રાજનીતિ / અંદરની વાતઃ ભાજપમાં હજુ ઘણા લોકો અમિત શાહને જ અસલી અધ્યક્ષ માને છે

અમિત શાહની સભા રેલીઓ કયારેક તો એક દિવસમાં છ છ સ્થળોએ યોજાતી રહી. ઉમેદવારો પણ નડ્ડાને બદલે અમિત શાહની જ ડિમાન્ડ વધુ કરતા હતા. દિલ્હીની ચૂંટણી અંગેના પક્ષના નિર્ણયો પણ અમિત શાહની સંમતિથી થતા હતા. દિલ્હીની સાથે બિહાર અંગે જે વાતચીત ચાલે છે. તેમાં પણ અમિત શાહ કેન્દ્રમાં રહે છે. 

ખુદ નીતીશકુમાર પણ એવું ઇચ્છે છે કે જે કાંઇ વાતચીત થાય તેમાં અમિત શાહ જરૂર સામેલ રહે, કેમકે આખરી નિર્ણય તો તેમણે જ લેવાનો રહેશે. પશ્ચિમ બંગાળ અંગે પણ અમિત શાહના સ્તરે વ્યૂહરચના તૈયાર થઇ રહી છે. કદાચ આવા કારણોસર જ પક્ષમાં ઘણા લોકોએ હજુ અમિત શાહને ‘અધ્યક્ષજી’ કહેવાની ટેવ બદલી નથી. એટલે ઘણા એવું માને છે કે અસલી અધ્યક્ષ તો તેઓ જ છે. 

અમિત શાહનો આ દબદબો જોઇને રાજનાથસિંહ અને નીતીન ગડકરી જરૂર એવું વિચારતા હશે કે પક્ષના પ્રમુખ તો તેઓ પણ હતા, પરંતુ શાહ જેવો દબદબો તેમના હિસ્સે કેમ ના આવ્યો? અમિત શાહનો જે આક્રમક અંદાજ છે એ જ કદાચ તેમને અન્ય નેતાઓથી અલગ પુરવાર કરે છે.