અમદાવાદના સોલા પોલીસ સ્ટેશનમાં ગઇ કાલે એક કુખ્યાત બુટલેગરે પોલીસ સ્ટેશન માથે લેતાં ચકચાર મચી ગઇ છે. બુટલેગરે PI-PSIને સસ્પેન્ડ કરાવવાની ધમકી આપી હતી.
બુટલેગરે સોલા પોલીસ સ્ટેશન માથે લીધું
PI-PSIને સસ્પેન્ડ કરાવવાની ધમકી આપી
પોલીસ સ્ટેશનમાં નોટિસ ફાડી નાખ્યા બાદ પોલીસ સાથે ઝપાઝપી કરી
દારૂનો જથ્થો મુકાવીને વિજિલન્સની રેડ કરાવ્યા બાદ સોલા પોલીસ સ્ટેશનના પીઆઇ તેમજ ડી સ્ટાફના પીએસઆઇને સસ્પેન્ડ કરાવવાની ધમકી બુટલેગરે પોલીસ સ્ટેશનમાં આપી હતી. આટલેથી ન અટકતાં બુટલેગરે પોલીસે આપેલી નોટિસ પણ ફાડી નાખી હતી અને પોલીસ કર્મચારીઓ સાથે ઝપાઝપી કરી હતી.
સોલા પોલીસ સ્ટેશનમાં સર્વેલન્સ સ્ક્વોડમાં મ.સ.ઇ ગોપાલસિંહ વાઘેલા ફરજ બજાવે છે. જેમણે ગઇ કાલે બુટલેગર અજયસિંહ ઉર્ફે મોન્ટુ દરબાર વિરુદ્ધ સોલા પોલીસ સ્ટેશનમાં ફરિયાદ કરી છે. ગત તા. ૮મી જાન્યુઆરીના રોજ ચાણક્યપુરી સેકટર ૬ સામે આવેલા ખુલ્લા મેદાનમાંથી ચિરાગ દરબાર નામનો બુટલેગર દારૂની ૨૪ બોટલ સાથે પોલીસના હાથે ઝડપાયો હતો. જેની પૂછપરછમાં તે આ દારૂનો જથ્થો તેનો ભાઈ અજયસિંહ ઉર્ફે મોન્ટુ આપી ગયો હોવાની કબૂલાત કરી હતી. જેથી બંને ભાઈઓ સામે સોલા પોલીસ સ્ટેશનમાં પ્રોહિબિશનનો ગુનો નોંધાયો હતો.
આ ગુનાની તપાસના કામે ૧૬મી ફેબ્રુઆરીના રોજ આરોપી અજયસિંહ ઉર્ફે મોન્ટુએ કોર્ટમાંથી આગોતરા જામીન મેળવી પોલીસ સ્ટેશન જામીન સાથે હાજર રહ્યો હતો. ત્યારે પોલીસે આરોપીને આ દારૂનો જથ્થા બાબતે પૂછપરછ કરી હતી. આરોપી સામે અગાઉ પણ ગુના નોંધાયા હોવાથી તે રીઢો થઈ ગયો અને પોલીસને જવાબ આપતો ન હતો. પોલીસે કોર્ટના હુકમ મુજબ આરોપીને ૧૬મીએ જામીન પર મુક્ત કરી રિમાન્ડની કાર્યવાહી કરવાની હોવાથી તેને મીરજાપુર કોર્ટ ખાતે હાજર રહેવાની નોટિસ આપી હતી. આરોપી અજયસિંહ ઉર્ફે મોન્ટુએ પોલીસને ઉગ્ર થઈને કહ્યું કે હાઇકોર્ટમાંથી જામીન મેળવ્યા છે તો હવે શેના રિમાન્ડ તેમ કહી પોલીસે આપેલી નોટિસ ફાડી નાખી હતી.
અજયસિંહએ પોલીસકર્મીઓ સાથે ઝપાઝપી પર ઊતરી આવ્યો હતો અને પોલીસને ધમકી આપી કે તેમના વિસ્તારમાં દારૂનો જથ્થો મુકાવી વિજિલન્સની રેડ કરાવશે અને સોલા પોલીસ સ્ટેશનના પીઆઇ તેમજ પીએસઆઇને સસ્પેન્ડ કરાવશે.