સુરત / રસ્તા વચ્ચે ગળા પર બ્લેડ મારી સુરતના યુવકનો આપઘાતનો પ્રયાસ, લોહીલુહાણ હાલતમાં હોસ્પિટલ ખસેડાયો

• ગળાના ભાગે બ્લેડ મારી આપઘાતનો પ્રયાસ 
• લોહીલુહાણ હાલતમાં યુવકને હોસ્પિટલ ખસેડાયો 
• લોકોએ દોરી વડે હાથપગ બાંધી યુવકને રોક્યો 

ડાયમંડ સીટી સુરતમાં એક વીચીત્ર બનાવ સામે આવ્યો છે. શહેરના પાંડેસરા વિસ્તારમાં એક યુવકે જાહેરમાં આપઘાતનો પ્રયાસ કર્યો છે. જેમા તેણે પોતાના ગળાના ભાગે બ્લેડ ફેરવી દીધી જેના કારણે સ્થળ પર તે લોહીલુહાણ થઈ ગયો છે. જોકે ટ્રાફિક પોલીસની નજર તે યુવક પર પડતા તેને રોકી લેવામાં આવ્યો અને તેનો જીવ બચી ગયો. 

લોકોએ ટ્રાફિક પોલીસને જાણ કરી 

આસપાસના લોકોએ તુરંત આ મામલે 108ને ફોન કર્યો હતો. જેથી એમ્બ્યુલન્સ સમયસર આવી અને યુવકનો જીવ બચી ગયો. ટ્રાફિક પોલીસના કહેવા પ્રમાણે તેઓ જ્યારે ફરજ બજાવી રહ્યા હતા તે સમયે એક યુવક તેમની પાસે આવ્યો અને કહ્યું કે એક યુવક રોડ પર આત્મહત્યાનો પ્રયાસ કરી રહ્યો છે. 

ગળાના ભાગે વારંવાર બ્લેડ મારતો હતો 

ટ્રાફિક પોલીસને આ મામલે માહિતી મળતા તેઓ તુરંત યુવક પાસે પહોચ્યા હતા. જ્યા તેમણે જોયું કે યુવક વારંવાર તેના ગળાના ભાગે બ્લેડ મારી રહ્યો હતો. સાથેજ ત્યા ઉભેલી ભીડ પણ તેની પાસે જતા ડરી રહી હતી. જોકે લોકોએ હિંમત કરીને યુવકના હાથ પગ પકડ્યા અને તેને ગળા પર બ્લેડ મારતા રોક્યો હતો. 

દોરી વડે હાથપગ બાંધવા પડ્યા 

જોકે તેના હાથ પગ છોડતા તે પરત પોતાની જાતને મારવાનો પ્રયાસ કરી રહ્યો હતો. જેથી લોકોએ દોરી વડે તેના હાથપગ બાંધી દીધા હતા. બાદમાં લોકોએ 108 મારફતે તે યુવકને હોસ્પિટલમાં સારવાર અર્થે ખસેડ્યો હતો. 

ઓપરેશન કરીને સારવાર આપવામાં આવશે 

ઉલ્લેખનીય છે કે યુવકે આત્મહત્યાનો પ્રયાસ શા માટે કર્યો તે કારણ હજુ સુધી સામે નથી આવ્યું. પરંતુ હોસ્પિટલના ડૉક્ટરોનું કહેવું છે કે યુવક માનસીક રીતે બિમાર છે. સાથેજ ડૉક્ટરોએ એવું પણ કીધું હતું કે ગળા પર યુવકે ઉંડા ઘા કર્યા છે. જેથી તેનું ઓપરેશન કરીને તેને સારવાર આપવી જરૂરી છે.