જ્યાં સુધી બોલિવૂડની વાત છે તો કોપ્સ એટલે કે પોલીસવાળા નવા સુપર હીરો છે. આ વર્ષે પોલીસવાળાની હીરો તરીકે ૧૦ ફિલ્મ આવશે, જેની જાહેરાત અગાઉ થઇ ચૂકી છે. કેટલીક ફિલ્મો હાલમાં અંડર પ્રોડક્શન છે, જે ખૂબ જ જલદી મોટા પરદે જોવા મળશે. કેટલાંક નાયક અને નાયિકાઓ આ ફિલ્મમાં મુખ્ય ભૂમિકા ભજવશે.
રજનીકાંત
'થલાઇવા' નામથી પ્રસિદ્ધ રજનીકાંતની ૧૯૮૨માં આવેલી ફિલ્મ 'મોંડરુમુગમ'માં પણ તેનું પાત્ર પોલીસ અધિકારીનું હતું. હવે એક વાર ફરી તે એ જ અવતારમાં એ.આર. મુરુગદોશની ફિલ્મ 'દરબાર'થી કમબેક કરશે. આ પહેલાં પણ રજનીકાંતે 'હમ', 'ગિરફતાર', 'રામ રોબર્ટ રહીમ', 'નાટુકુઓરુ'માં પોલીસનું પાત્ર ભજવ્યું હતું.
રણદીપ હુડા
'બાગી-૨'માં લોહાસિંહ ઢલ્લ નામના એક સખત પોલીસવાળાનું પાત્ર ભજવ્યા બાદ રણદીપ સંજય લીલા ભણસાળીની આવનારી ફિલ્મમાં એક વાર ફરી પોલીસ યુનિફોર્મ પહેરશે. આ ફિલ્મ એક થ્રિલર છે, જેમાં થોડી કોમેડી પણ હશે. તે કહાણી એક નાના નગરમાં સેટ કરાઇ છે.
જોન અબ્રાહમ
રાષ્ટ્રવાદી વિષયોવાળી ત્રણ ફિલ્મો 'પરમાણુઃ ધ સ્ટોરી ઓફ પોખરણ', 'સત્યમેવ જયતે' અને 'રોમિયો અકબર વોલ્ટર' કર્યા બાદ જોન અબ્રાહમ નિખિલ અડવાણીની ફિલ્મ 'બાટલા હાઉસ'માં પોલીસની ભૂમિકામાં જોવા મળશે. આ ફિલ્મ ૨૦૦૮માં દિલ્હીમાં થયેલા બાટલા હાઉસ એન્કાઉન્ટર પર આધારિત છે. જોન એસીટી સંજીવકુમાર યાદવના પાત્રમાં જોવા મળશે.
સલમાનખાન
ચુલબુલ પાંડે 'દબંગ' સિરીઝની ત્રીજી ફિલ્મથી પરત આવી રહ્યો છે. આ ફિલ્મમાં એક નવું પાત્ર હશે, જે કન્નડ સ્ટાર સુદીપ ભજવશે. ત્રીજી સિરીઝનું નિર્દેશન પ્રભુ દેવા કરશે. એક્શનનો ભરપૂર ડોઝ ફિલ્મમાં જોવા મળશે. આ ઉપરાંત સલમાનખાન પાસે કોરિયન કોપ થ્રિલર 'વેટર્ન'ની રિમેક પણ હશે.
આયુષ્માન ખુરાના
'વિકી ડોનર' અને 'બધાઇ હો' જેવી કોમેડી ફિલ્મ અને શ્રીરામ રાઘવનની થ્રિલર ફિલ્મ 'અંધાધૂન' કર્યા બાદ આયુષ્માન મોટા પરદે નવો પ્રયોગ કરવા જઇ રહ્યો છે. તેણે અનુભવ સિંહાની ફિલ્મ 'આર્ટિકલ-૧૫' માટે પહેલી વાર ખાખી વરદી પહેરી છે. આયુષ્માન પહેલી વાર મૂછવાળા અવતારમાં જોવા મળશે.
કરીના કપૂર
કરીના એવું પાત્ર ભજવવા જઇ રહી છે, જેને ભજવવાની હિંમત તેની સમકાલીન અભિનેત્રીઓ કદાચ જ કરી શકે. હોમી અદજાનિયા દ્વારા નિર્દેશિત અંગ્રેજી મીડિયમમાં તે એક મહિલા પોલીસ અધિકારીનું પાત્ર ભજવવા જઇ રહી છે. ફિલ્મમાં તેની સાથે ઇરફાનખાન હશે.
દિલજિત દોસાંજ
દિલજિત દોસાંજની ફિલ્મ 'અર્જુન પટિયાલા' તેના માટે કોઇ ઘરવાપસી જેવી છે. આ ફિલ્મમાં તે પહેલી વાર હિંદીમાં હાસ્ય રોલ ભજવતો જોવા મળશે. તે એક પોલીસ અધિકારી છે. આ પહેલાં 'ઉડતા પંજાબ'માં પણ તે પોલીસનું ગંભીર પાત્ર ભજવી ચૂક્યો છે.