Gujarat Elections 2022 / 'આ મારી છેલ્લી ટર્મ છે', ભાજપના દિગ્ગજ નેતાએ વિધાનસભાની ચૂંટણી નહીં લડવાની કરી જાહેરાત

• ગુજરાત વિધાનસભાની ચૂંટણી પહેલા મોટી જાહેરાત 
• સયાજીગંજના ધારાસભ્ય જીતુ સુખડીયાની ફરી જાહેરાત
• આ મારી છેલ્લી ટર્મ છે, હવે હું ચૂંટણી નથી લડવાનો: જીતુ સુખડીયા

ગુજરાત વિધાનસભાની ચૂંટણીની જાહેરાત અગાઉ જ ટિકિટ માટે દાવેદારીનો રાફડો ફાટ્યો છે. એ પછી ભાજપ હોય, કોંગ્રેસ કે પછી આપ. તમામ પક્ષોના રાજકીય નેતાઓ પોતાને ટિકિટ મળે તે માટે જોર લગાવી રહ્યા છે. શિસ્તબધ્ધ ગણાતી ભાજપ પાર્ટીમાં પણ ટિકિટ પેરવી માટે નેતાઓ અત્યારથી જ લોબિંગ કરી રહ્યા છે. આ વચ્ચે વડોદરા સયાજીગંજના ધારાસભ્ય જીતુ સુખડિયાએ ગુજરાત વિધાનસભાની ચૂંટણી પહેલા ફરી મોટી જાહેરાત કરી છે.

સયાજીગંજના ધારાસભ્ય જીતુ સુખડીયાની ફરી જાહેરાત
વડોદરા મહાનગરપાલિકા દ્વારા અંદાજે 8.14 કરોડના ખર્ચે બનાવવામાં આવનારા રસ્તાના ખાતમુહૂર્તનો કાર્યક્રમ યોજાયો હતો. જેમાં ગુજરાત સરકારના માર્ગ અને મકાન મંત્રી જગદીશ પંચાલ સહિતના નેતાઓ હાજાર રહ્યા હતા. આ તકે સંયાજીગંજના ભાજપના ધારાસભ્યએ ચૂંટણી લડવા અંગે મહત્વની જાહેરાત કરી હતી.

આ મારી છેલ્લી ટર્મ છે, હવે હું ચૂંટણી નથી લડવાનો: જીતુ સુખડીયા
ધારાસભ્ય જીતુ સુખડિયાએ મંચ પરથી જણાવ્યું હતું કે, 'આ મારી છેલ્લી ટર્મ છે, હવે હું ચૂંટણી નથી લડવાનો. ગોત્રી હોસ્પિટલ પણ આપડે લાવ્યા, મેડિકલ કોલેજ પણ લાવ્યા. 80 કરતા વધારે વિસ્તારોમાં આરસીસીના રોડ બનાવ્યા. ગરીબ વિસ્તારોમાં પણ રોડ બનાવ્યા છે.' 2022ની ચૂંટણી નહીં લડવાની જાહેરાત કરનારા જીતુ સુખડિયા ભાજપના પ્રથમ ધારાસભ્ય બન્યા છે.  હવે અન્ય સિનિયર ધારાસભ્યના નિર્ણય પર સૌની નજર રહેશે. 

આ પહેલા પણ કરી હતી જાહેરાત 
આપને જણાવી દઈએ કે, આ  પહેલા પણ તેઓ ચૂંટણી ન લડવાની જાહેરાત કરી ચૂક્યા છે. આ પહેલા  ગોત્રી હોસ્પિટલમાં એક કાર્યક્રમ દરમિયાન ધારાસભ્ય જીતુ સુખડિયાએ જણાવ્યું હતું કે,  'આ મારી છેલ્લી ટર્મ છે. ગત ચૂંટણી વખતે જ મેં જાહેર કર્યું હતું કે હું નહીં ચૂંટણી લડું. પક્ષ જેને ટિકિટ આપશે તેને જિતાડવા હું કામે લાગીશ.'

જીતુ સુખડીયાએ મળ્યો હતો શ્રેષ્ઠ ધારાસભ્યનો એવોર્ડ
અત્રે ઉલ્લેખનીય છે કે, ગત 23 સપ્ટેમ્બરના રોજ ગુજરાત વિધાનસભામાં વડોદરા સયાજીગંજના ધારાસભ્ય જીતુ સુખડિયાને શ્રેષ્ઠ ધારાસભ્યનો એવોર્ડ આપવામાં આવ્યો હતો. વિધાનસભાના અધ્યક્ષ ડો નીમાબેન આચાર્ય, મુખ્યપ્રધાન ભૂપેન્દ્ર પટેલ સહિતના મહાનુભાવોના હસ્તે તેમને આ એવોર્ડ આપવામાં આવ્યો હતો.