કોંગ્રેસનો ગઢ ગણાતી બોરસદ બેઠક ઉપર મતદારોને રિઝવવા માટે ડાન્સરનો સહારો લેવામાં આવ્યો છે. જેનો વીડિયો સોશિયલ મીડિયામાં વાયરલ થતાં કોંગ્રેસ ઉમેદવાર રાજેન્દ્રસિંહ પરમારે ખુલાસો કર્યો છે. તેમણે કહ્યું કે, 'ડાન્સ ચાલતો હતો ત્યારે હું મંચ પર નહોતો.'
બોરસદ કોંગ્રેસના ઉમેદવારના પ્રચારમાં બોલાવવામાં આવી ડાન્સર
ડાન્સ ચાલતો હતો ત્યારે હું મંચ પર નહોતો: રાજેન્દ્રસિંહ પરમાર
ગુજરાત વિધાનસભાની બીજા તબક્કાની ચૂંટણીનું કાઉન્ટડાઉન શરૂ થઈ ગયું છે. એવામાં આણંદમાં એવી ઘટનાનો વીડિયો સામે આવ્યો છે જેના કારણે કોંગ્રેસ પક્ષની ટીકા થઈ રહી છે. આણંદ જિલ્લાની બોરસદ બેઠકના કોંગ્રેસના ઉમેદવાર રાજેન્દ્રસિંહ પરમારના પ્રચાર માટે ડાન્સર બોલાવવામાં આવી હતી. કોંગ્રેસની ચૂંટણી સભામાં ભીડ એકત્ર કરવા તેમણે ડાન્સરનો સહારો લીધો હતો. ડાન્સરે સ્ટેજ પર ઠુમકા લગાવ્યા હતા. મતદારોને રીઝવવા માટે નેતાઓ અને રાજકીય પક્ષો જુદા જુદા પેતરા અજમાવતા હોય છે ત્યારે આ પ્રકારે ડાન્સરને નચાવતા વિવાદ સર્જાયો છે.
ડાન્સની ઘટના નિંદનીય: રાજેન્દ્રસિંહ પરમાર
વિવાદ વકર્યા બાદ કોંગ્રેસ ઉમેદવાર રાજેન્દ્રસિંહ પરમારે ડાન્સર બોલાવવા મુદ્દે ખુલાસો કર્યો છે. તેમણે જણાવ્યું કે, 'દાવોલ ગામે મારી સભા યોજાઈ હતી. ત્યાંના સ્થાનિક કાર્યકરોએ મ્યુઝિકલ પાર્ટી રાખી હતી, જ્યારે હું સભા કરવા ગયો ત્યારે સ્ટેજ પર કોઈ ડાન્સર નહોતી, હું સભા સંબોધીને તાત્કાલિક પરત આવી ગયો હતો. ડાન્સની આ ઘટના નિંદનીય છે. મેં આ અંગે નોંધ લીધી છે, હું મારા કાર્યકરો સાથે વાત કરીશ.'
વીડિયો વાયરલ થયા બાદ વિવાદ
મતદાનની તારીખ નજીક આવતા દરેક રાજકીય પક્ષો પ્રચાર થકી મતદારોની રીઝવવા એડીચોટીનું જોર લગાવી રહ્યા છે. એવામાં બોરસદના દાવોલ ગામે કોંગ્રેસની પ્રચાર સભામાં જાહેર સ્ટેજ પર ડાન્સર ઠુમકા લગાવતી હોય તેવો વીડિયો વાયરલ થયા બાદ વિવાદ સર્જાયો છે.
પાછલી 2 ટર્મથી ચૂંટાઇ રહ્યા છે રાજેન્દ્રસિંહ પરમાર
બોરસદને કોંગ્રેસનો ગઢ માનવામાં આવે છે. અત્યાર સુધીમાં અહીં 15 વખત ચૂંટણી યોજાઈ છે, જેમાંથી 14 વખત કોંગ્રેસની જીત થઈ છે, જ્યારે 1 વખત અપક્ષે બાજી મારી હતી. કોંગ્રેસના ઉમેદવાર રાજેન્દ્રસિંહ છેલ્લી 2 ટર્મથી જીતતા આવે છે. ગત ચૂંટણીમાં તેઓએ ભાજપના રમણ સોલંકીને 11,468 મતથી હરાવ્યા હતા. તો 2012માં પણ કોંગ્રેસના રાજેન્દ્ર પરમારે ભાજપના નયના સોલંકીને 21,034 મતેથી હરાવ્યા હતા.