ઝારખંડ વિધાનસભાના પરિણામોથી સ્પષ્ટ થઇ ગયું છે કે, હવે મહાગઠબંધનની નવી સરકાર બનવા જઇ રહી છે. ગત એક વર્ષમાં ઝારખંડ પાંચમું રાજ્ય છે જ્યાંથી ભાજપની સત્તા જઇ રહી છે. બે મહીના પહેલા જ મહારાષ્ટ્રમાં યોજાયેલી ચૂંટણીમાં ભાજપે સત્તા ગુમાવી. પાર્ટી કોઇપણ રીતે હરિયાણામાં સત્તા જાળવી રાખવામાં સફળ રહી. આ સાથે જ મહારાષ્ટ્રમાં પ્રયત્ન તો કર્યા જ હતા પરંતુ દાવ ઉંધા પડ્યા.
પાંચ વર્ષમાં ઘટી ગયો અમિત શાહનો સ્ટ્રાઇક રેટ
ભાજપે 4 રાજ્યોમાં 197 બેઠક ગુમાવી
2017માં ભાજપનું દમદાર પ્રદર્શન રહ્યું
આ સાથે જ ગત ડિસેમ્બરમાં જ રાજસ્થાન, મધ્યપ્રદેશ અને છત્તીસગઢ ભાજપના હાથમાંથી નીકળી ચૂક્યા છે. ઝારખંડ છોડીને આ 4 રાજ્યોમાં ભાજપે વર્ષ દરમિયાન કુલ 197 બેઠકો ગુમાવી છે. આ સિવાય ભાજપે હરિયાણામાં 7, આંધ્ર પ્રદેશ અને તેલંગણામાં 4-4 વિધાનસભા બેઠકો ગુમાવી છે.
2014 માં પાર્ટીનો સ્ટ્રાઇક રેટ 100 ટકાથી ઘટીને 2015માં ઝીરો થયો
આંકડા પર દ્રષ્ટી કરીએ તો 2014 માં અમિત શાહ ભાજપના રાષ્ટ્રીય અધ્યક્ષ બન્યા બાદ અત્યાર સુધીમાં 31 વિધાનસભા ચૂંટણી(ઝારખંડની વર્તમાન ચૂંટણી છોડીને) યોજાઇ ચૂકી છે. જેમાંથી 51 ટકા રાજ્યોમાં પોતાની સરકાર બનાવી છે. 2014 માં પાર્ટીનો સ્ટ્રાઇક રેટ 100 ટકા હતો અને 2015 સુધીમાં તે ઝીરો થયો. 2014 ના ડિસેમ્બરમાં ઝારખંડ અને જમ્મુ-કાશ્મીરની ચૂંટણી યોજાઇ હતી. બંન્ને રાજ્યોમાં ભાજપે સરકાર બનાવી હતી જો કે ત્યારબાદ જમ્મુ-કાશ્મીરમાં સરકાર તૂટી હતી.
2016માં ભાજપ માટે કપરા ચઢાણ રહ્યા
વર્ષ 2016 માં કુલ પાંચ રાજ્યોમાં ચૂંટણી યોજાઇ હતી. જેમાંથી ભાજપે માત્ર એક જ રાજ્યમાં જીત હાંસલ કરી.
2017 નું વર્ષ ભાજપને ફળ્યું
2017ની વાત કરીએ તો આ વર્ષ ભાજપ માટે ઉત્તમ પરિણામ આપનારું રહ્યું. વર્ષની શરૂઆતમાં ફેબ્રુઆરી-માર્ચમાં સાત રાજ્યોમાં ચૂંટણી યોજાઇ હતી. ભાજપે તેમાંથી 6 રાજ્યોમાં સરકારની રચના કરી. માત્ર પંજાબમાં સત્તા ગુમાવવાનો વારો આવ્યો.
2018 માં ભાજપનું પ્રદર્શન 45 ટકા સુધી સમેટાયું
2018માં કુલ 9 રાજ્યોમાં ચૂંટણી યોજાઇ પરંતુ ભાજપનું પ્રદર્શન 45 ટકા સુધી સમેટાઇ ગયું. 9 માંથી માત્ર ચાર રાજ્યોમાં સરકાર બનાવવામાં ભાજપને સફળતા પ્રાપ્ત થઇ. ચાલુ વર્ષે કર્ણાટક, રાજસ્થાન, મધ્ય પ્રદેશ, છત્તીસગઢ, તેલંગાણા, ત્રિપુરા, મેઘાલય, નાગાલેન્ડ અને મિઝોરમમાં ચૂંટણી યોજાઇ હતી.
2019માં 6 પૈકી 3 રાજ્યોમાં જ બની ભાજપ સરકાર
2019 માં કુલ છ રાજ્યોમાં ચૂંટણી યોજાઇ હતી. જેમાથી 3 રાજ્યોમાં ભાજપ સરકાર બનાવવામાં સફળ રહી. હરિયાણામાં જનનાયક જનતા પાર્ટીના સહયોગ અને સિક્કિમમાં ક્રાંતિકારી મોર્ચાના સહયોગથી સરકાર બનાવવામાં સફળ રહી. અરૂણાચલ પ્રદેશમાં પણ ભાજપે સરકાર બનાવી પરંતુ મહારાષ્ટ્રમાં સત્તા માટે શિવસેના સાથેના મતભેદોને કારણે સત્તા હાંસલ કરવામાં સફળતા પ્રાપ્ત થઇ શકી નહીં.