Vtv Exclusive / કચ્છમાં મીઠુંનાં માફિયાઓનો VTVએ કર્યો પર્દાફાશ : કલેકટર કેમ મૌન? PGVCL-વન વિભાગ પણ શંકાનાં દાયરામાં

• કચ્છમાં સફેદ મીઠાનો કાળો કારોબાર
• મીઠાના કાળા કારોબાર માટે જવાબદાર કોણ ?
• અંદાજે 5 લાખ એકર જમીનમાં દબાણ
• મીઠાના કાળા કારોબારીઓ સામે પગલા ક્યારે ?
• કલેક્ટરની કોઇ કાર્યવાહી કેમ નહીં?

કચ્છમાં કાળો કારોબાર

કચ્છમાં સફેદ મીઠાનો કાળો કારોબાર ધમધમી રહ્યો છે, છેલ્લા બે દિવસથી VTV NEWS દ્વારા સમગ્ર કૌભાંડનો પર્દાફાશ કરવામાં આવી રહ્યો છે. કચ્છમાં ઘુડખરનું અભ્યારણ આવેલું છે, ત્યારે કચ્છના કાળા કૌભાંડીઓએ ઘુડખરનું અભ્યારણને પણ છોડ્યું નથી, મીઠાના કાળા કારોબારને લીધે સેંકડો એકર જમીન બંજર બની રહી છે, તેમજ ઉપજાઉ જમીનને પણ મીઠાની ખારાશ લાગી ગઈ છે, ત્યારે સમગ્ર અહેવાલ બાદ પણ તંત્રના પેટનું પાણી હલતું નથી. આ કારોબારમાં અધિકારીઓ અને નેતાઓની સીધી સંડોવણી હોવાથી અધિકારીઓ પણ મૌન સેવી રહ્યા છે. મહત્વનું છે કે પીજીવીસીએલના અધિકારીઓ પણ લાખો રૂપિયા લઈને ગેરકાયદે ચાલતા અગરોમાં વીજ કનેક્શનનું જોડાણ કરી આપવામાં આવ્યું છે, તેમજ વન વિભાગે પણ અભ્યારણની જમીન પર અગરો આપી દીધી હોવાનું પણ મનાઈ રહ્યું છે. અધિકારીઓને અનેકવાર રજૂઆત કરી હોવા છતા અમારી કોઈ જ વાત સાભંળતા નથી તેવો સ્થાનિકો આક્ષેપ કરી રહ્યા છે.

પ્રજાના હિતને બદલે અધિકારીઓ કેમ કરી રહ્યા છે માફિયાનો સપોર્ટ ?

મીઠા ઉત્પાદન માટે મંજુર થયેલી જમીનની આસપાસના વિસ્તરની જમીનમાં પણ ગેરકાયદેસર દબાણ કરવામાં આવે છે, મીઠાના અગરો માટે 100 એકર જમીન મંજુર થયેલી હોય તો આસપાસની 25 હજાર એકર જેટલી જમીનો પર દબાણ કરાય છે, એટલું જ નહી કચ્છમાં કંડલા પોર્ટ, વન વિભાગ તેમજ રેવેન્યુની જમીનો પર ગેરકાયદેસર દબાણ કરી મીઠું પકવવામાં આવે છે. વન વિભાગ, રેવેન્યુ,પોલીસ તેમજ GEB સહિત સરકારી વિભાગોની મિલીભગતથી આ કાળો કારોબાર ધમધમી રહ્યા છે. પલાસવા, ફૂલપરા, ભીમાધોકા વિસ્તારમાં મીઠા માફિયાઓ દ્વારા દબાણ કરાયું છે. સરકારી વિભાગની પરવાનગી લીધા વગર અભિયારણ વિસ્તારમાં ચાલી રહ્યા છે પણ મીઠાના અગરો ચલાવવામાં આવી રહ્યા છે ત્યારે તંત્ર મૌન સેવી રહ્યું છે જે અનેક શંકા ઉપજાવે છે. જેને લઈ અનેક સવાલો થઈ રહ્યા છે પ્રજાના હિતને બદલે અધિકારીઓ કેમ કરી રહ્યા છે માફિયાનો સપોર્ટ ? મીઠા માફિયાનો પર્દાફાશ પછી પણ કચ્છ કલેક્ટરનું નથી હલતું પાણી ? મીઠા મફિયા સામે મૌન રહેવા માટે શું કલેક્ટર સામે છે રાજકીય દબાણ ? VTV ન્યૂઝના પર્દાફાશ પછી પણ શા માટે ઉચ્ચ અધિકારીઓ ડરી રહ્યા છે ? શા માટે અધિકારીઓ મીઠા માફિયા સામે એકશન નથી લઇ રહ્યા ? મીઠા માફિયાની જોહુકમી સામે કેમ કલેક્ટર મૌન સેવી રહ્યા છે ?

કલેકટરનું ભેદી મૌન

કચ્છમાં મીઠાના કાળા કારોબારનો અંગે VTV ન્યૂઝે પર્દાફાશ કર્યો છે અને મીઠા માફિયા બેનકાબ થયા છે છતા પણ કચ્છ કલેક્ટરનું ભેદી મૌન જોવા મળી રહ્યું છે. VTVના અહેવાલ પછી પણ કલેકટર દ્વારા કોઇ કાર્યવાહી કરવામાં આવી નથી, ત્યારે કચ્છ કલેકટર મીઠા માફિયાને બચાવી રહ્યા હોવાની પણ શંકા સેવાઈ રહી છે. કલેક્ટરની નજર સામે જ બધું બનતું હોવા છતાં જિલ્લા કલેક્ટર મૌન સેવી રહ્યા છે. એટલું જ નહીં મીઠાના કાળા કારોબારને લીધે અહીં સાગરખેડુઓની સેંકડો એકર જમીને પણ મોટું નુકસાન થઈ રહ્યું છે. મીઠા માફિયાઓએ અભ્યારણથી માંડીને કંડલા પોર્ટની જમીન પણ પચાવી પાડી, મીઠાનો કારોબાર કરતા આ માફિયાઓ સરકારી જમીન ઉપર પણ ગેરકાયદેસર અગરો બનાવી રહ્યા છે, આ કારોબારમાં મોટા નેતાઓ અને અધિકારીઓ જોડાયેલા હોવાથી મીઠાના માફીયાઓને ખુલ્લુ મેદાન બની ગયું છે.

લાખો એકર જમીન પર દબાણ

અભ્યારણ સહિત લાખો એકર સરકારી જમીનો પર ગેરકાયદેસર મીઠા માફિયાના દબાણો કરી લેવામાં આવ્યા છે. કચ્છના કડોલ, શિકારપુર, માણાબા, સુરજબારી, હાજીપીર, લાખપર, મોટીચીરઇ, વોંધ, જંગી સહિતના વિસ્તારોમાં લાખો એકરમાં ગેરકાયદેસર દબાણ કરવામાં આવ્યા છે, સાથે જ કચ્છના ભચાઉ – રાપર વિસ્તારમાં 5 લાખ એકરમાં દબાણ કરી ગેરકાયદેસર મીઠું પકવવામાં આવે છે તેમજ ગેરકાયદેસર મીઠું ઉત્પાદન કરી મીઠા માફિયાઓ કરોડોની આવક મેળવી રહ્યા છે.