ખોટા સિક્કા / ગોધરામાં ગેરી ડિપાર્ટમેન્ટના નામે મોટું કૌભાંડ, 7 શહેરની ઓફિસોનો પર્દાફાશ, જાણો મામલો

• ગોંધરામાંથી મોટું કૌભાંડ ઝડપાયું
• બોગસ ક્વોલિટી સર્ટીફિકેટનું કૌભાંડ ઝડપાયું
• ગેરી ડિપાર્ટમેન્ટના બનાવતા સર્ટીફિકેટ 

ગુજરાતમાં હજુ પણ બોગસ સર્ટિફિકેટ બનાવવાનો કાળો કારોબાર ધમધમી રહ્યો છે. પહેલા કોરોનાના સર્ટિ બાદ ડીગ્રી સર્ટિફિકેટ પર બોગસિયાઓએ હાથ અજમાવ્યો હતો. વિવિધ પરીક્ષાઓની ડુપ્લિકેટ માર્કશીટના કૌભાંડ પણ અનેક વખત ઉજાગર થઈ ગયું છે. ત્યારે હવે પંચમહાલના ગોધરામાં બોગસ સર્ટીફિકેટનું મોટું કૌભાંડ ઝડપાયું છે.

અનેક ઓફિસોમાંથી બોગસ સિક્કા મળી આવ્યા
પંચમહાલમાં ગુજરાત ઈજનેરી સંસ્થાના નામે બોગસ સર્ટીફિકેટ બનાવવાનો પર્દાફાશ થતાં ચકચાર મચી છે. ડુપ્લીકેટ સિક્કા અને લેટરપેડ બનાવીને આરોપીઑએ કૌભાંડનો અંજામ આપ્યો છે. સરકારી ક્વોલિટી જેવા હૂબહૂ સર્ટિ આપી છેતરામણીનો આ ખેલ ઉઘાડો પડી ગયો છે. વડોદરા, ગોધરા, કચ્છ અને સુરતની ઓફિસમાં સંસ્થા 'ગેરી'ના સિક્કા બનાવવામાં આવ્યા હતા.તે પાલનપુર, બોટાદ, કચ્છ અને ભચાઉની ઓફીસના બોગસ સિક્કા મળ્યા હોવાની માહિતી પ્રાપ્ત થઈ રહી છે. 

2,621 જેટલા દસ્તાવેજો કબજે
કોન્ટ્રાક્ટરે જાતે જ ગેરી ડિપાર્ટમેન્ટના ક્વોલિટી સર્ટીફિકેટ બનાવ્યા હતા. મહત્વનું છે કે ક્વોલિટી સર્ટીફિકેટ હોય તો જ કોન્ટ્રાક્ટરોના બિલોને મંજૂરી મળે છે. આર્થિક લાભ લેવા માટે  બોગસ સિક્કા બનાવી આ કૌભાંડ આચર્યું છે. તપાસમાં  સિક્કા, લેટરપેડ, લેપટોપ સહિત 2,621 જેટલા દસ્તાવેજો મળી આવ્યા છે. આરોપીઓએ કોણે કોણે આવા ક્વોલિટી સર્ટીફિકેટ આપી કામની ગુણવત્તાની કામગીરીમાં ગફલાબાજી કરી છે તેની તપાસ પણ થઈ શકે છે. આરોપીની ધરપકડ કરી વધુ પૂછપરછ હાથ ધરી છે. 

ગુજરાત ઇજનેરી સંશોધન સંસ્થાનો હેતુ?
ગેરી’ના ટૂંકા નામે ઓળખાતી સિવિલ ઇજનેરી એટલે કે બાંધકામશાસ્ત્ર ક્ષેત્રે સંશોધન અને વિકાસનું કામ કરતી રાજ્ય સરકારની એકમાત્ર સંસ્થા છે. આ સંસ્થાની મુખ્ય કચેરી વડોદરામાં આવેલી છે. 1960ની સાલમાં ઇજનેરી સંશોધન સંસ્થા તરીકેનો દરજ્જો હાંસલ કર્યો છે. રાજ્ય સરકારના નર્મદા અને જળસંપત્તિ, માર્ગ અને મકાન, જાહેર આરોગ્ય ને બંદર જેવા વિભાગો તેમજ રાજ્યના વિવિધ નિગમો, બોર્ડો, કૉર્પોરેશનો વગેરેમાં ઉદભવતા સિવિલ ઇજનેરીના વિષયના પ્રશ્નોના નિરાકરણ માટે સંશોધન, અન્વેષણ, પરીક્ષણ જેવા કામો તેના દાયરામાં આવે છે. કોન્ટ્રાક્ટરો પાસે ક્વોલિટી સર્ટીફિકેટ હોય તો જ તેમણે કરેલા કામોના બિલોને મંજૂરી મળે છે.