Election Mode / ગુજરાતમાં મતદાન પૂર્ણ થતાં જ શરૂ થશે ભાજપનું નવું 'મિશન', બે દિવસ સુધી કરાશે આ કામ

• 5 ડિસેમ્બરથી ભાજપની રાષ્ટ્રીય પદાધિકારીઓની બેઠક
• ભાજપ રાષ્ટ્રીય અધ્યક્ષ જે.પી.નડ્ડાની અધ્યક્ષતામાં મળશે બેઠક
• બેઠકમાં તમામ રાષ્ટ્રીય પદાધિકારીઓ લેશે ભાગ
• બેઠકમાં આગામી લોકસભાની ચૂંટણીના રોડ મેપ અંગે થશે ચર્ચા

ગુજરાત વિધાનસભાની ચૂંટણીના બીજા તબક્કાના મતદાનને આડે એક દિવસ બાકી છે. બીજા તબક્કાના ચૂંટણી પ્રચારનો આજે અંતિમ દિવસ છે. આગામી 5મી ડિસેમ્બરે મધ્ય અને ઉત્તર ગુજરાતની 93 બેઠકો પર મતદાન પ્રક્રિયા હાથ ધરવામાં આવશે. તો 8 ડિસેમ્બરે ચૂંટણીના પરિણામો આવશે. આ બધાની વચ્ચે ભાજપે અત્યારથી જ લોકસભાની ચૂંટણીની તૈયારીઓ શરૂ કરી દીધી છે. 

5 અને 6 ડિસેમ્બરે મળશે પદાધિકારીઓની બેઠક
ભારતીય જનતા પાર્ટીના રાષ્ટ્રીય અધ્યક્ષ જે.પી નડ્ડાની અધ્યક્ષતામાં 5 ડિસેમ્બરથી ભાજપની રાષ્ટ્રીય પદાધિકારીઓની બેઠક યોજાશે. રાષ્ટ્રીય પદાધિકારીઓની આ બેઠક 2 દિવસ સુધી ચાલશે. જેમાં તમામ રાજ્યોના પ્રદેશ પ્રમુખ, સંગઠન મહામંત્રીઓ સહિત તમામ રાષ્ટ્રીય પદાધિકારીઓ ભાગ લેશે. આ બેઠકમાં આગામી લોકસભાની ચૂંટણીના રોડ મેપ અંગે ચર્ચા કરવામાં આવશે. 

લોકસભા ચૂંટણીને લઇ ભાજપની તૈયારી શરૂ
ભાજપે લોકસભા ચૂંટણી 2024 માટે કમર કસવાનું શરૂ કરી દીધું છે. લોકસભાની ચૂંટણીને ધ્યાનમાં રાખીને દિલ્હીમાં ભાજપ રાષ્ટ્રીય અધ્યક્ષ જે.પી.નડ્ડાની અધ્યક્ષતામાં પાર્ટીની બે દિવસીય બેઠક મળવાની છે. વડાપ્રધાન મોદી આ બેઠકના સમાપન સત્રને વીડિયો કોન્ફરન્સથી સંબોધિત કરશે.  બેઠકમાં મંડળ, બૂથ સમિતિથી લઈને વિભિન્ન સંગઠનાત્મક પ્રવૃતિઓની સમીક્ષા કરવામાં આવશે.

કેન્દ્રીય મંત્રીઓને આ 144 બેઠકોની સોંપાઈ છે જવાબદારી
આપને જણાવી દઈએ કે, ગત લોકસભા ચૂંટણીમાં 144 બેઠકમાં ભાજપને હાર મળી હતી. આ તમામ બેઠકો જીતવા ભાજપે વિશેષ તૈયારી કરી છે. આ માટે ભાજપે કેન્દ્રીય મંત્રીઓને 144 બેઠકોની જવાબદારી સોંપી છે.