખોરોએ પોલીસ કારની ગ્રીલ પણ તોડી નાખી હતી. આમ NSUI અને ABVP ની લડાઈ હોય જેને લઇને વિદ્યાર્થીઑમાં ફફડાટ ફેલાયો  છે. વધુમાં ગઈકાલે પણ હોસ્ટેલમાં પાર્ક કરેલ વાહનોમાં અવારાતત્વોએ તોડફોડ કરી હતી.  

10 શખ્સો સામે ગુનો નોંધાયો
સતત 2 દિવસથી થઇ રહેલા હુમલાને લઇને યુનિવર્સિટિ પોલીસ દોડી ગઇ હતી અને ફરિયાદ નોંધી હતી. આ દરમિયાન  હુમલો કરનાર ABVPના કાર્યકરો હોવાનો પણ ફરિયાદમાં ઉલ્લેખ કરવામાં આવ્યો છે. જેને લઇને પોલીસે વિદ્યાર્થીની ફરિયાદ આધારે 10 શખ્સો સામે ગુનો નોંધી કાર્યવાહી હાથ ધરી છે. 
 
ગઈકાલે LD આર્ટ્સ કોલેજમાં તોડફોડની ઘટના સામે આવી હતી
ગઈકાલે LD આર્ટ્સ કોલેજમાં તોડફોડની ઘટના સામે આવી હતી.વિદ્યાર્થીઓએ દાદાગીરી કરી પ્રિન્સિપાલની ઓફિસમાં તોડફોડ અને ખુરશીઑના ઘા કરતા પ્રિન્સિપાલે ગુજરાત યુનિવર્સિટી પોલીસ મથકમાં ફરિયાદ નોંધાવી હતી.  LD આર્ટ્સ કોલેજમાં તોફાન કરતા વિદ્યાર્થીઓને પ્રિન્સિપાલ મહિપતસિંહ ચાવડાએ પોતાની ચેમ્બરમાં બોલાવ્યા હતા. જ્યાં મામલો બીચકાતા ત્રીજા વર્ષમાં આર્ટ્સમાં અભ્યાસ કરતાં અર્જુન રબારી નામના વિદ્યાર્થીએ કેબિનમાંથી પોર્ટનો છુટ્ટો ઘા કર્યો હતો. વધુમાં કેબિન બહાર નીકળી ખુરશીનો ઘા કરતા ખુરશી કાચ તોડી ઓફિસમાં  પડી હતી. જેમાં પ્રિન્સીપાલ માંડ બચ્યા હતા. ત્યારબાદ ત્રણેય વિદ્યાર્થીઑ નાશી છૂટયા હતા.  આ ઘટનાને લઇને કોલેજ  સંકૂલમાં સોંપો પડી ગયો હતો.