અમેરિકાના પૂર્વ રાષ્ટ્રપતિ ડોનાલ્ડ ટ્રમ્પે રશિયા અને યુક્રેન મામલે પોતાના દેશ અમેરિકાની પોલ ખોલી નાખી છે. યુક્રેન મામલે અમેરિકાએ જેવી જોઈએ તેવી કાર્યવાહી કરી નથી અને રશિયા સામે કોઈ મોટું એક્શન લેતા પણ ડરી રહ્યું હોવાનું લાગી રહ્યું છે હવે આ મામલે પૂર્વ પ્રમુખ ડોનાલ્ડ ટ્રમ્પે બાયડન સરકારની આકરી ટીકા કરતા જે નિવેદનો આપ્યાં તે ભારે ચર્ચાસ્પદ બન્યા છે. પોતાની પાર્ટીની બેઠકમાં ટ્રમ્પે જે કહ્યું તેની ખૂબ ચર્ચા થઈ રહી છે. ડોનાલ્ડ ટ્રમ્પે બાયડન સરકારને એવું સૂચન કર્યું છે કે અમેરિકાએ તેના એફ-22 લડાકૂ વિમાનો પર ચીની ઝંડા લગાડીને રશિયા પર બોંબ ફેંકી દેવો જોઈએ.
રિપબ્લિકન નેશનલ કમિટીના સંમેલનમાં ટ્રમ્પે કહ્યું કે અમેરિકાએ તેના એફ-22 લડાકૂ વિમાનો પર ચીની ઝંડા લગાડીને રશિયાને બોંબથી ઉડાવી મુકવું જોઈએ અને પછી આપણે એવું કહી શકીએ કે આ હુમલો ચીને કર્યો છે. પછી ભલે તેઓ એકબીજા લડતા રહે અને આપણે શાંતિથી બેસીને જોતા રહીએ.
રાષ્ટ્રપતિ બાયડન અને નાટો મૂર્ખાની જેમ કામ કરી રહ્યાં છે
ટ્રમ્પે કહ્યું કે રાષ્ટ્રપતિ બાયડન અને નાટો મૂર્ખાની જેમ કામ કરી રહ્યાં છે. ટ્રમ્પના આ નિવેદન બાદ બેઠકમાં હાસ્યનું મૌજું ફેલાયું હતું અને હાજર રહેલા તમામ લોકો ખડખડાટ હસી પડ્યાં હતા.
નાટો કાગળનો વાઘ-ટ્રમ્પ
ડોનાલ્ડ ટ્રમ્પે નાટોને કાગળનો વાઘ ગણાવતા કહ્યું કે આખરે કયા આધારે આ દેશ કહે છે કે અમે હવે માનવતાની સામે આ મોટા અપરાધને નહીં થવા દઈએ. અમે તેને ન થવા દઈએ અને તેને ચાલુ નહીં રાખવા દઈએ. ટ્રમ્પે કહ્યું કે બાયડને એવું કહેવાનું બંધ કરવું જોઈએ કે અમે રશિયા પર ક્યારેય પણ હુમલો નહીં કરીએ કારણ કે તે એક પરમાણુ શક્તિ છે.
ટ્રમ્પે પુતિનની ઘણી વખત પ્રશંસા કરી
ટ્રમ્પે કહ્યું કે તમે જાણો છો કે આ કોણ કહી રહ્યું છે? સારું, તે હકીકત હોય કે કાલ્પનિક, અમે રશિયા પર હુમલો કરીશું નહીં. તમે જુઓ, તેઓ પરમાણુ શક્તિ છે.' ઓહ અમને જણાવવા બદલ આભાર. ટ્રમ્પે ભૂતકાળમાં વ્લાદિમીર પુતિનની ઘણી પ્રશંસા કરી છે. ટ્રમ્પે એવો પણ દાવો કર્યો હતો કે રશિયન નેતા પુતિન બિડેન ડ્રમની જેમ વગાડી રહ્યા છે. પુતિન સ્માર્ટ છે, અલબત્ત તે સ્માર્ટ છે, પરંતુ ખરી સમસ્યા એ છે કે આપણા નેતાઓ મૂર્ખ છે. મૂર્ખ. ખૂબ જ મૂર્ખ.
અમેરિકા અને નાટો યુક્રેનને મદદ ન કરી રહ્યું હોવાનો આરોપ
ઉલ્લેખનીય છે કે યુક્રેન મામલે અમેરિકા અને નાટો દેશની વિશ્વભરમાં આલોચના થઈ રહી છે. અમેરિકા અને નાટો યુક્રેનને મદદ કરવાને બદલે દૂર બેસીને જોઈ રહ્યાં છે અને ફાલતું નિવેદનો આપી રહ્યાં છે. તેઓ બન્ને રશિયાની સામે કોઈ મોટી કાર્યવાહી કરતા અચકાઈ રહ્યાં છે.