અમદાવાદ શહેરની સરદાર વલ્લભભાઇ પટેલ (એસવીપી) હોસ્પિટલમાં ખાડિયાના ભાજપના પૂર્વ ધારાસભ્ય ભૂષણ ભટ્ટે દારુના નાશામાં ધુત થઇને મહિલા ડોક્ટરની છેડતી કરતા ભટ્ટને તમાચો માર્યા બાદ બન્ને પક્ષે સમાધાન થયા હોવાના બોગસ મેસેજ વાયરલ થતા મામલો પોલીસ સ્ટેશન સુધી પહોચ્યો છે. મેસેજ વાયરલ થતા ભૂષણ ભટ્ટે બદનામ કરનાર તત્વો વિરુધ્ધમાં ખાડીયા પોલીસ સ્ટેશનમાં લેખીતમાં અરજી કરી છે.
પૂર્વ ધારાસભ્યએ ખાડિયા પોલીસ સ્ટેશનમાં મેસેજ વાઇરલ કરનારા લોકો સામે ફરિયાદ કરી
પોલીસે આ મામલે ભૂષણ ભટ્ટની અરજીના આધારે તપાસ શરુ કરી છે
આ વાઇરલ મેસેજ મુજબ ભૂષણ ભટ્ટ એસવીપી હોસ્પિટલમાં કોરોના પેશન્ટની ખબર કાઢવા માટે ગયા હતા. જોકે ડોક્ટરે તેમને મળવા જવાની ના પાડી દેતા દારુના નશમાં ધૂત ભૂષણ ભટ્ટે મહિલા ડોક્ટર સાથે અડપલા કર્યા હતા જેમાં ડોક્ટરે તેમને તમાચો મારી દીધો હતો.
આ મામલે હોબાળો થતા ભૂષણ ભટ્ટે મહિલા ડોક્ટરની માફી માંગી લીધી હતી અને ગાડીમાં બેસતાની સાથે હું નહી છોડી તેવું ડોક્ટરને બોલ્યા હતા. આ મેસેજ ભૂષણ ભટ્ટને વોટ્સએપ પર મળતા તેમણે ખાડીયા પોલીસ સ્ટેશનમાં વિગતવાર અરજી કરી છે.
ભૂષણ ભટ્ટે અરજીમાં ઉલ્લેખ કર્યો છે કે તે એસવીપી હોસ્પિટલમાં ગયા જ નથી. તેમને ખબર છે કે હોસ્પિટલમાં કોરોના પેશન્ટને મળવા દેતા નથી. અરજીમાં તેમને ઉમેર્યુ છે કે જો આ મામલે હું દોષી હોઉં તો મારી સામે યોગ્ય કાર્યવાહી કરવી વિનંતિ છે. પોલીસે આ મામલે ભૂષણ ભટ્ટની અરજીના આધારે તપાસ શરુ કરી છે. ભૂષણ ભટ્ટને બદનામ કરવા માટે કોઇએ જાણી જોઇને કાવતરુ કર્યુ હોવાની શંકા છે.