નમસ્તે ટ્રમ્પ / ભાજપના નેતાઓ 1 લાખ લોકો ભેગા કરશે તો પણ ટ્રમ્પ ઓપન જીપમાં રોડ શો નહીં કરે, જાણો કેમ?

• ડોનાલ્ડ ટ્રમ્પ બીસ્ટ કારમાં રોડ શો કરે તેવી શક્યતા
• ૨૫ હજાર પોલીસ કર્મચારીઓ સુરક્ષામાં હાજર રહેશે
• રોડ-શોમાં ફેરફાર થાય તે વાત પણ નકારી શકાતી નથી 

નરેન્દ્ર મોદી અને ટ્રમ્પ અમદાવાદમાં મેગા રોડ શો કરવાના છે 

અમેરિકાના પ્રમુખ ડોનાલ્ડ ટ્રમ્પ અને વડા પ્રધાન નરેન્દ્ર મોદી એરપોર્ટથી ગાંધીઆશ્રમ-સ્ટેડિયમ સુધી મેગા રોડ શો કરવાના છે, જેમાં તે પોતાની બીસ્ટ કારમાં રોડ શો કરે તેવું પોલીસસૂત્રો દ્વારા જાણવા મળ્યું છે. આ પહેલાં જાપાનના વડા પ્રધાન શિન્જો આબે અને ચીનના રાષ્ટ્રપતિ શી જિનપિંગ અમદાવાદના મહેમાન બન્યા હતા ત્યારે તેમનો રોડ શો ઓપન જીપમાં થયો હતો.

ટ્રમ્પ પોતાની બીસ્ટ કારમાં જાય તેવી શક્યતાઓ છે

ડોનાલ્ડ ટ્રમ્પની સુરક્ષાને લઇ વ્હાઇટ હાઉસ  તેમજ તેમની ‌સિક્રેટ ‌સિક્યો‌રિટી સર્વિસ દ્વારા આ નિર્ણય લેવાય તેવી શક્યતા હોવાનું સૂત્રો પાસેથી જાણવા મળ્યું છે. રર કિલોમીટરના રોડ શોમાં ટ્રમ્પ પોતાની બીસ્ટ કારમાં જાય તેવી શક્યતાઓ છે, જોકે થોડાક દિવસ બાકી હોવાના કારણે રોડ-શોમાં ફેરફાર થાય તે વાત પણ નકારી શકાતી નથી. 

રપ આઇપીએસ અધિકારી, ૬પ ડીવાયએસપી સહિત ૨૫ હજાર પોલીસ કર્મચારીઓ રહેશે. 

ટ્રમ્પની સુરક્ષા માટે ઉચ્ચ પોલીસ અધિકારીઓ સહિત રપ,૦૦૦ પોલીસની થ્રી-લેયર સુરક્ષા પૂરી પડાશે. રર કિલોમીટરના  રોડ-શોના રૂટ પર વિદ્યાર્થીઓ સહિત હજારો નાગરિકો મહાનુભાવોનું અભિવાદન ઝીલશે. ટ્રમ્પની અમદાવાદ મુલાકાત દરમિયાન તેમની સિક્રેટ સર્વિસ પણ તેમની સાથે રહેશે. આ સિવાય તેઓ બીસ્ટ કારમાં રહેશે. સુરક્ષા માટે રપ આઇપીએસ અધિકારી, ૬પ ડીવાયએસપી સહિત ૨૫ હજાર પોલીસ કર્મચારીઓ રહેશે. 

ઉલ્લેખનીય છે કે ટ્રમ્પની મુલાકાત પહેલા જૈસ-એ-મોહંમદે એક વીડિયો શેર કર્યો છે જેમાં બદલો લેવાની વાત કરી છે. પવિત્ર ગ્રંથ કુરાને શરીફની આયાતનો હવાલો આપીને કહેવામાં આવ્યું છે કે જો કોઇએ કતલ કરી છે તો તેને માફ કરવામાં આવશે નહીં. જૈશ-એ-મોહંમદના આ વીડિયો બાદ સુરક્ષા એજન્સીઓ વધુ સતર્ક બની છે.