ભાજપ સરકારે આ જૂની પેન્શન યોજનાનો અભ્યાસ કરવા માટે એક સમિતિનું ગઠન કર્યું
સમિતિ દ્વારા 23 તારીખે રાજસ્થાનની મુલાકાત કરાશે
સરકારી કર્મચારીઓ માટેની જૂની પેન્શન યોજનાનો મુદ્દો કેટલા સમયથી ગાજી રહ્યો છે અને લગભગ દરેક ચૂંટણી વખતે આ મુદ્દો મોં ફાડીને ઊભો હોય છે. ત્યારે હવે ભાજપ પણ આ મુદ્દે વિચારવા મજબૂર બન્યું હોય તેમ કર્ણાટકમાં આગામી સમયમાં વિધાનસભાની ચૂંટણી યોજાવા જઈ રહી છે ત્યારે ભાજપ સરકારે આ જૂની પેન્શન યોજનાનો અભ્યાસ કરવા માટે એક સમિતિનું ગઠન કર્યું છે અને આ સમિતિ આ મહિનાની 23 તારીખે રાજસ્થાનની મુલાકાત લઇ રહી છે. મહત્વનું છે કે મુખ્યમંત્રી બસવરાજ બોમાઈ દ્વારા આ સમિતિની રચના કરાઈ છે.
આ સમિતિ દ્વારા સંપૂર્ણ અભ્યાસ કરવામાં આવશે
સતાવાર સૂત્રો પાસેથી જાણવા મળતી વિગતો અનુસાર કર્મચારીઓની જુની પેન્શન યોજનાની માંગને લઈને કર્ણાટક સરકારે એક સમિતિની રચના કરી છે જેનું નેતૃત્વ અધિક મુખ્ય સચિવ દ્વારા કરવામાં આવશે. ઉલ્લેખનીય છે કે વર્ષ 2006 પછી સેવામાં જોડાનાર કર્મચારીઓ માટે પેન્શન યોજના પુનઃ શરૂ કરવામાં આ સમિતિ દ્વારા આ સંપૂર્ણ અભ્યાસ કરવામાં આવશે.
રાજસ્થાન સરકારે એપ્રિલ 2022 માં જૂની પેન્શન લાગુ કરી
આ સમિતિ દ્વારા પાંચ રાજ્યોની મુલાકાત કરવામાં આવશે જેમાં રાજસ્થાનની પ્રથમ મુલાકાત કરવામાં આવે તેવું જાણવા મળી રહ્યું છે રાજસ્થાનની મુલાકાત દરમિયાન મુખ્ય સચિવ ઉર્જા શર્મા, નાણા સચિવ અખીલ અરોરા અને મુખ્યમંત્રીના મુખ્ય સચિવ કુલદીપ રાંકાને મળશે. નોંધનીય છે કે વાસ્તવમાં રાજસ્થાન સરકારે એપ્રિલ 2022 માં જૂની પેન્શન લાગુ કરી દીધી હતી. જેનો 650 પેન્શન મેળવતા કામદારોને લાભ પણ મળ્યો છે.
30 એપ્રિલના રોજ સમગ્ર અહેવાલ કર્ણાટક સરકારને સોંપશે
રાજસ્થાનની મુલાકાત બાદ આ સમિતિના સભ્યો દ્વારા છત્તીસગઢની પણ મુલાકાત કરવામાં આવશે કારણ કે ત્યાં પણ કોંગ્રેસની સરકાર છે અને આ બે રાજ્યોની મુલાકાત બાદ પંજાબ, હિમાચલ પ્રદેશ અને ઝારખંડની મુલાકાત કરવામા આવશે. જે 30 એપ્રિલના રોજ સમગ્ર અહેવાલ કર્ણાટક સરકારને સોંપશે. મહત્વનું છે કે કર્ણાટકમાં પેંશન યોજના ઉપરાંત અનેક માગણીઓ લઈને સરકાર કર્મચારી વિરોધ કરી રહ્યા છે જે ચૂંટણી ટાણે આ પરવડે તેમ ન હોવાથી વિરોધને ડામવા આ પ્રકારની સમિતિની રચના કર્યાનું જણાઈ રહ્યું છે.