ભારે કરી / ભાજપના સાંસદનો બખેડો, મૃતકને 'શ્રદ્ધાંજલિ' આપવાને બદલે 'અભિનંદન' પાઠવ્યા!

ગુજરાતમાં 2019ની લોકસભાની ચૂંટણીમાં ભાજપે સપાટો બોલાવ્યો હતો અને ફરી એકવાર કોંગ્રેસને વ્હાઇટ વોશ કરી નાખી હતી. ગુજરાતમાં ભાજપે 26માંથી 26 બેઠક જીતી લીધી. આ 26 બેઠકમાં એક એટલે સુરેન્દ્રનગરના સાંસદ ડૉક્ટર મહેન્દ્ર મુંજપરા. વ્યવસાયે ડૉક્ટર એવા મહેન્દ્ર મુંજપરા પ્રથમ વખત લોકસભાની ચૂંટણી જિત્યા છે. જોકે, ચૂંટણી જિત્યા બાદ તેઓ અનેક વિવાદોમાં પણ સંપડાયા છે.

ચૂંટણીમાં આચાર સંહિતા ભંગ કરવાનો મામલો હોય કે પોતાના વિરુદ્ધ લખતા પત્રકારને ગાળો ભાંડવાનો આક્ષેપ હોય, મુંજપરાની શિક્ષિત સાંસદ તરીકેની છબી સતત ખરડાઈ છે. આવામાં હવે તેઓ વધુ એક મોટી ભૂલ કરી બેઠા જેને જોઈને સોશિયલ મીડિયામાં લોકો તેમની મજાક ઉડાવી રહ્યા છે. 

વાત જાણે એવી છે કે, પૂર્વ નાણામંત્રી અરવિંદ સંઘવીના નિધન પર કોઈએ એક શ્રદ્ધાંજલિ પોસ્ટ કરી હતી પરંતુ સાંસદ શ્રીએ આ શ્રદ્ધાંજલિ પોસ્ટ પરની કોમેન્ટમાં ઓમ શાંતિ લખવાને બદલે "અભિનંદન" લખ્યું. 

પોસ્ટ વાંચવા વગર કોમેન્ટ કરવાની ઉતાવળમાં સાંસદ ખુબ મોટી ભૂલ કરી બેઠા તેમની આ ભૂલને લઈને લોકોએ તેમની ખૂબ ટીકા કરી.

લોકોના આક્રોશનો ભોગ બન્યા બાદ સાંસદને પોતાની ભૂલનો અહેસાસ થતા ફરી તેમણે માફી માગતી પોસ્ટ કરવી પડી.