ભાજપમાં ડખો / સાંસદ મિતેષ પટેલ વિરૂદ્ધ સોશિયલ મીડિયામાં પોસ્ટ કરવા બદલ બે નગરસેવકોને જેલમાં મોકલી દેવાયા, જાણો શું છે મામલો

• ભાજપમાં આંતરિક વિખવાદોમાં વધારો
• બોરસદ ભાજપમાં સામૂહિક રાજીનામાંની ચીમકી
• સાંસદ મિતેષ પટેલ અને નગરસેવકો વચ્ચેનો વિવાધ વધ્યો

ગુજરાત વિધાનસભાની ચૂંટણી ટાણે પક્ષના જ કાર્યકર્તાઓ એકબીજાના ટાંટિયા ખેંચવાનો મોકો છોડી નથી રહ્યા. પક્ષમાં જ અંદરોઅંદર નારાજગી અને રોષ જોવા મળી રહ્યો છે. ત્યારે આણંદના સાંસદ વિરુદ્ધ સોશિયલ મીડિયામાં અભદ્ર પોસ્ટ મુકાવા મામલે આંતરિક વિવાદમાં વધારો થઇ રહ્યો છે. સાંસદ મિતેષ પટેલ અને નગરસેવકો વચ્ચે વિવાદ વધ્યો છે. 

બોરસદ ભાજપમાં સામૂહિક રાજીનામાની ચીમકી

ભાજપમાં આંતરિક વિખવાદોમાં વધારો થઇ રહ્યો છે. બોરસદ ભાજપમાં સામૂહિક રાજીનામાંની ચીમકી ઉચ્ચારવામાં આવી છે. સાંસદ મિતેષ પટેલ અને નગરસેવકો વચ્ચેનો વિવાદ વધ્યો છે. બે નગરસેવકોને જેલમાં મોકલતા વિવાદ વકર્યો હતો. સોશિયલ મીડિયા પર ટિપ્પણી બદલ બે નગરસેવકો સામે કાર્યવાહી કરવામાં આવી હતી. કાર્યવાહી બાદ પરાગ પટેલ અને દિનેશ પટેલની ધરપકડ કરવામાં આવી હતી.  કોર્ટે બંને નગરસેવકોના જામીન ફગાવતા જેલમાં મોકલવામાં આવ્યા છે. નગરસેવકો સામેની કાર્યવાહીથી વિવાદ વધ્યો છે. વિવાદને કારણે સ્થાનિક ભાજપમાં રોષનો માહોલ જોવા મળી રહ્યો છે.

શું હતો સોશિયલ મીડિયામાં પોસ્ટનો મામલો ?

આણંદના સાંસદ મિતેષ પટેલ સામે વિકાસના કામોને લઇને આરોપ લગાવવામાં આવ્યા હતા.  બોરસદ ભાજપના કાઉન્સિલરે જ અભદ્ર પોસ્ટ મુકતા ચર્ચાનો દોર શરુ થયો હતો.  વિકાસના કામોમાં અવરોધ થતા હોવાનો ઉલ્લેખ કરીને જાકારો આપો તેમ પણ  પોસ્ટમાં લખવામાં આવ્યું હતું. સાંસદ મિતેષ પટેલને એલફેલ શબ્દોનો પ્રયોગ કરવામાં આવ્યો હતો. આ અંગે બોરસદ પોલીસ સ્ટેશનમાં 4 લોકો સામે પોલીસ ફરિયાદ નોંધાઇ હતી. 

ભાજપની પૂર્ણ બહુમત છતાં કામ ન થતો હોવાનો આરોપ

બોરસદ નગરપાલિકામાં ભાજપની  પૂર્ણ બહુમત અને કરોડોની ગ્રાન્ટ હોવા છતાં વિકાસના કામો ન થતો હોવાનો આક્ષેપ કરવામાં આવ્યો હતો. જે કામો લખીને મોકલવામાં આવે છે તેને પ્રાદેશિક કમિશનર દ્વારા જુદા જુદા નિયમો બનાવીને રદ કરી દેવામાં આવતા સ્થાનિક કાઉન્સિલરોમાં ગુસ્સો ફાટી નીકળ્યો હતો. ત્યારે વોર્ડ નં 7માં ભાજપના મેન્ડેટ પર ચૂંટાયેલા કાઉન્સિલર પરાગભાઈ પટેલએ સોશિયલ મીડિયામાં રોષ ઠાલવ્યો હતો.  પ્રાદેશિક કમિશનર દ્વારા જે કામો રદ કરવામાં આવે છે તેમાં સત્તાધારીપક્ષના કેટલાક કાઉન્સિલરોના હાથ છે અને તેઓને સાંસદ મિતેષભાઈ પટેલ મદદગારી કરી રહ્યા હોવાનું જણાવીને બેફામ વાણીવિલાસ કરવામાં આવ્યો હતો.