નરોડાના ધારાસભ્ય બલરામ થાવાણીના લાતકાંડ બાદ થાવાણી અને તેજવાણી વચ્ચેના નાટકીય સમાધાનને લઈને મહિલા આયોગ એક્શનમાં આવ્યું છે. મહિલા આયોગે આ મામલે તપાસ હાથ ધરી છે કે, લાત કાંડ બાદ એવું તો શું થયું કે, બંને વચ્ચે કલાકોમાં જ સમાધાન થઈ ગયું. આ સમગ્ર મામલાને લઈને પોલીસને પણ ત્રણ દિવસમાં રિપોર્ટ આપવા માટે કહેવાયું છે. તો ધારાસભ્ય બલરામ થાવાણી અને નીતુ તેજવાણીને પણ મહિલા આયોગ સામે હાજર રહેવા ફરમાન કરવામાં આવ્યું છે.
વારંવાર પીડિત મહિલાને મળી રહી છે ફોન પર ધમકીઓ
હાલ મળતી માહિતી અનુસાર, મહિલા સાથે ધારાસભ્યના સમાધાન બાદ પણ મહિલા મુશ્કેલીમાં હોવાનું જણાઇ રહ્યું છે. વારંવાર પીડિત મહિલાને ફોન પર ધમકીઓ મળી રહી છે. મહિલાને જાનથી મારી નાખવાની ફોન પર ધમકી મળી રહી છે. જોકે ધમકીઓ મળતા મહિલાએ પોલીસને રજૂઆત કરવાની તૈયારી કરી. આ મામલે મહિલા પોલીસને રજૂઆત કરશે.
મારવાથી માફી સુધી શું થયું?
નરોડાના MLA બલરામ થાવાણીનો મહિલાને માર મારતો વીડિયો વાયરલ થયો હતો. ત્યારબાદ મહિલાએ અને થાવાણીને સામ-સામે ફરીયાદ કરી હતી. પોલીસે મહિલાનું નિવેદન નોંધ્યું પરંતુ તેની ફરિયાદી ન નોંધી. સામે તરફ પોલીસે MLAની ફરિયાદ નોંધી હતી.
ત્યારબાદ મહિલા આયોગે આ ઘટના મામલે પોલીસ કમિશનર પાસે રિપોર્ટ માગ્યો હતો. સમગ્ર ઘટના મીડિયામા સામે આવતા જ રાજકારણ શરૂ થયું હતું. રાજકારણ ગરમાતા ભાજપે ધારાસભ્યને ખખડાવ્યા હતા. ધારાસભ્યને ખખડાવ્યા બાદ મહિલાની મીડિયા સમક્ષ માફી માગી હતી.
માર મારનાર મહિલા સાથે મુલાકાત કરી હતી. મહિલા સાથે મુલાકાત કર્યા બાદ તેમની પાસે રાખડી બંધાવી સમાધાન કર્યુ હતું. ત્યારે હવે ભાજપ દ્વારા તેમને શો કોઝ નોટિસ આપવામાં આવી છે. બીજી તરફ આ મામલે કોઇ ફરિયાદ ન નોંધાતા નવો વળાંક આવ્યો છે.