રાહત / અભિનેતા અરમાન કોહલીને મળ્યા જામીન, ડ્રગ્સ મામલે NCB એ કરી હતી ધરપકડ

• ડ્રગ્સ કેસ મામલે અરમાન કોહલી માટે રાહતના સમાચાર
• બોમ્બે હાઈકોર્ટે તેમની જામીન અરજી સ્વીકારી લીધી છે
• NCB ડ્રગ્સ સંબંધિત કેસમાં કોહલીની ધરપકડ કરી હતી

ડ્રગ્સ કેસ મામલે એક વર્ષથી વધુ સમયથી જેલમાં બંધ અભિનેતા અરમાન કોહલી માટે રાહતના સમાચાર છે. બોમ્બે હાઈકોર્ટે તેમની જામીન અરજી સ્વીકારી લીધી છે. કોર્ટે તેને એક લાખ રૂપિયાના પર્સનલ બોન્ડ પર જામીન આપવાનો આદેશ આપ્યો છે. નાર્કોટિક્સ કંટ્રોલ બ્યુરો (NCB)એ ગત વર્ષે ડ્રગ્સ સંબંધિત કેસમાં કોહલીની ધરપકડ કરી હતી.

અનેક વખત અરજીઓ ફગાવી હતી 
આ વર્ષે ફેબ્રુઆરીમાં અરમાન કોહલીએ એનડીપીએસ કોર્ટમાં વચગાળાના જામીન માટે અરજી કરી હતી. કોહલીની અરજીમાં કહેવામાં આવ્યું હતું કે તે પોતાના બીમાર માતા-પિતાને મળવા માંગે છે, તેથી તેને 14 દિવસ માટે વચગાળાના જામીન આપવા જોઇએ. જો કે કોર્ટે તેમની અરજી ફગાવી દીધી હતી. બાદમાં તેણે બે દિવસના વચગાળાના જામીન માંગ્યા હતા. આ પહેલા સ્પેશિયલ કોર્ટ અને બોમ્બે હાઈકોર્ટે તેમની જામીન અરજી ફગાવી દીધી હતી.

Actor Armaan Kohli gets bail from Bombay High Court on a personal bond of Rs 1 lakh.

He was arrested by Narcotics Control Bureau in a drugs case & had been lodged in jail for the last 1 year.

(File photo) pic.twitter.com/fV8VvUWhto

— ANI (@ANI) September 20, 2022

શું છે સમગ્ર મામલો
નાર્કોટિક્સ કંટ્રોલ બ્યુરોએ ગયા વર્ષે જુલાઈમાં દાવો કર્યો હતો કે તેઓએ એક વ્યક્તિ પાસેથી 25 ગ્રામ મેફેડ્રોન કબજે કર્યું હતું. આ સિવાય અરમાન કોહલીના નિવાસસ્થાનેથી 1.2 ગ્રામ કોકેઈન જપ્ત કરવામાં આવ્યું હતું. કોહલી અને કથિત પેડલરો સહિત અન્ય પાંચની ઓગસ્ટમાં ધરપકડ કરવામાં આવી હતી. એનસીબીએ અરમાનનો ફોન પણ જપ્ત કર્યો હતો, જેમાં તેણે આંતરરાષ્ટ્રીય ડ્રગ કાર્ટેલ સાથે સંબંધિત ફોટોગ્રાફ્સ અને ચેટના રૂપમાં ગુનાહિત પુરાવા મળ્યા હોવાનો દાવો કર્યો હતો.

આ રીતે થઈ હતી ધરપકડ
ગયા વર્ષે 28 ઓગસ્ટના રોજ એનસીબીએ હાજી અલી પાસે દરોડા પાડ્યા હતા. અહીંથી મોટો ડ્રગ પેડલર અજય રાજુ સિંહ ઝડપાયો હતો. તેની પાસેથી 25 ગ્રામ એમ.ડી. જપ્ત કરી હતી. 2018ના એનએનસી મુંબઈ કેસમાં પણ સામેલ હતો, જ્યાં મોટી માત્રામાં ડ્રગ્સ મળી આવ્યું હતું. અજયની ધરપકડ બાદ તેની પૂછપરછ કરવામાં આવી હતી. જાણકારી અનુસાર આ જ પૂછપરછમાં અરમાન કોહલીનું નામ સામે આવ્યું હતું. એનસીબીની તપાસમાં અભિનેતા અરમાન કોહલીના ઘરે દરોડામાં ડ્રગ્સ મળી આવ્યું હતું અને ત્યારબાદ પૂછપરછ બાદ અરમાન કોહલીની ધરપકડ કરવામાં આવી હતી.