જીતનો અનેરો આનંદ / VIDEO: ચૂંટણીમાં જીત્યાં તો ભાજપના નેતાએ ઢોલીને 500-500ની નોટો આપી

• રાજકોટના બેડી ગામે 500-500 રૂપિયાની નોટ ઉડી
• ભાજપના વિજતા ઉમેદવારે ઢોલીને આપી 500ની નોટ
• રાજકોટ જિલ્લામાં ભાજપની ભવ્ય જીત

રાજકોટના બેડી ગામમાં ભાજપની જીત બાદ વિજેતા ઉમેદવારે ખૂશ થઈને ઢોલીઓને 500-500 રૂપિયાની નોટની વધામણી કરાવી હતી. રાજકોટ જિલ્લામાં કોંગ્રેસનો સફાયો છે. તાલુકા-જિલ્લા પંચાયત અને નગરપાલિકામાં ભાજપનો ભવ્ય વિજય થયો છે. ત્યારે ભાજપના નેતાઓ દ્વારા વિજયોત્સવ મનાવવામાં આવી રહ્યો છે. તો બેડી ગામનો વીડિયો સોશિયલ મીડિયામાં વાયરલ થઈ રહ્યો છે. 

રાજકોટના બેડી ગામમાં ભાજપની જીત બાદ વિજેતા ઉમેદવારે ખૂશ થઈને ઢોલીઓને 500-500 રૂપિયાની નોટની વધામણી કરાવી હતી.#Gujarat #News #BJP #Rajkot #BediVillage pic.twitter.com/tBbQ3gdXm9

— VTV Gujarati News and Beyond (@VtvGujarati) March 2, 2021

સીએમ રૂપાણીએ જનતાનો આભાર માન્યો 

ગુજરાત સ્થાનિક સ્વરાજની ચૂંટણીમાં ફરીવાર ભાજપ ઐતિહાસિક જીત હાંસલ કરવા જઈ રહી છે. નગરપાલિકા અને જિલ્લા પંચાયતોમાં ભાજપની પ્રચંડ જીત જોવા મળી રહી છે ત્યારે ભાજપ નેતાઓમાં ખુશીનો માહોલ છે. ગુજરાતની સ્થાનિક સ્વરાજની ચૂંટણીમાં ભાજપની એકતરફી જીત થઈ રહી છે અને મોટા ભાગની તાલુકા પંચાયત, જિલ્લા પંચાયત તથા નગરપાલિકામાં ભાજપનો ભગવો લહેરાયો છે ત્યારે ગદગદ થયેલા સીએમ રૂપાણીએ ગુજરાતની જનતાનો આભાર માન્યો છે. 

ભાજપનું ગઢ છે ગુજરાત 

સીએમ રૂપાણીએ કહ્યું કે ગુજરાતની જનતાએ જુસ્સાથી કોંગ્રેસના લોકોનો વીણી વીણીને સફાયો કર્યો છે. ફરી એકવાર સાબિત થઈ ગયું છે કે ગુજરાત ભાજપનો ગઢ છે અને આ ગુજરાત નરેન્દ્ર મોદી અને અમિત શાહનું ગુજરાત છે. 

સીઆર પાટીલને પણ અભિનંદન પાઠવ્યા 

સીએમ રૂપાણીએ આ જીતનો શ્રેય પીએમ મોદી અને ગૃહમંત્રી શાહને આપતા કહ્યું કે દિલ્હીમાં તો મોસાળે મા પીરસે તેમ તે પીએમ મોદી ગુજરાતને મદદ કરે છે. સાથે સાથે તેમણે ભાજપ પ્રદેશ અધ્યક્ષ પાટીલને પણ અભિનંદન પાઠવ્યું અને કહ્યું કે લાખો કાર્યકર્તાઓએ પરિશ્રમ કર્યો છે ત્યારે આ પરિણામ આવ્યું છે. 

2022નો પાયો નંખાયો 

સીએમ રૂપાણીએ કહ્યું કે ભૂતકાળમાં કોઈ પણ પાર્ટીને આટલી બધી બેઠકો મળી નથી, આ પાર્ટીના કાર્યકર્તાઓના પરિશ્રમ બદલ અભિનંદન પાઠવું છું. 2017માં અમે જીત્યા, 2019માં પણ જીત્યા અને 2021માં પણ જીત્યા છે અને 2022માં પણ ફરીવાર ભાજપની સરકાર માટે પાયો નંખાયો છે. 

કોંગ્રેસ પર નિશાન સાધતાં સીએમ રૂપાણીએ કહ્યું કે કોંગ્રેસ સત્તા જ નહીં વિપક્ષને પણ લાયક નથી પ્રજાએ શોધી-શોધીને કોંગ્રેસને હરાવી છે. 

ગુજરાતના સ્થાનિક સ્વરાજની ચૂંટણીમાં કોંગ્રેસનો રકાસ નીકળી ગયો છે. ભાજપનું બુલ્ડોજર જાણે પંજા પર ફરી વળ્યું હોય તેમ બપોરે 2 વાગ્યા સુધીના પરિણામ મુજબ 31 જિલ્લા પંચાયતોમાં ભાજપ બહુમતિ તરફ છે. જ્યારે 81માંથી 60 કરતા વધુ નગરપાલિકામાં ભાજપ આગળ છે જ્યારે 231માંથી 200થી વધુ તાલુકા પંચાયતોમાં ભાજપ આગળ દેખાઈ રહી છે.