અરવલ્લીના શામળાજી નજીક આવેલા વેણપુર પાસેથી પોલીસે મહારાષ્ટ્ર એચ.એસ.સી. પરીક્ષા બોર્ડની સપ્લીમેન્ટરીની આડમાં સંતાડીને લઈ જવાતો વિદેશી દારૂ ઝડપી પાડ્યો છે. અરવલ્લી પોલસે 13.51 લાખ રૂપિયાના વિદેશી દારૂના જથ્થા સાથે ટ્રક અને બે શખ્સોની ધરપકડ પણ કરી છે.
ટ્રકમાં 850 કાર્ટૂનમાં દારૂનો જથ્થો ભરવામાં આવ્યો હતો. પોલીસે વિદેશી દારૂ ટ્રક સહિત કુલ રૂપિયા 23.55 લાખનો મુદ્દામાલ કબજે કર્યો છે. પોલીસે આ દારૂ ઝડપી પાડીને ગુજરાતમાં દારૂ ઘૂસાડવાની નવી મોડસ ઓપરેન્ડીનો પર્દાફાશ કર્યો છે.
ઝડપાયેલા બંને શખ્સો ઉત્તરપ્રદેશના રહેવાસી હોવાનું સામે આવ્યું છે. પોલીસે ઉત્તરપ્રદેશના પઠાનપુર તાલુકાના રાઠ જિલ્લાના રહેવાસી માતાદિન ખૂબચંદ ધોબી અને ચેનુ ખૂબચંદ ધોબી નામના શખ્સોની ધરપકડ કરી આગળની કાર્યવાહી હાથ ધરી છે. પોલીસે આ વિદેશી દારૂનો જથ્થો ખાનગી બાતમીના આધારે ઝડપી પાડ્યો છે. આ ટ્રકમાં સપ્લીમેન્ટરીના આડમાં દારૂ ગુજરાતમાં ઘૂસાડવાનું કાવતરૂ હતું.