પતિએ લગ્ન ન કરતા પ્રેમિકાની આત્મા હેરાન કરતી હોવાના વહેમમાં પરિવારે કર્યો સામૂહિક આપઘાત

કૃણાલ ત્રિવેદીના પત્નીની પણ સુસાઈડ નોટ આવી સામે...
નરોડામાં બ્લેક મેજીકના કારણે સામૂહિક આપઘાત મામલે હવે નવો વળાંક આવ્યો છે. કૃણાલ ત્રિવેદીની સુસાઈડ નોટ બાદ હવે તેમના પત્નીની પણ સુસાઈડ નોટ આવી સામે છે. કૃણાલ ત્રિવેદીના પત્નીની સુસાઈડ નોટમાં બ્લેક મેજીકના કારણે તે લોકો પરેશાન થતાં હોવાનો ઉલ્લેખ કરવામાં આવ્યો છે.

સાથે જ એવો પણ ઉલ્લેખ કરાયો છે કે પતિને અન્ય સ્ત્રી સાથે લગ્ન કરવાનું બ્લેક મેજીક દ્વારા દબાણ કરવામાં આવતું હતું. જોકે પતિએ લગ્ન ન કરતાં અન્ય સ્ત્રીએ આપઘાત કર્યા હતો. ત્યાર બાદ તે સ્ત્રીની આત્મા પરેશાન કરતી હોવાનો ઉલ્લેખ કરવામાં આવ્યો છે.

પત્નીની આપવીતી... લખી સુસાઇડ નોટઃ
મા-બાપુને પ્રમાણ... મા-બાપુ આજ સુધીની તકલીફ માટે મને માફ કરજો. મા અમે મકાન એક કરોડમાં વેચી દીધું છે..... કારણ કે આ જીવન જીવવામાં તમામ મુશ્કેલીનું કારણ એ જ રહ્યા હતા. કારણ કે કોઈ યુવતી કૃણાલને પ્રેમ કરતી હતી. પરંતુ કૃણાલ સાથે તેના લગ્ન ન થઈ શક્યા. અને બાદમાં યુવતીને આત્મહત્યા કરી લીધી. તેના કારણે જ આ બધી મુશ્કેલી આવી રહી છે. એ કૃણાલને લઈ જવા માટે વારંવાર રટણ કરતી હતી. અને કંઈક ખોટું કરાવવાના જાપ કરાવતી હતી. તેનાથી મુશ્કેલીઓ વધતી જ જઈ રહી હતી. હવે સહન નથી થતું.

કારણ કે તે શ્રીન પર પણ હુમલો કરવા લાગી હતી. ના એ મારવા માગતી હતી કે ન જીવવા દેવા માગતી હતી. માટે ઘણું વિચાર્યા બાદ આ પગલું ભરી રહી છું. ક્યારેક તમે વિચારજો કે શું કોઈ વ્યક્તિને આટલી તકલીફ થઈ શકે છે. દરેક બે ચાર દિવસમાં નવી વાત સાંભળવા મળતી હતી. એ અમને શાંતિથી જીવવા નહોતી દેતી. દુનિયા આ વાતને નહીં સમજે પણ અમને પાગલ કહેશે. માટે અમે બધા સાથે જઈ રહ્યા છીએ. કૃણાલની તરફથી કોઈ જોરજબરદસ્તી નથી. મેં ઘણું વિચાર્યા બાદ જ આ નિર્ણય લીધો છે. કારણ કે કૃણાલ વિના જીવવું ઘણું મુશ્કેલ છે. આ દુનિયા મને અને મારી દીકરીને જીવવા નહીં દે. હું ઉતાવળમાં છું મારી ભૂલોને માફ કરી દેજો.