ભાજપ દ્વારા દેશભરમાં સભ્યો બનાવાવનું અભિયાન ચાલી રહ્યું છે ત્યારે એક બાદ એક મોટા મોટા કલાકારો હવે ભાજપનો ખેસ ધારણ કરી રહ્યા છે. જાણીતી લોક ગાયિકા અને ચાર ચાર બંગડી ફેમ કિંજલ દવે ભાજપમાં જોડાયા છે. ભાજપ પ્રદેશ પ્રમુખ જીતુ વાઘાણીના હસ્તે કિંજલ દવે ખેસ ધારણ કર્યો. ત્યાર બાદ જાણીતી ગાયિકા ઐશ્વર્યા મજમુદાર અને અરવિંદ વેગડા પણ ભાજપમાં જોડાઇ ગયા છે.
દેશના સારા ભવિષ્ય માટે ભાજપમાં જોડાઈશ
ઐશ્વર્યા મજમુદારએ જણાવ્યું કે જો દેશના સારા ભવિષ્ય માટે ભાજપમાં જોડાઈ રહી છું. જે રીતે દેશમાં વિકાસ થઈ રહ્યો છે તે ભાજપની સાથે રહીને જ લાવી શકીશું. તો ભાઇ ભાઇ ફેમ અરવિંદ વેગડાએ ભાજપમાં જોડાઇ ગયા છે. નોંધનીય છે કે, અરવિંગ વેગડા ભાઇ-ભાઇ ગીતથી ખુબ જ જાણીતા બનેલા છે, તથા STAR Voice of India ફેમઐશ્વર્યા મજમુદાર પણ જાણીતી ગુજરાતી ગાયિકા છે. તેણે પણ ભાજપ સાથે જોડાવાનો નિર્ણય કર્યો છે.
ટિકિટની લાલસા સાથે ભાજપમાં નથી જોડાઈ : કિંજલ દવે
ગુજરાતની લોકગાયિકા કિંજલ દવે ભાજપમાં જોડાઈ છે. ત્યારે કિંજલે મીડિયા સાથે વાત કરતાં જણાવ્યું કે ભાજપથી પ્રભાવિત થઈ છું અને ભાજપ જે રીતે કામ કરે છે તે મને ગમે છે. હું ભાજપની એક પ્રાથમિક સભ્ય છું. મારાથી બનતી તમામ મદદ ભાજપને કરીશ. ટિકિટની લાલસા સાથે ભાજપમાં નથી જોડાઈ કે, સેલિબ્રિટી તરીકે રાજકારણમાં આવવા માટે નથી જોડાઈ.
અરવિંદ વેગડાની VTV સાથે ખાસ વાતચીત
અરવિંદ વેગડાએ VTV સાથે ખાસ વાત કરી હતી. જેમાં તેમને જણાવ્યું કે, હું 2012થી ભાજપ સાથે જોડાયેલો છું અને હવે સદસ્યતા અભિયાનમાં જોડાવવા જઈ રહ્યો છું. સમાજ માટે કંઈક કરવા માગું છું. તેથી જ ભાજપ સાથે જોડાઈને કાર્ય કરવા માગુ છું. મને હંમેશા જે સત્ય લાગે છે તે જનતાને જણાવું છું. નોંધનીય છે કે અરવિંદ વેગડાના કંઠે ગવાયેલું ભલા મોરી રામા ગીત સમગ્ર ગુજરાત જ નહીં પરંતુ અન્ય રાષ્ટ્રો જ્યાં ગુજરાતીઓ વસવાટ કરી રહ્યા છે ત્યા અચુક સાંભળવા મળે છે.
અન્ય કલાકારો પણ આગામી સમયમાં કરી શકે છે કેસરિયા
રાજ્યમાં ગુજરાતી કલાકારોની ભાજપમાં જોડાવાની હોડ જામી છે. અરવિંદ વેગડા કિંજલ દવે અને ઐશ્વર્યા મજમુદાર બાદ અગામી દિવસોમાં ગીતા રબારી અને સૌરભ રાજ્યગુરુ ભાજપમાં એન્ટ્રી મારી શકે છે.
તાજેતરના દિવસોમાં જ ગીતા રબારીએ પ્રધાનમંત્રી મોદી અને મુખ્યમંત્રી સાથે મુલાકાત કરી હતી. તો પ્રધાનમંત્રી માટે એક સુંદર ગીત પણ ગાયું હતું. જો ગુજરાતી ગાયક કલાકારો ભાજપમાં જોડાય તો ભાજપને તેમની લોકપ્રિયતાનો ફાયદો થઈ શકે છે.