ભાજપ દ્વારા ગુજરાત ચૂંટણીમાં નરોડા સીટ પરથી પાયલ કુલકર્ણીને ઉમેદવાર તરીકે જાહેર કર્યા છે. ત્યારે કોંગ્રેસ દ્વારા આ ઉમેદવાર પર સવાલ ઉઠાવ્યા છે.
ભાજપ દ્વારા નરોડા સીટ પરથી પાયલ કુલકર્ણીને ટિકિટ આપી
તોફાનોનાં આરોપીની દિકરીને ટિકિટ આપીઃકોંગ્રેસ
પાયલ હોસ્પિટલમાં લોકોની સેવા કરે છે
ગુજરાત ચૂંટણીમાં ભાજપ દ્વારા ઉમેદવારોની પહેલી યાદી જાહેર કરી દીધી છે. ત્યારે પાર્ટી દ્વારા હાલમાં માત્ર 160 જેટલા ઉમેદવારોની યાદી જાહેર કરવામાં આવી છે. જેમાં નરોડા વિધાનસભાની સીટ પર પાયલ કુલકર્ણીને ટિકિટ આપવામાં આવી છે. પાયલ કુલકર્ણી ભાજપના નેતા મનોજ કુલકર્ણીની પુત્રી છે અને ચૂંટણી મેદાનમાં સૌથી યુવા નેતા છે. પરંતું તેમનુ નામ સામે આવતા જ વિવાદ સર્જાયો છે. કોંગ્રેસ આરોપ લગાવી રહી છે કે ભાજપ દ્વારા નરોડા પાટીયા કાંડના તોફાનોનાં આરોપીની પુત્રીને ટિકિટ આપીને શરમજનક નિર્ણય લીધો છે.
શું છે નરોડા પાટિયા કાંડ?
તમને જણાવી દઈએ કે ગુજરાતમાં વર્ષ 2002 માં થયેલ તોફાનો દરમ્યાન અમદાવાદમાં નરોડા વિસ્તારમાં 97 લોકોની હત્યા કરી દેવામાં આવી હતી. આ તોફાનોમાં 33 લોકો ઘાયલ થયા હતા. ત્યારે આ ઘટનાને ગોધરામાં સાબરમતી એક્સપ્રેસ ટ્રેનને આગ લગાવ્યાના એક દિવસ પછી બનવા પામી હતી. ઓગષ્ટ 2009 માં નરોડા પાટિયા કાંડનો કેસ શરૂ થયો. જેમાં 62 આરોપીઓની સામે કેસ નોંધવામાં આવ્યો હતો. જે નામોમાં મનોજ કુલકર્ણીનું નામ હતું. હવે ભાજપ દ્વારા તેની પુત્રીને ટિકિટ આપી ચૂંટણી જંગમાં ઉતાર્યા છે.
હોસ્પિટલમાં લોકોની સેવા કરે છે
કોંગ્રેસે પાયલની ઉમેદવારી પર સવાલ ઉઠાવ્યા છે અને કહ્યું છે કે શું ભાજપને અન્ય કોઈ ઉમેદવાર મળ્યો નથી. ભાજપ લાંબા સમયથી આવું કરી રહ્યું છે. પરંતુ તેમના આ નકલી હિન્દુત્વની પોલ ખુલી ગઈ છે. તેમની જીતવાની કોઈ શક્યતા નથી. હવે પાયલના નામને લઈને વિવાદ છે, પરંતુ પાર્ટીને વિશ્વાસ છે કે તે નરોડા સીટ જીતશે. પાયલ કુલકર્ણી વિશે વાત કરીએ તો તે ખૂબ જ ભણેલી છે. તેઓએ S.S.C St. ઝેવિયર્સ સ્કૂલમાંથી તેઓએ અભ્યાસ પૂર્ણ કર્યો. એ બાદ તેઓએ વર્ષ 2010 માં રુસમાંથી એમડી પૂર્ણ કર્યું. હાલમાં તે અમદાવાદની સ્ટર્લિંગ હોસ્પિટલમાં કામ કરે છે.
પાયલને જીતનો વિશ્વાસ છે
ભાજપ દ્વારા તેઓને ટિકિટ આપવામાં આવી છે. ત્યારે આ બાબતે પાયલ કુલકર્ણીએ કહ્યું છે કે પાર્ટીએ મને ટિકિટ આપી છે તેનાથી હું ખૂબ જ ખુશ છું. મારા પિતાએ 40 વર્ષથી આ પાર્ટીની સેવા કરી છે. મારી માતા પણ કોર્પોરેટર છે. મારું શિક્ષણ પૂરું કર્યા પછી મેં મારી માતાનો ચૂંટણી પ્રચાર કર્યો હતો. મને પૂરો વિશ્વાસ છે કે હું આ ચૂંટણી જીતવાની છું. અને સૌથી વધુ વોટ મેળવીને હું જીત હાસિલ કરીશ. હું માત્ર વિકાસની દિશામાં જ કામ કરવાની છું.