VIDEO / જયેશભાઈ આવું બોલીને તેમના પિતાનું સપનું તોડી રહ્યા છે, રાદડિયાએ કહ્યું આવા લોકોને મીડિયામાં રહેવાના અભરખા

• જયેશ રાદડિયા પર મતદારોને ધમકાવાનો આરોપ
• માર્કેટિંગ યાર્ડની ચૂંટણી પહેલા લાગ્યો આરોપ
• `મારે જાણવું હોય તો જાણી શકું કે વોટ ગયો ક્યાં'

રાજ્ય સરકારના પૂર્વ મંત્રી અને ભાજપના અગ્રણી જયેશ રાદડિયાના વાયરલ થયેલા વીડિયોમાં તેઓ જણાવી રહ્યા છે કે, 2 મહિના પછી પણ મારે જાણવું હોય કે, વોટ ક્યાં ગયો છે તો હું જાણી શકું છું. જેને લઈને વિવાદનો મધપૂડો છંછેડાયો છે અને ભાજપની જ ભગિની સંસ્થા આ મામલે મેદાને આવી છે.

દિલીપ સખીયાએ કહ્યું- જયેશ ભાઈ પિતાનું સપનું તોડી રહ્યા છે

જયેશ રાદડિયાના વાયરલ થયેલા વીડિયોને લઈને ભારતીય કિસાન સંઘના પ્રમુખ દિલીપ સખીયાએ ખેડૂતોને દબાવવાનો આરોપ લગાવ્યો છે. તેમણે કહ્યું કે, જયેશભાઈ આવું બોલીને તેમના પિતાનું સપનું તોડી રહ્યા છે.

ખેડૂતોને ધાકધમકી આપવામાં આવી રહી હોવાનો કરાયો આરોપ

ભારતીય કિસાન સંઘના પ્રમુખ દિલીપ સખીયાએ કહ્યું કે, જયેશ રાદડિયાને મતની ગુપ્તતાનો ખ્યાલ હોવો જોઇએ. ખેડૂતોને ધાકધમકી આપવામાં આવી રહી છે.ચૂંટણીપંચને અમે રાદડિયાના નિવેદન મામલે રજૂઆત કરીશું. સત્તાધારી પક્ષ ચૂંટણીમાં હારી જાય તેમ છે.

બેડી માર્કેટ યાર્ડની યોજાવાની છે ચૂંટણી 

ઉલ્લેખનીય છે કે, સૌરાષ્ટ્રની સૌથી મોટા બેડી માર્કેટ યાર્ડમાં સંઘની 2, વેપારીની 4 મળીને કુલ 16 બેઠકો પૈકી 2 બેઠકને બાદ કરતા ચૂંટણી યોજાવાની છે. 

જયેશ રાદડિયાનો જવાબ

• ચૂંટણીનું વાતાવરણ ખરાબ કરવા માટે આક્ષેપ થયા છે
• મતદાનની ગુપ્તતા જળવાતી હોય છે
• મતદારોને દબાવવા કે ધમકાવાનો પ્રશ્ન ક્યારેય આવ્યો નથી
• ચૂંટણીમાં લાઇમલાઇટમાં રહેવા માટે આક્ષેપો કર્યા છે
• આવા આક્ષેપોનો મારે જવાબ આપવાનો હોય નહીં
• ખોટી રીતે મીડિયામાં રહેવાના પ્રયાસ