VIDEO / GRD ભરતીમાં હજારોની ભીડ: અલ્પેશ ઠાકોરે કહ્યું, કોઈ ગેરમસજ હશે તો ગેનીબેન બોલ્યાં સરકાર હાથ અદ્ધર કરી દે

• પાલનપુરમાં ભરતી માટે હજારોની પડાપડી 
• ભાજપ નેતા અલ્પેશ ઠાકોરે કહ્યું, કોઈ ગેરસમજ થઈ જશે 
• કોંગ્રેસનાં ગેનીબેન ઠાકોરે કહ્યું, હજુ પણ સરકાર ભરતી રદ્દ કરશે

ભીડ બેરોજગારોની 
ગુજરાતમાં કોરોનાકાળ પૂરો થતાં ભરતીઓનો દોર શરૂ થયો છે, સરકાર દ્વારા અલગ અલગ વિભાગોમાં ભરતીઓની જાહેરાત કરવામાં આવી રહી છે ત્યારે હજુ પણ શિક્ષિત બેરોજગારો રાજ્ય માટે ચિંતાનો વિષય છે. સરકાર દ્વારા કરવામાં આવતા મોટા દાવાઓ વચ્ચે આજે પાલનપુરમાં 600 GRD જવાનોની ભરતી માટે હજારોની ભીડ ભેગી થઈ ગઈ હતી. પરિસ્થિતિ કંટ્રોલ બહાર જતાં પોલીસે લાકડીઓ ઉગામવી પડી હતી. એવામાં ભાજપ પર કોંગ્રેસ નેતાઓ પ્રહાર કરી રહ્યા છે. 

કોઈ ગેરમસજ થઈ હશે, બાકી આવું ન બને: અલ્પેશ ઠાકોર 
ભાજપ નેતા અલ્પેશ ઠાકોરે કહ્યું હતું કે સરકાર રોજગારી આપવા માટે કટિબદ્ધ છે પરંતુ કોઈ ગેરસમજનાં કારણે કોઈ અવ્યવસ્થા થઈ હોવાનું લાગી રહ્યું છે. સરકાર આમાં અવ્યવસ્થા સામે પગલાં લેશે. જ્યારે કોંગ્રેસ નેતા ગેનીબેન ઠાકોરે પણ કહ્યું હતું કે લોકો થોડું ઓછું ભણેલા હોય ત્યારે સરકારી નોકરી માટે આ પ્રકારની ગેરસમજ ફેલાતી હોય છે. અપેક્ષા રાખીએ કે જે ઉમેદવારો ત્યાં પહોંચ્યા છે તેમણે સરકાર તરફથી કોઈ મદદ થાય. 

સરકાર નોકરી આપવામાં રહી નિષ્ફળ: ગેનીબેન ઠાકોર 
ગેનીબેને સરકાર પર આરોપ લગાવતા કહ્યું કે ભૂતકાળમાં પહેલા પણ આવી ભરતીઓમાં ગેરરીતિઓ આચરવામાં આવી હતી, 100ની ભરતી હોય તો 40 એક જ કોમ્યુનિટી ઉમેદવારને નોમિનેટ કરી દેવામાં આવતા હતા. ગરીબ પરિવારના છોકરા સાથે અન્યાય કરવામાં આવતો હતો, અપેક્ષા રાખીએ કે બેલેન્સ કરીને તમામ સમાજને આ લાભ આપવામાં આવે. ગેનીબેને કહ્યું કે ભારતીય જનતા પાર્ટીની સરકાર નોકરીઓ આપવામાં નિષ્ફળ ગઈ છે તે આ ભીડ જોઈને જ સ્પષ્ટ થઈ જાય છે. ભરતી માટે સરકાર તરફથી માત્રને માત્ર જાહેરાત કરવામાં આવી છે. હવે તો યુવાનોને પણ એવું થઈ ગયું છે કે ગમે તેટલી મજૂરી કરીએ, ક્યાંક ભરતી કેન્સલ થશે અથવા તો પછી પેપર ફૂટી જાય તેવી સ્થિતિ સર્જાશે. 

2022માં વોટ લેવા હજુ પણ આ ભરતી નહીં કરે, તમે જોઈ લેજો: ગેનીબેન 
ગેનીબેને કહ્યું કે હજુ તો સરકાર 2022 માં વોટ લેવા માટે આ સરકાર હજુ પણ ભરતી નહીં કરે, અને તમામ ભરતીઓમાં ગેરરીતિ કરશે અને હજુ પણ વોટ લેવા માટે તમામ ભરતીઓ કેન્સલ કરી નાંખશે. ગેનીબેને ત્યાં સુધી કહ્યું કે જૉ સરકાર હાથ ઊંચા કરે કહી દે કે અમે વ્યવસ્થા ઊભી કરવામાં નિષ્ફળ ગયા છે તો અમે ફાળો ભેગો કરીને વ્યવસ્થા કરી આપવા તૈયાર છીએ. 

શું છે આખો મામલો? 
બનાસકાંઠામાં GRD ભરતીમાં મોટી સંખ્યામાં ઉમેદવારો ઉમટતા અવ્યવસ્થા સર્જાઈ હતી. પાલનપુર પોલીસ હેડ કવાર્ટર ખાતે GRD ભરતી પ્રક્રિયાનું આયોજન કરવામાં આવ્યુ હતું. 600 ઉમેદવારો માટેની ભરતી પ્રક્રિયામાં હજારોની સંખ્યામાં ઉમેદવારો ઉમટી પડ્યા હતા. જેને લઈને ભારે ધક્કામુક્કી અને અવ્યવસ્થા સર્જાઈ હતી. પરિસ્થિતિને કાબૂમાં લેવા માટે પોલીસે કડક હાથે કામ લેવાની ફરજ પડી હતી. ઉલ્લેખનીય છે કે એકબાજુ સરકાર રોજગારીનું મોટાપાયે સર્જન કર્યુ હોવાની વાતો કરે છે અને બીજી બાજુ ભરતી પ્રક્રિયામાં બેરોજગાર યુવાનોની ઉમટતી ભીડ સરકારના રોજગારી સર્જનના દાવાની પોલ ખોલતી નજરે ચડે છે.