અમેરિકી બજારમાં ઘટાડાની અસર સતત ત્રીજા દિવસે ભારતીય શેર બજારોમાં જોવા મળી રહી છે. સેન્સેક્સ 1000 પોઇન્ટથી વધુ તૂટ્યો
ચાલુ સપ્તાહના અંતે ભારતીય શેર બજાર ડૂબ્યું
અમેરિકી બજારમાં ઘટાડાની અસર સતત ત્રીજા દિવસે દેખાણી
આજે માર્કેટમાં સેન્સેક્સ 1000 પોઇન્ટથી વધુ તૂટ્યો હતો
ચાલુ સપ્તાહ ભારતીય શેરબજાર માટે માઠું રહ્યું છે. અમેરિકી બજારમાં ઘટાડાની અસર સતત ત્રીજા દિવસે ભારતીય શેર બજારોમાં જોવા મળી રહી છે. શુક્રવારે બજારમાં હાહાકાર મચી ગયો હતો. બપોર સુધીમાં બજારમાં ઘટાડો વધુ ઘેરો બન્યો હતો અને સેન્સેક્સ 1000 પોઇન્ટથી વધુ તૂટ્યો હતો. સાથે જ નિફ્ટી પણ 17600ના મહત્વના સ્તરને તોડીને નીચે આવ્યું હતું.
અમેરિકાની મંદીએ ભારતીય બજારમાં ફફડાટ મચાવ્યો
જાણકારોના જણાવ્યા પ્રમાણે ભારતીય બજારમાં હમણાંના છેલ્લા ઘટાડા પાછળ યુએસ ફેડની કડકાઇને લઇને આશંકાઓ વધુ ઘેરી બની રહી છે. વિશ્લેષકોના જણાવ્યા પ્રમાણે દુનિયાભરના બજારો મંદીના મારથી પીડાઈ રહ્યા છે, તેની અસર દલાલ સ્ટ્રીટ પર પણ દેખાઈ રહી છે. આ ઉપરાંત રેટિંગ એજન્સી ફિચે આ સપ્તાહની શરૂઆતમાં વૈશ્વિક આર્થિક તણાવ, વધતી મોંઘવારી અને આરબીઆઈની નાણાકીય નીતિને કડક બનાવવાને કારણે ચાલુ નાણાકીય વર્ષ માટે ભારતના જીડીપી વૃદ્ધિ દરનું અનુમાન 7.8 ટકાથી ઘટાડીને 7 ટકા કરી દીધું હતું.
વૈશ્વિક ચિંતાઓની ભારતમાં અસર
નિષ્ણાતોના મતે મજબૂત સ્થાનિક આર્થિક વૃદ્ધિની આશાએ ભારતીય શેરબજારોએ અત્યાર સુધીમાં અન્ય હરીફ દેશોને પાછળ રાખી દીધા હતા, પરંતુ લાંબા સમયથી વૈશ્વિક વલણથી અલગ રહેવું મુશ્કેલ છે. ભારતીય ઇક્વિટી બજારોમાં ફરી એકવાર વેચવાલીનું દબાણ જોવા મળી રહ્યું છે. ડોલર ઇન્ડેક્સમાં તીવ્ર ઉછાળાને કારણે ભારત સહિત અન્ય વૈશ્વિક કરન્સી નબળી પડી રહી છે.
FIIની ભારે વેચવાલી
બજારમાં ઘટાડાનું એક મોટું કારણ વિદેશી રોકાણકારોની વેચવાલી છે. FII એ પણ તેમની સતત ખરીદી બંધ કરી દીધી છે અને ફરી એકવાર એફઆઈઆઈએ વેચવાલી શરૂ કરી દીધી છે. સાત દિવસથી ચાલી રહેલી ખરીદીનો સિલસિલો તોડીને વિદેશી રોકાણકારોએ ગુરુવારે ભારતીય ઇક્વિટીઝમાં 17.3 કરોડથી વધુની કિંમતના શેર વેચ્યા હતા.
આ કંપનીઓના શેરમાં વેચવાલી
સેન્સેક્સ પેકમાં ટોપ લૂઝર્સમાં ટેક મહિન્દ્રા, ઇન્ફોસિસ, ટાટા સ્ટીલ, બજાજ ફિનસર્વ અને એક્સિસ બેન્કનો સમાવેશ થાય છે. તો બીજી બાજુ ઈન્ડસઈન્ડ અને સન ફાર્મા ફાયદામાં સામેલ છે. એશિયાના અન્ય સ્થળોએ, જાપાનનો નિક્કી, હોંગકોંગનો હેંગ સેંગ ગઈકાલે વધારા સાથે બંધ થયો હતો, જ્યારે ચીનનો શાંઘાઈ કમ્પોઝિટ અને દક્ષિણ કોરિયાનો કોસ્પી લાલ નિશાનમાં બંધ થયો હતો. સાથે જ બુધવારે અમેરિકી શેર બજાર મજબૂતીથી બંધ થયું. જિયોજિત ફાઇનાન્શિયલ સર્વિસિસના હેડ ઓફ રિસર્ચ વિનોદ નાયરે જણાવ્યું હતું કે, "આઇટી અને ફાર્મા શેરોમાં વેચવાલીને કારણે વૈશ્વિક બજારોમાં સકારાત્મક વલણને બાજુએ રાખીને સ્થાનિક બજારોએ તેમની પ્રારંભિક તેજીને વેડફી નાખી હતી. સાથે જ મિડકેપ અને સ્મોલકેપે સારું પ્રદર્શન કર્યું હતું. આ દરમિયાન આંતરરાષ્ટ્રીય બેન્ચમાર્ક બ્રેન્ટ ક્રૂડ 0.04 ટકાના ઘટાડા સાથે 94.06 ડોલર પ્રતિ બેરલ પર ટ્રેડ કરી રહ્યું છે. એક્સ્ચેન્જના આંકડા મુજબ વિદેશી સંસ્થાકીય રોકાણકારોએ બુધવારે રૂ.1,397.51 કરોડના શેર વેચ્યા હતા.