ગુજરાત વિધાનસભાની પ્રથમ તબક્કાની ચૂંટણીના મતદાન વચ્ચે ગીર સોમનાથથી ભાજપ-કોંગ્રેસના ઉમેદવારોની નારાજગીના દ્રશ્યો સામે આવ્યા
સોમનાથ બેઠક પર ભાજપ-કોંગ્રેસના ઉમેદવારો નારાજગીના દ્રશ્યો સામે આવ્યા
વેરાવળ બેઠકના બંને ઉમેદવારો મતદાન સમયે સામ સામે આવતા નારાજગીના દ્રશ્યો સર્જાયાં.
માનસિંહ પરમાર હાથ મિલાવવા જતાંવિમલ ચુડાસમા ચહેરા પર સ્મિત આપી દૂર ભાગ્યા
ગુજરાત વિધાનસભાની ચૂંટણીના પ્રથમ તબક્કાના મતદાનમાં 4 વાગ્યા સુધી 54 ટકા મતદાન નોંધાયું છે. આ દરમ્યાન હવે ગીર સોમનાથથી ભાજપ-કોંગ્રેસના ઉમેદવારોની નારાજગીના દ્રશ્યો સામે આવ્યા છે. વાત જાણે એમ છે કે, વેરાવળ બેઠકના બંને ઉમેદવારો મતદાન સમયે સામ-સામે આવતા નારાજગીના દ્રશ્યો જોવા મળ્યા છે.
ગીર સોમનાથની વેરાવળ બેઠકના ભાજપ અને કોંગ્રેસના ઉમેદવાર મતદાન સમયે સામસામે આવતા નારાજગી જોવા મળી હતી. આજે મતદાન વખતે ભાજપના ઉમેદવાર માનસિહ પરમાર અને કોંગ્રેસના ઉમેદવાર વિમલ ચુડાસમા વચ્ચે નારાજગીના દ્રશ્યો સામે આવ્યા છે. વાયરલ થયેલા વિડીયોમાં માનસિહ પરમાર હાથ મિલાવવા આગળ થતાં કોંગ્રેસના ઉમેદવાર વિમલ ચુડાસમા ચહેરા ઉપર સ્મિત આપીને દૂર ભાગ્યા હોવાનું દેખાય છે.
આ તરફ રાજ્યની બહુચર્ચિત બેઠક ગોંડલ ઉપર જેનો ડર હતો એ જ થયું હોવાનું સામે આવ્યું છે. વાત જાણે એમ છે કે, ગોંડલના જામવાડી ગામે કોંગ્રેસના પોલિંગ એજન્ટ પર હુમલો કરવામાં આવ્યો હોવાના સમાચાર સામે આવ્યા છે. આ પહેલા રિબડાની પ્રાથમિક શાળામાં અનિરૂદ્ધસિંહ જાડેજા અને અધિકારીઓ વચ્ચે ચકમક ઝરી હોવાનું સામે આવ્યું હતું.
આ સાથે ગોંડલના ગાળિયા ગામે બોગસ વોટિંગની ફરિયાદ મળી હતી જેના લીધે જયરાજસિંહ અને રીબડા જૂથના સભ્યો તાત્કાલિક આ જગ્યાએ પહોચી ગયા હતા અને બન્ને જૂથો વચ્ચે ઉગ્ર બોલાચાલી થઇ હતી.
બોગસ વોટીંગની ફરિયાદ
સૌરાષ્ટ્રમાં વોટીંગ ચાલી રહ્યું છે ત્યારે ગોંડલ સીટને લઈને બે જૂથ વચે પહેલેથી જ અણબનાવ ચાલી રહ્યા છે. ગોંડલ જૂથ અને રીબડા સામસામે છે. આ વચ્ચે ગોંડલના ગાળિયા ગામે બોગસ વોટિંગની ફરિયાદ મળી હતી. પોલીસના ઉચ્ચ અધિકારીઓએ ઘટના સ્થળે પહોંચી ગયા હતા. અને બન્ને જૂથને શાંત પાડી મામલો થાળે પડ્યો હતો.