સ્પોર્ટ્સ / પાકિસ્તાનની વહુ V/s ભારતીય મેડલ વિજેતા: ભાજપના નેતાના વિવાદાસ્પદ નિવેદનથી મચ્યો ખળભળાટ

હૈદરાબાદનાં ગોશામહાલથી ભાજપના ધારાસભ્ય ટી. રાજા સિંહે ભારતીય ટેનિસ સ્ટાર સાનિયા મિર્ઝાની જગ્યાએ ઓલિમ્પિક બેડમિન્ટન મેડલ વિજેતા પીવી સિંધુને તેલંગાણાના બ્રાન્ડ એમ્બેસેડર બનવવાની માંગ કરી હતી. તેમણે સાનિયાને પાકિસ્તાનની વહુ કહીને વિવાદનો મધપૂડો છંછેડ્યો હતો. 

ભાજપના ધારાસભ્ય છે રાજા સિંહ 
ટાઈગર રાજા સિંહ ભાજપના ધારાસભ્ય છે. તેઓ ગોશામહાલ વિસ્તારથી ચૂંટાયા છે તેમણે ટોક્યો ઓલિમ્પિકમાં બેડમિન્ટનમાં ભારતને બ્રોન્ઝ મેડલ અપાવનાર ભારતીય સ્ટાર ખેલાડી પી. વિ. સિંધુને તેલંગાણાના બ્રાન્ડ એમ્બેસેડર બનાવવાની માંગ કરી હતી. ટી. રાજા સિંહે વિડીયો જાહેર કરીને મુખ્યમંત્રી ચંદ્રશેખર રાવને માંગ કરી હતી કે સિંધુ બે ઓલિમ્પિકમાં મેડલ જીતનારી પહેલી મહીલા ખેલાડી છે. તેમણે જણાવ્યું હતું કે સિંધુએ ઓલિમ્પિકમાં કાંસ્ય પદક જીતીને  ભારત અને તેલંગાણાને ઓળખ અપાવી હતી. 

આ અગાઉ પણ સાનિયા વિરુદ્ધ બોલી ચૂક્યા છે રાજા સિંહ 
આ એવી પહેલી ઘટના નથી કે જ્યારે ટી. રાજા સિંહ સાનિયા મિર્ઝાની વિરુદ્ધ બોલ્યા હોય. આ અગાઉ પણ તેમણે સાનિયા વિરુદ્ધ ટિપ્પણી કરી હતી. 2019 માં પુલવામા હુમલા બાદ તેમણે સાનિયાને તેલંગાણાના બ્રાન્ડ એમ્બેસેડર પદેથી હટાવવાની માંગ કરી હતી. ટી. રાજા સિંહે સોનિયાને "પાકિસ્તાનની વહુ" કહી હતી. 

સિંધુએ રચ્યો હતો ઇતિહાસ 
પી. વિ. સિંધુએ બ્રોન્ઝ મેડલ જીતીને ઇતિહાસ રચી દીધો હતો. સિંધુ એવી પહેલી મહિલા ખેલાડી બની હતી જેણે ઓલિમ્પિકમાં બેડમિન્ટનમાં ભારત વતી બે વખત મેડલ જીત્યો હોય. આ અગાઉ સિંધુએ રિયો ઓલિમ્પિકમાં સિલ્વર મેડલ જીત્યો હતો. 

સિંધુ પર ઇનામોની વર્ષા 
પીવી સિંધુ પર મેડલ જીતવા બદલ ઇનામોની વર્ષા કરવામાં આવી હતી. ભારતીય ઓલિમ્પિક સંઘ દ્વારા પહેલા જ એલાન કરવામાં આવ્યું હતું કે ભારત વતી ઓલિમ્પિકમાં ગોલ્ડ મેડલ વિજેતાને 75 લાખ રૂપિયા, સિલ્વર મેડલ વિજેતાને 50 લાખ અને બ્રોન્ઝ મેડલ વિજેટને 25 લાખ રૂપિયા ઇનામની જાહેરાત કરવામાં આવી હતી. માટે સિંધુને પણ 25 લાખ રૂપિયા ઈનામે રકમ મળશે.