હાર્દિક બાદ વધુ એક આંદોલનકારીએ લોકસભા ચૂંટણી લડવાની જાહેરાત કરી છે. ભાજપ નેતા રેશમા પટેલે લોકસભાની ચૂંટણી લડવા અંગે મહત્વની જાહેરાત કરી છે. ભાજપ વિરૂદ્વ લોકસભાની ચૂંટણી લડવાની જાહેરાત કરી છે. જો કે થોડાંક સમય બાદ તેઓ ઔપચારિક જાહેરાત પણ કરશે. તેઓ પોરબંદર અથવા જૂનાગઢથી ઉમેદવારી કરી શકે છે. રેશમા પટેલ અપક્ષ ઉમેદવારી કરે તેવી શક્યતા સેવાઇ રહી છે.
મહત્વનું છે કે પાટીદાર અનામત આંદોલનથી જાણીતા બનેલા રેશમા પટેલ અને વરૂણ પટેલ ભાજપમાં જોડાયાં છે. તેઓ પાટીદાર અનામત આંદોલનનાં મહત્વનાં ચહેરાઓમાનાં એક છે. હાર્દિકનાં સૌથી નજીકનાં સાથીદારોમાં તેમનો સમાવેશ થતો હતો. જો કે હાલમાં તેઓ બંને ભાજપનાં નેતા છે.
ઉલ્લેખનીય છે કે હાર્દિક પટેલે પણ આજે પોતે ચૂંટણી લડશે કે નહીં લડે તે અંગેની તમામ અટકળોનો અંત ખુદ જાતે જ લાવી દીધો છે. હાર્દિક પટેલે રાજસ્થાનમાં એક ખાનગી ન્યૂઝ ચેનલમાં આપેલા નિવેદનમાં જણાવ્યું કે 'તે આગામી લોકસભાની ચૂંટણી લડશે.'
ખેડૂતો અને લોકો ઈચ્છતા હશે તો તે લોકસભા ચૂંટણી લડશે અને અમરેલીથી ચૂંટણી લડશે તેમ પણ જણાવ્યું. હાર્દિકે આ મામલે જણાવ્યું કે 'લોકો ઈચ્છે તો દિલ્હીમાં બેસીશ. નહીં તો અમરેલીથી ચૂંટણી લડીશ.'
મહત્વનું છે કે હાર્દિક પટેલ આ અગાઉ પણ અનેક નિવેદન આપી ચૂક્યો છે. જેમાં ચૂંટણી ન લડવા અંગે અને ચૂંટણી લડવા અંગે પણ ઈશારા કરી ચૂક્યો છે. જો કે આ વખતે હાર્દિક પટેલે મહત્વની જાહેરાત કરીને ચૂંટણી લડશે કે નહીં તે અંગેની તમામ અટકળોનો અંત આણી દીધો છે.