અમદાવાદમાં આવેલી AMOS કપંનીમાંથી જ મુખ્ય આરોપી જયેશે 600 લિટર કેમિકલ ચોરી બરવાળાના બુટલેગરોને આપ્યું હતું
AMOS કપંની સામે કાર્યવાહી શરૂ
નશાબંધી અને આબકારી વિભાગની કાર્યવાહી
કેમિકલ સીઝ કરવામાં આવ્યું
બોટાદના બરવળાના કેમિકલ લઠ્ઠાકાંડ રાજ્ય સહિત દેશમાં ચર્ચાનો વિષય બન્યો છે ત્યારે સરકાર દ્વારા પણ તપાસનો ધમધમાટ તેજ કરવામાં આવ્યો છે એવામાં કેમિકલ લઠ્ઠાકાંડમાં કેમિકલ જે કંપનીમાંથી સપ્લાય થતુ હતુ તે AMOS કેમિકલ કંપનીને લઇ કેટલીક સ્ફોટક વિગતો VTVને હાથ લાગી છે. AMOS કંપનીએ અખાદ્ય પદાર્થની બનાવટ માટે જે લાયસન્સ મહાનગરપાલિકામાંથી લેવાનું હોય છે તે અખાદ્ય કેમિકલના બનાવટનું લાયસન્સ જ ન મેળવ્યાની વાત AMCની પ્રાથમિક તપાસમાં સામે આવી રહીં છે તો કંપનીના ડિરેક્ટર સમીર પટેલને લઇનો રાજકીય ધરોબો પણ સામે આવ્યો છે. ત્યારે હવે સમગ્ર લઠ્ઠાકાંડનું મૂળ કહેવાતી AMOS કંપની પર SITની ટીમ તપાસ અર્થે પહોંચી હતી. સાથે આરોપી જયેશને પણ રાખવામાં આવ્યો હતો.
8 હજાર લીટર કેમિકલને સીઝ, AMOS કંપનીને બંધ કરવાનો રિપોર્ટ સોંપાયો
તો બીજી તરફ AMOS કંપનીમાં નશાબંધી અને આબકારી વિભાગે પણ કાર્યવાહી શરૂ કરી છે.કંપનીમાં રહેલ મિથેનોલ કેમિકલના નમૂના FSLમાં મોકલવામાં આવ્યા છે. તેમજ AMOS કપંનીના કેમિકલના ડેટાનું એનાલિસિસ કરવામાં આવ્યું છે. કંપનીમાં રહેલ 8 હજાર લીટર કેમિકલને સીઝ કરી AMOS કંપનીને બંધ કરવાનો રિપોર્ટ સરકારને સોંપવામાં આવ્યો છે. આ તપાસમાં એ પણ ખૂલ્યું છે કે AMOS કંપની જોબ વર્ક પર કામ કરતી હતી અને ફીનાર કંપનીને મિથેનોલ કેમિકલનો જથ્થો આપતી હતી. અઢી લીટરની કાચની બોટલિંગ કરી પ્રોસેસિંગ કરતા હતા. સમગ્ર મામલે કંપનીના માલિક સમીર પટેલની પૂછપરછ કરવામાં આવશે.
સમીર પટેલે રાજકીય વગનો ઉપયોગ કરી લાયસન્સ રિન્યુ જ નથી કર્યું
કારણ કે, તમને જણાવી દઇએ કે, AMOS કંપનીના માલિક સમીર પટેલ રાજકીય વગ ધરાવે છે. જેઓના રાજ્યના એક પૂર્વ મંત્રી અને ધારાસભ્ય સાથે પણ સારા એવા સબંધ છે. સમીર પટેલ કે જે બેટ દ્રારકા મંદીર ટ્રસ્ટમાં ઉપપ્રમુખ છે. સમીર પટેલે રાજકીય વગનો ઉપયોગ કરીને લાયસન્સ રિન્યુ નથી કર્યું. નોંધનીય છે કે, અમદાવાદના પિપળજમાં ગેરકાયદેસર કેમિકલનો ધંધો ચાલે છે. આ કેમિકલ કંપનીઓ સરકારી નિયમોને ઘોળીને પી રહી છે.
આરોપી જયેશ AMOS કંપનીમાંથી કેમિકલ ચોરી બુટલેગરોને આપતો
ઉલ્લેખનીય છે કે, અમદાવાદના પીપળજના દેવરાજ ઇન્ડસ્ટ્રીયલ પાર્કમાં આવેલી AMOS કંપનીમાં મેનેજરની નોકરી કરતાં જયેશે ગોડાઉનમાંથી કેમિકલની ચોરી કરી બુટલેગરોને આપી હતી. જે બાદમાં તેમાં પાણીનું મિશ્રણ કરી બુટલેગરો દેશી દારૂ તરીકે વેચાણ કરતાં હતા. જેથી હવે આ લઠ્ઠાકાંડ નહીં પણ કેમિકલ કાંડ હોવાનો ખુલાસો થયો છે.
ક્રાઈમ બ્રાંચે મુખ્ય આરોપી જયેશની ધરપકડ કરી લીધી છે
લઠ્ઠાકાંડ મામલે પોલીસે મુખ્ય આરોપી જયેશની ધરપકડ કરી છે. જેમાં મુખ્ય આરોપી જયેશ અમદાવાદના પીપળજના દેવરાજ ઇન્ડસ્ટ્રીયલ પાર્કમાં આવેલી AMOS કંપનીમાં મેનેજરની નોકરી કરતો હોવાનું ખૂલ્યું છે. ત્યારે પોલીસે અત્યાર સુધીમાં આરોપી જયેશ સહિતના આરોપીઓની ધરપકડ કરી લીધી છે. ત્યારે પોલીસ હવે આ મામલે આગળની કાર્યવાહી હાથ ધરી જે-તે આરોપીઓ વિરૂદ્ધ કાયદેસરના પગલાં લેશે.