સુપરસ્ટાર આમિર ખાન પોતાની આગામી ફિલ્મ લાલસિંહ ચડ્ઢાનું શૂટિંગ કરી રહ્યો છે. જેથી તે હાલમાં જ ઉત્તરપ્રદેશના ગાઝિયાબાદ જિલ્લામાં આ ફિલ્મનું શૂટિંગ કરી રહ્યો હતો. એવામાં વિવાદ ઉભો થઈ ગયો છે. લોનીના ભાજપના ધારાસભ્ય નંદ કિશોર ગુર્જરએ આમિર ખાન ઉપર કોવિડ પ્રોટોકોલનું પાલન ન કરવાનો આરોપ લગાવ્યો છે. સાથે જ ભાજપના ધારાસભ્યએ આમિર વિરૂદ્ધ પોલીસમાં ફરિયાદ પણ નોંધાવી છે.
આમિર ખાન ઉપર ધારાસભ્યએ લગાવ્યો આરોપ
આમિર વિરૂદ્ધ પોલીસમાં ફરિયાદ પણ નોંધાવી છે
મળતી માહિતી મુજબ આમિર ખાન ગાઝિયાબાદમાં હોવાની વાતને લઈને કેટલાક ચાહકો ખૂબ જ ખુશ થઈ ગયા હતા. આમિરને જોવા ભારે માત્રામાં લોકો એકત્ર થઈ ગયા. ત્યારે આમિરે પણ ચાહકો સાથે સેલ્ફી ક્લિક કરાવી પરંતુ આ દરમિયાન તેણે કે તેના ફેન્સએ માસ્ક પહેર્યો નહોતો. જેથી મહામારીના સમયમાં આમિરે કોવિડ પ્રોટોકોલ ન ફોલો કરતા વિવાદ સર્જાયો છે. બીજેપી ધારાસભ્યને આ વાત ગમી નહીં. અને તેમણે સીધુ પોલીસમાં આમિર સામે ફરિયાદ નોંધાવી દીધી. જોકે હજુ સુધી આમિર ખાન ઉપર કોઈ કાર્યવાહી કરવામાં આવી નથી.
ફિલ્મની વાત કરીએ તો આ ફિલ્મમાં ફરી એક વખત આમિર ખાન કરીના કપૂર ખાન સાથે જોવા મળશે. આ ફિલ્મને લઈને સોશિયલ મીડિયા પર સેટની તસવીરો પણ વાયરલ થઈ રહી છે. આમિરના લુક્સને લઈને પણ ઘણી ચર્ચા ચાલી રહી છે. તે ફિલ્મમાં અલગ અલગ લુકમાં જોવા મળશે. લાલ સિંહ ચડ્ઢા આવતા વર્ષે ક્રિસમસ પર રિલીઝ કરવાની તૈયારી છે.