પશ્ચિમ બંગાળમાં દીદીને ઝટકો આપવા અમિત શાહે અપનાવ્યો પ્લાન B

સુપ્રીમ કોર્ટ તરફથી પશ્ચિમ બંગાળમાં ભાજપની રથયાત્રાને રેડ સિગ્નલ મળ્યાં બાદ ભાજપે મમતા દીદીને ઝટકો આપવા પ્લાન 'B' ઘડી કાઢ્યો છે. જે પ્રમાણે ભાજપ આખાં રાજ્યભરમાં જનસભાઓનું આયોજન કરશે. આ નવા પ્લાન પ્રમાણે ભાજપનાં રાષ્ટ્રીય અધ્યક્ષ અમિત શાહ પશ્ચિમ બંગાળમાં 5 જનસભાઓને સંબોધિત કરશે. જેની શરૂઆત 20 જાન્યુઆરીથી થશે.

અમિત શાહ 20 જાન્યુઆરીએ માલ્દા જિલ્લામાં એક જનસભાને સંબોધીત કરશે. તો તેનાં બીજા દિવસે વીરભૂમનાં સૂરીમાં તેમજ ઝારખંડમાં બે જનસભાને સંબોધિત કરશે. 22 જાન્યુઆરીએ અમિત શાહ પરગના જિલ્લાનાં જૉયનગરમાં પાર્ટી કાર્યકર્તાઓ સાથે રૂબરૂ મુલાકાત કરશે. સાથે જ આ દિવસે નાદિયા જિલ્લાનાં કૃષ્ણાનગરમાં પણ એક રેલીને સંબોધિત કરશે.

મહત્વનું છે કે અગાઉ મમતા બેનર્જીએ ભાજપની રથયાત્રાને રોકી હતી પરંતુ ભાજપે હવે પ્લાન-બી વિશે વિચાર્યું છે. ત્યારે જોવાનું એ રહ્યું કે મમતા બેનર્જી ભાજપની ગણતંત્ર સભાઓને કેવી રીતે અટકાવી શકે છે. બીજેપનાં પ્રદેશ અધ્યક્ષ દિલીપ ઘોષે બુધવારનાં રોજ જણાવ્યું કે 'કોર્ટે અમારી યાત્રાનો વિરોધ કર્યો છે જેથી હવે આને 'ગણતંત્ર બચાઓ સભા' કહેવામાં આવશે.

દિલીપ ઘોષનાં અનુસાર પ્રધાનમંત્રી નરેન્દ્ર મોદીને પણ કોલકાત્તામાં જનસભા કરવાનો આગ્રહ કર્યો છે. બીજેપીનાં રાજ્ય એકમોએ પીએમઓને સંવાદમાં 8 ફેબ્રુઆરીનાં રોજ કોલકાત્તામાં થનારી મેગા રેલીને માટે પ્રધાનમંત્રી મોદીનો સમય આપવાનો આગ્રહ કર્યો છે.

સુપ્રિમ કોર્ટે મંગળવારનાં રોજ બંગાળમાં બીજેપીની પ્રસ્તાવિત 'રથયાત્રા'ને પરવાનગી ન હોતી આપી. કોર્ટે કહ્યું હતું કે રાજ્ય સરકાર તરફથી કાયદો અને વ્યવસ્થાની સંભવિત સ્થિતિને લઇને જે આશંકા દર્શાવી હતી તે બેબુનિયાદ ન હોતી.