દારૂને સજ્જનો નરકનુ બારું માને છે પરંતુ આજકાલ આ દારૂએ હરવા-ફરવા માટે અનેક બારુ શોધી કાઢયા છે. દારૂ પ્રતિબંધિત રાજ્ય ગુજરાતમાં સડકો પર નીતનવી સવારી પર બે-રોકટોક મુસાફરી કરી રહ્યો છે. કેટલાક બુટલેગરો પોલીસની આંખમાં ધૂળ નાખવા નીતનવા રસ્તાઓ અપનાવે છે.
કોઈ એમ્બ્યુલન્સમાં દારૂનું વહન કરે છે. તો કોઈ પેટ્રોલના ટેન્કરમાં શરાબ સ્થળાંતરિત કરી રહ્યા છે. કોઈ લક્ઝરી બસમાં વિદેશી દારૂને સહેલ કરાવે છે. જોકે હપતાખોરીથી બચીને ભાગતા ફરતાં બુટલેગરો પર જ પોલીસની બાજનજર હોય છે પરંતુ જનતા પોલીસને પૂછી રહી છે. આટલા સતર્ક છો તો પછી શહેરમાં અડ્ડા કેમ ધમધમે છે અને શેરીઓમાં શરાબ કેમ રેલાય છે?
અરવલ્લી જિલ્લાના શામળાજી નજીક આવેલા નામડા ગામ પાસેથી પસાર થઈ રહેલી એમ્બ્યૂલન્સ લખેલી એક બોલેરો ગાડીને પોલીસે રોકી હતી. એમ્બ્યુલન્સ લખેલી ગાડીની પોલીસ દ્વારા તપાસ કરતા તેમાંથી કોઈ દર્દી તો ન મળી આવ્યો પરંતુ વિદેશી દારૂની 750 નંગ બોટલો મળી આવી હતી.
પોલીસે ગાડી સહિત વિદેશી દારૂનો જથો કબજે કર્યો હતો. જોકે પોલીસ કશું સમજે તે પહેલા આરોપીઓ ભાગી છૂટયા હતા. આશ્ચર્યન વાત એ હતી કે દારૂની ખેપમાં ઝડપાયેલુ આ વાહન એમ્બ્યુલન્સ તરીકે ક્યાંય સેવા આપતું ન હતું પરંતુ દારૂની ખેપ મારતાં પોલીસની નજરથી બચવા બોલેરો પર એમ્યુલન્સનું નામાકરણ કરી દેવામાં આવ્યું હતું.
આ પહેલા બનાસકાંઠા જિલ્લાના થરાદના ખોડા ચેકપોસ્ટ પરથી લકઝરી બસમાંથી વિદેશી દારૂનો જથ્થો ઝડપાયો હતો. 3 બેગમાંથી વિદેશી દારૂની 108 બોટલો ઝડપાઈ હતી. તો બીજી તરફ વલસાડ જિલ્લાના વાપીમાંથી ડીઝલ-પેટ્રોલના ટેન્કરમાંથી 7.20 લાખનો દારૂ ઝડપાયો હતો. ટેન્કરની અંદરથી ચોરખાના બનાવેલા હતાં. જેમાં મોટા પ્રમાણમાં વિદેશી દારૂ ભરવામાં આવ્યો હતો. ત્યારે એમ્બ્યુલન્સના ઓઠા હેઠળ દારૂની કરાતી આ હેરાફેરીએ પોલીને વિચારતા કરી દીધા છે.