દિલધડક ઓપરેશન / VIDEO: સુરતના ઉમરપાડામાં બુટલેગરોને પકડવા જતા સર્જાયા ફિલ્મી દ્રશ્યો, પીછો કરતા પોલીસ જવાનો પર કાર ચડાવવાનો પ્રયાસ

• સુરતના ઉમરપાડામાં બુટલેગરોને પકડવા જતા સર્જાયા ફિલ્મી દ્રશ્યો
• બુટલેગરોને પકડવા ઉમરપાડા પોલીસનું દિલધડક ઓપરેશન
• ફિલ્મીઢબે કાર દોડાવી પોલીસે આરોપીઓને ઝડપવાનો પ્રયાસ કર્યો

રાજ્યમાં લોકો જાણે કે કાયદાને ધોળી પી ગયા હોય તેમ સરેઆમ કાયદાનો ભંગ કરી રહ્યાં છે. ગુનેગારોને જાણ કે પોલીસનો કોઈ ખૌફ નથી રહ્યો. ક્યારેક ખુલ્લેઆમ ડ્રગ્સ કે દારુનો જથ્થો ઝડપાય છે તો ક્યારેક ખુલ્લેઆમ ફાયરિંગ થતું જોવા મળે છે. જેવી અનેક ઘટનાઓથી એમ લાગી રહ્યું છે કે, જાણે કે ગુજરાતમાં ગુનેગારો હવે પોલીસથી ઉપરવટ થઇને ક્રાઇમ કરતા સહેજ પણ ખચકાતા નથી. ત્યારે એમાંય રાજ્યમાં સૌથી વધુ ગુનાકીય પ્રવૃત્તિઓ તો જાણે સુરતમાં જ થતી હોય તેવું દેખાઇ રહ્યું છે.

ઉમરપાડામાં બુટલેગરોને પકડવા જતા સર્જાયા ફિલ્મી દ્રશ્યો

તાજેતરમાં જ સુરતના ઉમરપાડામાં બુટલેગરોને પકડવા જતા ફિલ્મી દ્રશ્યો સર્જાયા હતા. ઉમરપાડામાં પોલીસ દ્વારા દિલધડક ઓપરેશન હાથ ધરવામાં આવ્યું હતું. જેના વીડિયો અને સીસીટીવી ફૂટેજ પણ સામે આવ્યા છે.

કારનો પીછો કરતા બુટલેગરોએ પોલીસ જવાનો પર કાર ચડાવી દીધી!

સુરત જિલ્લાની ઉમરપાડા પોલીસને એવી બાતમી મળી હતી કે, એક કારમાં વિદેશી દારૂનો જથ્થો આવી રહ્યો છે. આથી બાતમીના આધારે ઉમરપાડા પોલીસે આરોપીઓ પર વોચ ગોઠવી રાખી હતી. પરંતુ જ્યારે પોલીસે આરોપીઓની કારને અટકાવવાનો પ્રયાસ કર્યો ત્યારે તેઓએ પૂરઝડપે કાર હંકારી દીધી. જેથી પોલીસે ફિલ્મીઢબે કાર દોડાવીને આરોપીઓને ઝડપવાનો પ્રયાસ કર્યો હતો. જોકે, બાઈક પર પીછો કરતા પોલીસ જવાનો પર બુટલેગરોએ કાર ચડાવી દીધી. જોકે સદનસીબે આ દિલધડક ઓપરેશનમાં કોઇનો જીવ ન હોતો ગયો. બંને જવાનો બચી ગયા હતા. પરંતુ બાઈકને જરૂરથી નુકસાન થયું હતું. પરંતુ બુટલેગરો કાર લઈને ભાગી જવામાં સફળ રહ્યાં હતા. સમગ્ર ઘટનામાં આરોપી કાર મૂકીને ફરાર થઇ ગયા હોવાનું જોવા મળી રહ્યું છે. આથી, પોલીસે કારની અંદર તપાસ કરતા પોલીસને ખૂબ મોટી માત્રામાં વિદેશી દારૂનો જથ્થો મળી આવ્યો છે. હાલમાં પોલીસે મુદ્દામાલ જપ્ત કરી બુટલેગરોની શોધખોળ હાથ ધરી છે.

શું બુટલેગરોને હવે પોલીસ કે કાયદાનો ડર નથી રહ્યો?

જોકે આ ઘટનાને લઇને અહીં અનેક સવાલો પણ ઊભા થઇ રહ્યાં છે જેવાં કે, શું બુટલેગરોને હવે કોઇ કાયદાનો કે પોલીસનો ડર નથી રહ્યો? આખરે આટલી બધી હિંમત બુટલેગરોમાં આવે છે ક્યાંથી? આખરે કોની રહેમ નજરથી ગુજરાતમાં બુટલેગરોનો ધંધો ફૂલ્યોફાલ્યો છે? આખરે કેમ બુટલેગરો પોલીસ પર પણ હુમલો કરતા અચકાતા નથી? હાલમાં ઉમરપાડા પોલીસે વિદેશી દારૂ અને કાર જપ્ત કરી આ સમગ્ર મામલે આગળની કાર્યવાહી હાથ ધરી છે.