ધરપકડ / બોટાદમાં 75 વર્ષની વિધવા વૃદ્ધા સાથે લૂંટ બાદ દુષ્કર્મ, આરોપી 32 ગુનામાં ગુનેગાર

• બોટાદમાં 75 વર્ષની વૃદ્વા સાથે લૂંટ અને દુષ્કર્મનો મામલો
• પોલીસે આરોપીને ગણતરીના કલાકોમાં ઝડપી પાડ્યો
• હસમુખ વાઘેલા નામના આરોપીની પોલીસે ધરપકડ કરી

બોટાદમાં 75 વર્ષના વૃદ્ધા સાથે દુષ્કર્મ ગુજાર્યા બાદ આરોપીએ વૃદ્ધાને લૂંટી લીધી હોવાની ઘટના પ્રકાસમાં આવી હતી. વિધવા સહાયના ફોર્મમાં સહીના બહાને વૃદ્વાને લઇ જઇ આરોપીએ કુકર્મ આચર્યું હતું. આ પ્રકરણમા સંડોવાયેલ આરોપી હસમુખ વાઘેલા નામના શખ્સને બોટાદ પોલીસે ગણતરીના કલાકોમાં ઝડપી લઈ કાયદેશરની કાર્યવાહી હાથ ધરી છે. 

વિધવા સહાયના ફોર્મમાં સહીના બહાને વૃદ્વાને લઇ જઇ દુષ્કર્મ આચર્યું હતું
આ અંગે જાણવા મળતી વિગત અનુસાર બોટાદમાં વિધવા પેન્શન મેળવવામાં મદદ કરવાના બહાને આરોપીએ 75 વર્ષની વૃદ્ધાને હવસનો શિકાર બનાવી હતી. આરોપી હસમુખ વધેલા અને ભોગ બનનાર વૃદ્ધા બંનેનો ભેટો થયા બાદ હસમુખે વૃદ્ધ મહિલાનો ફોન નંબર લઈ અને તેને વિધવા પેન્શન ફોર્મ ભરવામાં મદદ કરવાની ખાતરી આપી હતી. ત્યારબાદ એક કલાક પછી હસમુખ વધેલાએ વૃદ્ધ મહિલાને કોલ કરી બોટાદ કલેક્ટર કચેરીએ સહી કરવાના બહાને બોલાવી હતી. આરોપી હસમુખ વૃદ્ધ મહિલાને ઘરેથી બોટાદ કલેક્ટર કચેરીની પાછળ આવેલી અવાવરુ જગ્યાએ લઈ ગયો હતો. જ્યાં આરોપીએ વૃદ્ધ મહિલા સાથે દુષ્કર્મ ગુજાર્યું હતું અને ત્યારબાદ દાગીના આંચકી લઈ હસમુખ ભાગી છૂટયો હતો.

આરોપી લૂંટ, હત્યા અને દુષ્કર્મ સહિત 32 ગુનામાં સંડોવાયેલો છે
આ મામલે પોલીસને જાણ કરવામાં આવતા પોલીસે દોડી જઇ નિવેદન નોંધી કાર્યવાહી હાથ ધરી હતી. લૂંટ અને દુષ્કર્મ બાદ આરોપી હસમુખે વૃદ્ધ મહિલાને ધમકી આપી અને આ બાબતે કોઇને જાણ ન કરવા જણાવ્યુ હતું. વધુમાં વૃદ્ધ મહિલાને મારી નાખવાની અને પરિવારના સભ્યોને પણ નુકસાન પહોંચાડવાની આરોપીએ ધમકી આપી હતી. એટલું જ નહી હસમુખે વૃદ્ધ મહિલાને ઘરે પરત ફરવા માટે 100 રૂપિયા આપ્યા હોવાનું પણ પોલીસ સમક્ષ જાહેર થયું હતું જેને લઇને બોટાદ પોલીસે હસમુખના મોબાઈલ નંબર પર સતત નજર રાખી 24 કલાકમાં તેની ધરપકડ કરી હતી. પોલીસની પ્રાથમિક તપાસમાં આરોપી હસમુખ લૂંટ, હત્યા અને દુષ્કર્મ સહિત 32 ગુનામાં સંડોવાયેલ હોવાની ચોંકાવનારી વિગત સામે આવી છે.