બેદરકારી / ભાજપના નેતા સરકાર અને સુપ્રીમના આદેશને ઘોળીને પી ગયા, કાંતિ ગામીતે પૌત્રીની સગાઈમાં હજારોની ભીડ ભેગી કરી

• તાપીમાં સામાજિક અંતરના ઉડ્યા ધજાગરા
• ભાજપ નેતા કાંતિ ગામીતના પૌત્રીનો સગાઈ પ્રસંગ
• સગાઈ પ્રસંગમાં મોટી સંખ્યામાં લોકો ગરબા રમતા પડ્યા નજરે

ગુજરાતમાં કોરોના સંક્રમિતોની સંખ્યામાં સતત વધારો થઇ રહ્યો છે ત્યારે લગ્ન સમારંભને લઇને જાહેર કરાયેલા નિયમોનો ખુલ્લેઆમ ભંગ જોવા મળ્યો. જેમાં ભાજપના નેતા કાંતિ ગામીતના પૌત્રીના સગાઇમાં મોટી સંખ્યામાં લોકો ગરબા રમતા જોવા મળ્યાં છે.

ભાજપ નેતા કાંતિ ગામીતના પૌત્રીના સગાઇ પ્રસંગમાં મોટી સંખ્યામાં લોકો ગરબા રમતા નજરે પડ્યા છે. કોરોના સંકટ સમયે સામાજિક અંતરના ધજાગરા ઉડયા છે. કાંતિ ગામીત ભાજપના પૂર્વ ધારાસભ્ય છે. ત્યારે સવાલ એ છે કે લોકો માટે નિયમો, નેતાઓ માટે નિયમો ક્યારે? કાંતિ ગામીતની પૌત્રીની સગાઇમાં હજારો લોકો ઉમટયાં.

કાંતિ ગામિતને પોલીસ સ્ટેશન બોલાવાયાં

તાપીમાં સામાજિક અંતરના ધજાગરા ઉડાડવાના મામલે ભાજપના નેતા કાંતી ગામિતને પોલીસ સ્ટેશન બોલાવાયાં છે. જેમાં ભાજપના નેતા કાંતી ગામિતે સોનગઢ પોલીસ સ્ટેશનના PIને જવાબ આપ્યાં છે. આમ હાલ મળતી વિગત અનુસાર સોનગઢ પોલીસ જ્યાં પ્રસંગ યોજાયો હતો તે સ્થળ પર જઇ તપાસ કરશે.

ગુજરાતમાં સરકારના બે કાયદા ચાલે છે, ભાજપ અને પ્રજા માટે અલગ અલગ : કોંગ્રેસનો કટાક્ષ

આ મામલે કોંગ્રેસ નેતા જયરાજસિંહ પરમારે કટાક્ષ કરતા કહ્યું હતું કે ગુજરાતમાં 2 અલગ અલગ કાયદાઓ ચાલે છે. એક ભાજપ માટે અને બીજા સામાન્ય પ્રજા માટે. જો આ નિયમનું ઉલ્લંઘન કોઈ સામાન્ય પ્રજા કે વિપક્ષમાંથી કોઈએ કર્યુ હોત તો પોલીસ અને તંત્રએ આકરી કાર્યવાહી કરી હોત. એટલે નિયમો માત્ર ભાજપ સિવાયના લોકો માટે છે તેવું લાગી રહ્યું છે તેમ તેમણે જણાવ્યું હતું. 

ગુજરાતમાં કોરોના મામલે 2 કાયદા છે, એક ભાજપ માટે અને બીજો સામાન્ય જનતા માટે : કોંગ્રેસ નેતા જયરાજસિંહ

તાપીમાં ભાજપના નેતા કાંતિ ગામિતની પૌત્રીની સગાઈમાં હજારોની ભીડનો વીડિયો વાયરલ થયો હતો. પોલીસે કહ્યું કે મામલાની તપાસ કરીશું.@JayrajKuvar @INCGujarat @vijayrupanibjp @CRPaatil pic.twitter.com/oHBCcObCh0

— VTV Gujarati News and Beyond (@VtvGujarati) December 1, 2020

તંત્ર સામે સવાલો ઊઠ્યા

હાલ ગણતરીના લોકોની હાજરીમાં સામાન્ય લોકોનાં લગ્ન યોજાઈ રહ્યાં છે ત્યારે નેતાજીની પૌત્રીની સગાઈમાં એકઠા થયેલા હજારો લોકો અને ગરબા અંગે તંત્રએ શું કર્યું.. ત્યારે તંત્રના અધિકારીઓ ક્યાં હતા તેવા સવાલોની સાથે સામાન્ય લોકોને જ્યારે લગ્ન પ્રસંગોમાં કોરોનાના નિયમોના ભંગ બદલ દંડ કરાય છે ત્યારે માજી મંત્રી કાંતિ ગામીતના ઘરે સગાઈ પ્રસંગમાં લોકોના જમાવડાને તંત્રએ કેમ લાપરવાહી દર્શાવી, એવા સવાલો સામાન્ય લોકોમાં ચર્ચાઈ રહ્યા છે.

અગાઉ ભાજપના ધારાસભ્યના ભાઈના લગ્ન પણ ચર્ચામાં આવ્યાં

ઉલ્લેખનીય છે કે અગાઉ ગુજરાત ભાજપના ધારાસભ્ય માલતી મહેશ્વરીના ભાઈના લગ્ન લોનાવાલામાં યોજાવાને લઈને પણ માહિતી સામે આવી હતી. ગુજરાતમાં કોરોનાના સંક્રમણના ડરથી લોનાવાલામાં લગ્ન યોજાયા હતાં. જો કે આ પ્રસંગને કારણે લગ્નમાં કચ્છ ભાજપના મોટા નેતાઓની હાજરી જોવા મળી હતી. કચ્છના આરોગ્ય અધિકારી પણ લગ્નમાં હાજરી આપવા પહોંચી ગયા.

એટલું જ નહીં મહામારીના આ સમયમાં ગાંધીધામની જનતાને રઝળતી મૂકી આરોગ્ય વિભાગના અધિકારી પણ આ લગ્નમાં લોનાવલા પહોંચ્યાં હતાં. સાંસદસભ્ય વિનોદ ચાવડા, ધારાસભ્ય આત્મરામ પરમાર હાજર રહ્યાં હતાં જ્યારે કચ્છ આરોગ્ય અધિકારી ડૉ. પ્રેમકુમાર કન્નર પણ પહોંચ્યા હતાં. અહીં તમામ મોટ નેતાઓએ માસ્ક વગર ફોટો પડાવતા નજરે પડ્યાં હતાં.