RSS કાર્યકર્તાના ઘરની નજીક બોંબ વિસ્ફોટ બાદ ફોરેન્સિક ટીમે ઘટનાસ્થળેથી પુરાવા એકત્ર કરવાની કવાયત શરૂ કરી
કેરળના કન્નુર જિલ્લામાં બોમ્બ બ્લાસ્ટની ઘટના સામે આવી
RSS કાર્યકર્તાના ઘરની નજીક થયો બોંબ વિસ્ફોટ
SDPI અને સંઘના કાર્યકર્તાઓ બાખડ્યા, પોલીસ તપાસ શરૂ
કેરળના કન્નુર જિલ્લામાં બોમ્બ બ્લાસ્ટની ઘટના સામે આવી છે. વિગતો મુજબ રાષ્ટ્રીય સ્વયંસેવક સંઘ (RSS) કાર્યકરના ઘરની સામે આ બોમ્બ વિસ્ફોટ થયો હતો. મત્તનુર પોલીસના જણાવ્યા અનુસાર RSS કાર્યકર સુધિશના ઘરથી લગભગ 50 મીટર દૂર બોમ્બ વિસ્ફોટ થયો હતો. પોલીસે ગુનો નોંધી વધુ તપાસ શરૂ કરી છે. ફોરેન્સિક ટીમે ઘટનાસ્થળેથી પુરાવા એકત્ર કર્યા છે અને ડોગ સ્કવોડે પણ સ્થળની મુલાકાત લીધી છે. આ ઉપરાંત જિલ્લા પોલીસ વડાએ ઘટનાસ્થળની મુલાકાત લીધી હતી.
કન્નુર જિલ્લામાં બોમ્બ બ્લાસ્ટ અંગે પોલીસે જણાવ્યું હતું કે, સુધિશ પણ અનેક કેસમાં આરોપી હોય પોલીસે વધુ તપાસ હાથ ધરી છે. ઉલ્લેખનીય છે કે, ગયા મહિને બોમ્બ વિસ્ફોટ બાદ આ વિસ્તારમાં RSS અને સોશિયલ ડેમોક્રેટિક પાર્ટી ઑફ ઈન્ડિયા (SDPI)ના કાર્યકરો વચ્ચે અથડામણ થઈ હતી. અથડામણ દરમિયાન અનેક મકાનો અને મિલકતોને નુકસાન થયું હતું.
બીજી ઘટનામાં શુક્રવારે કન્નવમમાં પૂર્વ SDPI કાર્યકર સલાહુદ્દીનના ઘર પાસે બોમ્બ વિસ્ફોટ થયો હતો. પોલીસે કેસ નોંધી તપાસ હાથ ધરી છે. મહત્વનું છે કે, એક મહિના પહેલા પણ કેરળમાં આવો હુમલો થયો હતો. કન્નુર જિલ્લામાં સ્થિત રાષ્ટ્રીય સ્વયંસેવક સંઘની ઓફિસમાં બોમ્બ વિસ્ફોટ કરવામાં આવ્યો હતો. આ હુમલો કન્નુરના પયાનુરમાં થયો હતો. હુમલા બાદ ઓફિસની બારીના કાચ પણ તૂટી ગયા હતા. બોમ્બ ધડાકા બાદ તુરંત જ વિસ્તારમાં ગભરાટ ફેલાયો હતો.