બોડેલી-વડોદરા હાઇવે બંધ કરી દેવામાં આવ્યો, અન્ય નાના મોટા 12 જેટલા રસ્તાઓ પણ પાણી ભરાઈ જતા બંધ કરવાની નોબત આવી
છોટાઉદેપુરમાં ભારે વરસાદ
વરસાદથી નદી-નાળા છલકાયા
અનેક કોઝવે પાણીમાં ગરકાવ
છોટાઉદેપુર જિલ્લામાં પણ ભારે વરસાદ પડતા નદી-નાળા છલકાયા છે. છોટાઉદેપુર-બોડેલીના નિચાણવાળા વિસ્તારોમાં પાણી ભરાતા લોકો મુશ્કેલીમાં મુકાયા છે. જિલ્લાના બોડેલીમાં 14 ઈંચ પડતાં જ્યાં જુઓ ત્યાં પાણી જ પાણી નજરે ચડી રહ્યું છે. નદી ગાંડી થઈ તેના પ્રવાહમાં જે પણ આવે તેનો સર્વનાશ કરી રહી છે.પાવી જેતપુરમાં 11 ઈંચ, છોટાઉદેપુરમાં 10 ઇંચ તેમજ કવાંટમાં 8 ઇંચ જેટલો તેમજ જીલ્લાના અન્ય તાલુકાઓમાં સરેરાશ 4-4 ઈંચ વરસાદ ખાબક્યો છે. ભારે વરસાદના લીધે કોઝવે ધોવાઈ ગયા છે. રેલવ લાઇન ટ્રેક પર પાણી ફરી વળતાં પ્રતાપનગર-છોટાઉદેપુર પેસેન્જર ટ્રેન રદ કરી નાખવામાં આવી છે.
NDRF અને સ્થાનિક પોલીસનું રેસ્ક્યૂ
ધોધમાર વરસાદને પગલે નીચાણવાળા અને નદી આસપાસના વિસ્તારોમાં અણધારી આફતની નોબત આવી છે.NDRFની ટીમ સાથે સ્થાનિક પોલીસ પણ બચાવ કામગીરીમાં જોડાઈ હતી. ક્વાંટ તાલુકામાં ગ્રામ્ય વિસ્તારના અનેક કોઝવે પર પાણી ફરી વળ્યા છે. સાંકળથી ખડીબારા જતા કોઝવેનું ધોવાણ થતા ખડીબારા જવાનો એકમાત્ર રસ્તો પણ બંધ થતા લોકોને ભારે હાલાકીનો સામનો કરવો પડી રહ્યો છે. માર્ગ અને મકાન વિભાગ અને રામી ડેમ વિભાગમાં સંકલનનો અભાવથી વર્ષોથી લો લેવલનો કોઝવે ન બનતા લોકો પરેશાન થઈ રહ્યા છે. તો બોડેલીના રામનગર અને રંજનગર સોસાયટીમાં ઘુંટણસમા પાણી ભરાતા તંત્રની પ્રિ મોન્સૂન કામગીરીની પોલ ખુલી ગઈ હતી. ક્વાંટ તાલુકમાં ભારે વરસાદને લઈ નદી નાળા છલકાતા જાંબા ગામમાં ઘરોમાં પાણી ઘુસ્યા હતા.. ગ્રામજનોને કોતર વિસ્તારમાં ન જવા સૂચના અપાઈ છે. નસવાડીમાં વરસાદને લઈ બ્રિજનો એપ્રોચ રોડ તૂટતા મુસાફરો માટે એપ્રોચ રોડ બંધ કરાયો હતો.
તાપીની ઓલણ નદીમાં પૂર
તો આ તરફ તાપીના ડોલવણમાં ધોધમાર વરસાદથી ઓલણ નદીમાં પુરની સ્થિતિ સર્જાઇ.. ઓલણ નદીમાં પાણીના ધસમસતા પાણીથી પુલ ધોવાયો.. પંચોલ અને કુંભિયા ગામને જોડતો પુલ ધોવાતા લોકોને મુશ્કેલી પડી રહી છે.. ઘટનાની જાણ થતા માર્ગ મકાન વિભાગન કરવામાં આવતા માર્ગ મકાન વિભાગની ટીમ કામે લાગી.. પુલ ધોવાઈ જતા વાહન ચાલકોની મુશ્કેલીનો સામનો કરવો પડી રહ્યો છે.