BIG BREAKING / ભાજપ બધે છવાયું પણ કુતિયાણામાં ચાલી સાઇકલ: કોંગ્રેસ-AAP પણ રગદોળાયા

• પોરબંદરની કુતિયાણા બેઠક પર ફરી એકવાર કાંધલ જાડેજા જ કિંગ  
• 2022ની વિધાનસભાની ચૂંટણીમાં પોરબંદરની કુતિયાણા બેઠક પર ચોપાંખિયો જંગ ખેલાયો 
• ભાજપ, કોંગ્રેસ, AAP ઉપરાંત સમાજવાદી પાર્ટીએ પણ પોતાના ઉમેદવારને ચૂંટણીના મેદાનમાં ઉતાર્યા હતા 

પોરબંદરની કુતિયાણા બેઠક પર ફરી એકવાર કાંધલ જાડેજા જ કિંગ સાબિત થયા છે. વર્ષ 2022ની વિધાનસભાની ચૂંટણીમાં પોરબંદરની કુતિયાણા બેઠક પર ચોપાંખિયો જંગ ખેલાયો હતો, કારણ કે આ વખતે અહીં ભાજપ, કોંગ્રેસ, AAP ઉપરાંત સમાજવાદી પાર્ટીએ પણ પોતાના ઉમેદવારને ચૂંટણીના મેદાનમાં ઉતાર્યા હતા અને એ બીજુ કોઈ નહીં પરંતુ કુતિયાણાના બાહુબલી નેતા કાંધલ જાડેજા હતા. આ વખતે ભારતીય જનતા પાર્ટીએ કાંધલ જાડેજાને કુતિયાણાના કિંગ બનતાં રોકવા માટે બાહુબલી પરિવારના પૂત્રવધુને ઢેલીબેન ઓડેદરાને ચૂંટણીના મેદાનમાં ઉતાર્યા હતા. જ્યારે કોંગ્રેસે નાથા ઓડેદરા અને આમ આદમી પાર્ટીએ ભીમા મકવાણાને ટિકિટ આપી હતી. 

1990માં 'ગૉડમધર' સંતોકબેન જાડેજા લડ્યા હતા ચૂંટણી

કુતિયાણાના કુરુક્ષેત્રમાં 32 વર્ષ બાદ પહેલીવાર મહિલા ઉમેદવાર ઉતર્યાં હતા. ઢેલીબેન પહેલાં 1990માં 'ગૉડમધર' સંતોકબેન જાડેજા અપક્ષ ચૂંટણી લડી ધારાસભ્ય બન્યાં હતાં.  સૌરાષ્ટ્રના દબંગ નેતા કાંધલ જાડેજાનો રાજકીય અને કૌટુંબિક ઈતિહાસ મોટો છે. કાંધલ જાડેજાના પિતા સરમણ મુંજા જાડેજા અને તેમના માતા સંતોકબેન જાડેજા પણ સૌરાષ્ટ્ર સહિત ગુજરાતભરમાં ખૂબ મોટી નામના ધરાવે છે. રાણાવાવ-કુતિયાણા બેઠક પર હાલમાં કાંધલ જાડેજા ધારાસભ્ય છે. રાણાવાવ-કુતિયાણા બેઠક પર સંતોકબેન જાડેજા તેમજ તેમના કાકા ભુરા મુંજા જાડેજા પણ ધારાસભ્ય રહી ચુક્યા છે. કાંધલ જાડેજાએ પ્રથમ વખત 2012માં NCP માંથી રાણાવાવ-કુતિયાણા બેઠક પરથી ચૂંટણીના મેદાનમાં ઉતર્યા હતા. કાંધલ જાડેજાએ ત્રણ ટર્મથી જીતતા આવતા ભાજપના ઉમેદવારને 18 હજારથી વધુ મતોથી પરાસ્ત કર્યા હતા.

2017માં કાંધલ જાડેજાએ 11 જેટલા ઉમેદવારોને આપ્યો હતો કારમો પરાજય  

2017 વિધાનસભાની ચૂંટણીમાં કોંગ્રેસ અને એનસપીનું ગઠબંધન નહીં થયું હોવા છતા કાંધલ જાડેજાએ એકલા હાથે ભાજપ-કોંગ્રેસ અને અપક્ષો સહિતના 11 જેટલા ઉમેદવારોને કારમો પરાજય આપ્યો હતો. વર્ષ 2017ની વિધાનસભા ચૂંટણીમાં કુતિયાણા વિધાનસભા બેઠક પરથી NCP નેતા કાંધલ જાડેજાએ ભાજપ નેતા લક્ષ્મણ ઓડેદરાને હરાવ્યા હતા અને જીત મેળવી હતી.