બૂસ્ટર ડોઝ / અમદાવાદમાં આજથી બૂસ્ટર ડોઝની શરૂઆત, આ હોસ્પિટલમાં ફ્રન્ટલાઈન વર્કર અને વરિષ્ઠ નાગરીકોને મળશે લાભ

• અમદાવાદમાં આજથી બૂસ્ટર ડોઝની શરૂઆત 
• સોલા સિવિલ હોસ્પિટલમાં મળશે બૂસ્ટર ડોઝ 
• ફ્રન્ટલાઈન વર્કર અને વરિષ્ઠ નાગરીકોને અપાશે બૂસ્ટર ડોઝ

વકરતા જતા કોરોનાને કારણે સરકાર દ્વારા બૂસ્ટર ડોઝ આપવાની વાત કરવામાં આવી હતી. જેથી કરીને સંક્રમણને બને તેટલુ કાબૂમાં લઈ શકાય. ત્યારે આજથી કોરોનાના બૂસ્ટર ડોઝ આપવાની શરૂઆત કરી દેવામાં આવી છે. જેમા ફ્રંટલાઈન વર્કર અને વરિષ્ઠ નાગરીકોને આજથી કોરોના રસીનો ત્રીજો ડોઝ આપવામાં આવશે. 

વેક્સિન સેન્ટર પર આપવામાં આવશે ડોઝ 

અમદાવાદમાં પણ આજથી કોરોનાના બૂસ્ટર ડોઝ આપવાનું શરૂ કરી દેવામાં આવી છે. જેમા સોલા સિવિલ હોસ્પિટલ ખાતે બૂસ્ટર ડોઝ આપવાની ખાસ વ્યવસ્થા કરવામાં આવી છે. હોસ્પિટલમાં આવેલ વેક્સિન સેન્ટર પરથી બૂસ્ટર ડોઝ આપવામાં આવશે. 

રાજ્યમાં વધ્યા કોરોનાના કેસ 

રાજ્યમાં હાલ કોરોનાના કેસ વાયુ વેગે વધી રહ્યા છે ગત 24 કલાકની વાત કરીએ તો છેલ્લા 24 કલાકમાં 6275 કેસ નોંધાયા છે. જે હવે એક ચિંતાનો વિષય બન્યો છે. જોકે પરિસ્થિતી બેકાબૂ બનતા કેન્દ્ર સરકાર દ્વારા બૂસ્ટર ડોઝ આપવાની જાહેરાત કરવામાં આવી હતી. જેમા આજથી લોકોને બૂસ્ટર ડોઝ આપવામાં આવશે. 

વિદ્યાર્થીઓમાં પણ સંક્રમણ બેકાબૂ 

ઉલ્લેખનીય છે કે કોરોનાના કેસ ગુજરાતની શાળાઓમાં પણ વધી રહ્યા છે. જેમા 1 ડિસેમ્બરથી લઈને અત્યાર સુધીમાં 1100 જેટલા વિદ્યાર્થીઓનો રિપોર્ટ પોઝિટીવ આવ્યો છે.  સૌથી વધારે કેસ સુરતમાં નોંધાયા છે. જ્યા અત્યાર સુધીમાં કુલ 532 જેટલા વિદ્યાર્થીઓનો રિપોર્ટ પોઝિટીવ આવ્યો છે. જે એક ચિંતાનો વિષય બન્યો છે. જોકે હાલ તો સરકાર દ્વારા 1 થી 9 ધોરણના વિદ્યાર્થીઓના ઓફલાઈન વર્ગો બંધ કરી દીધા છે.