આતંકી ઘટના / 'સામાન્ય નહી આ એક આતંકવાદી ઘટના', મેંગલુરુમાં ઓટો રિક્ષા બ્લાસ્ટ પર કર્ણાટક DGPનું મોટું નિવેદન

• કર્ણાટકના મેંગલુરુમાં એક ઓટો રિક્ષામાં બ્લાસ્ટની ઘટના
• આ ઘટના સામાન્ય નહી પરંતુ આતંકવાદી કાવતરું હતું
• કર્ણાટકના ડીજીપી કુમારે ટ્વીટ કરીને જાણકારી આપી હતી

કર્ણાટકના મેંગલુરુમાં એક ઓટો રિક્ષામાં બ્લાસ્ટની ઘટનાને લઈને મોટી માહિતી સામે આવી છે. આ ઘટના આકસ્મિક ન હોવાનું જાણવા મળ્યું છે. આ કોઈ સામાન્ય આકસ્મિક બ્લાસ્ટ નહી તેના બદલે તે એક આતંકવાદી ઘટના હતી. એક ટ્વિટમાં, કર્ણાટક ડીજીપીએ કહ્યું કે તે પુષ્ટિ થઈ છે કે આ ઘટના કોઈ રેન્ડમ ઘટના નથી પરંતુ ગંભીર નુકસાન પહોંચાડવાના ઈરાદા સાથે આતંકવાદનું કૃત્ય હતું. તેમણે વધુમાં કહ્યું કે રાજ્ય પોલીસ કેન્દ્રીય એજન્સીઓ સાથે સંકલનમાં રહીને તેની સંપૂર્ણ તપાસ કરી રહી છે.

શનિવારે બન્યો હતો બનાવ
આ ઘટના શનિવારે સાંજે 5.15 વાગ્યે બની હતી જ્યારે કર્ણાટકના મુખ્ય શહેરોમાંથી એક મેંગલુરુમાં એક ઓટો રિક્ષામાં વિસ્ફોટ થયો હતો અને તેમાં આગ લાગી હતી. આ ઘટનામાં ડ્રાઈવર અને એક મુસાફરને ઈજા થઈ હતી. ઘટનાના સીસીટીવી ફૂટેજ પણ સામે આવ્યા હતા, જેમાં વિસ્ફોટ કેદ થયો હતો. વિસ્ફોટ બાદ ઓટોરિક્ષામાંથી ધુમાડાના ગોટેગોટા ઉડતા જોઈ શકાય છે. કેસમાં પહેલા ડ્રાઈવરે પોલીસને જણાવ્યું કે અચાનક આગ લાગી હતી.

It’s confirmed now. The blast is not accidental but an ACT OF TERROR with intention to cause serious damage. Karnataka State Police is probing deep into it along with central agencies. https://t.co/lmalCyq5F3

— DGP KARNATAKA (@DgpKarnataka) November 20, 2022

કર્ણાટકના ડીજીપીએ આપી જાણકારી
ઘટના બાદ ફોરેન્સિક ટીમ પણ સેમ્પલ લેવા માટે ઘટના સ્થળે પહોંચી હતી. જે બાદ કર્ણાટકના ડીજીપી એન શશિ કુમારે ટ્વીટ કરીને જાણકારી આપી હતી કે આ ઘટના આકસ્મિક નથી પરંતુ એક આતંકવાદી ઘટના છે, જે વિસ્તારમાં કોઈ મોટી ઘટનાને અંજામ આપવા માટે કરવામાં આવી હતી. ઘટનાની ઝીણવટભરી તપાસ કરવામાં આવી રહી છે. આ મામલે કેન્દ્રીય એજન્સીઓની પણ મદદ લેવામાં આવી રહી છે.

આ પહેલા પણ એક બનાવ સામે આવ્યો હતો
ઉલ્લેખનીય છે કે અગાઉ 2020માં મેંગલુરુ ઈન્ટરનેશનલ એરપોર્ટ પર ત્યારે ઉત્સુકતા સર્જાઈ હતી જ્યારે બોમ્બ ડિસ્પોઝલ સ્કવોડે અહીંથી એક વિસ્ફોટક ઉપકરણ કબજે કર્યું હતું. કેન્દ્રીય ઔદ્યોગિક સુરક્ષા દળ (CISF) ને એક ત્યજી દેવાયેલી બેગ મળી હતી. બાદમાં આ ઘટનામાં એક વ્યક્તિએ આત્મસમર્પણ કર્યું હતું.