રાજનીતિ / 2017માં ભાજપને હંફાવનાર યુવા આંદોલનકારીઓની ત્રિપુટી કેવી રીતે છૂટી પડી, બદલાઈ ગયું ગુજરાતનું રાજકારણ

• ગુજરાતની ત્રિપુટી હાર્દિક, અલ્પેશ અને જીગ્નેશ
• ગત વિધાનસભાની ચૂંટણીમાં હતા ભાજપના વિરોધી
• આ વખતે ભાજપ ઉમેદવાર હાર્દિક વિરમગામથી લડી રહ્યા છે ચૂંટણી
• ભાજપે અલ્પેશને ગાંધીનગર દક્ષિણથી આપી છે ટિકિટ

વર્ષ 2017ની ગુજરાત વિધાનસભાની ચૂંટણીમાં હાર્દિક પટેલ, અલ્પેશ ઠાકોર અને જીગ્નેશ મેવાણીની ત્રિપુટી ભાજપના રથને થોડા અંશે રોકવામાં સફળ રહી હતી. હાર્દિક પટેલે પાટીદાર અનામત માટે મોટું આંદોલન ચલાવ્યું હતું અને તેનું નેતૃત્વ પણ કર્યું હતું. અલ્પેશ ઠાકોરે OBCને એકજુથ કરવાનું કામ કર્યું હતું અને જીગ્નેશ મેવાણીએ દલિતોને એક કરવાનું કામ કર્યું હતું. આ ત્રણેય યુવા નેતાઓની સક્રિયતા અને આંદોલનનું પરિણામ એ આવ્યું કે ભાજપના ઘણા ધારાસભ્યો ચૂંટણી હારી ગયા. 2017માં જે હાલત થઈ તે જોયા બાદ ભાજપે જે ઓપરેશન ચલાવ્યું તેમાં તે સફળ રહ્યું છે. 2017માં ભાજપ વિરોધી ત્રણેય નેતાઓમાંથી બે નેતાઓ આ વખતે ભાજપની ટિકિટ પર જ ચૂંટણી લડી રહ્યા છે. ભારતીય જનતા પાર્ટીએ એકને વિરમગામથી તો એકને ગાંધીનગર દક્ષિણથી ચૂંટણીના મેદાનમાં ઉતાર્યા છે.  

ભાજપને હંફાવનાર યુવા નેતા બની ગયા 'ભાજપ પ્રેમી'
પાંચ વર્ષ બાદ હવે પરિસ્થિતિ બદલાઈ ગઈ છે. હાર્દિક પટેલ અને અલ્પેશ ઠાકોર ભાજપના ઉમેદવાર તરીકે ગુજરાતની જનતા પાસે મત માંગી રહ્યા છે, જ્યારે ગત વખતે અપક્ષ ચૂંટણીના મેદાનમાં ઉતરનાર જીગ્નેશ મેવાણી આ વખતે કોંગ્રેસની ટિકિટ પર વડગામથી ચૂંટણી લડશે. 

હાર્દિક પટેલ

29 વર્ષીય હાર્દિક પટેલે પાટીદાર સમાજના નેતા તરીકે સાર્વજનિક જીવનમાં પ્રવેશ કર્યો. વર્ષ 2017ની ચૂંટણી પહેલા જ હાર્દિક પટેલ ગુજરાતના એક મોટા નેતા બની ગયા હતા, તેઓ વિધાનસભાની ચૂંટણી બાદ વર્ષ 2019માં કોંગ્રેસમાં જોડાયા હતા અને ત્યાર બાદ ગુજરાતના કાર્યકારી અધ્યક્ષ પણ બન્યા હતા. પરંતુ આ ચૂંટણીમાં હાર્દિક પટેલ તેમના વતન વિરમગામથી ભાજપના ઉમેદવાર છે. 

અલ્પેશ ઠાકોર

પાંચ વર્ષ પહેલા એટલે કે વર્ષ  2017ની વિધાનસભા ચૂંટણીમાં અલ્પેશ ઠાકોર કોંગ્રેસના ઉમેદવાર હતા. તે સમયે ચૂંટણી પ્રચાર દરમિયાન તેમણે એમ કહીને એક વિવાદ સર્જ્યો હતો કે PM મોદી તેમનો 'ગોરો રંગ' જાળવવા માટે દરરોજ 4 લાખ રૂપિયાના મશરૂમ્સનું સેવન કરે છે, પરંતુ તે નિવેદનથી અલ્પેશ ઠાકોરની રાજકીય કારકિર્દી સંપૂર્ણપણે બદલાઈ ગઈ. 2022ની ગુજરાત ચૂંટણીમાં તેઓ ગાંધીનગર દક્ષિણથી ભાજપના ઉમેદવાર તરીકે મેદાનમાં છે.

જીગ્નેશ મેવાણી

ગુજરાતની યુવા ત્રિપુટીમાંથી જીગ્નેશ મેવાણી એકમાત્ર નેતા છે, જેઓ હજુ પણ ભાજપની સામે અડગ છે. 41 વર્ષીય જીગ્નેશ મેવાણીએ જુલાઈ 2016માં ઉનામાં થયેલા અત્યાચારના જવાબમાં દલિત સમુદાય દ્વારા રાજ્યવ્યાપી વિરોધનું નેતૃત્વ કર્યું હતું. આ આંદોલન પછી જ જીગ્નેશ મેવાણી દેશમાં ઓળખાવા લાગ્યા. ગત વિધાનસભાની ચૂંટણીમાં મેવાણીએ કોંગ્રેસના સમર્થનથી અપક્ષ ઉમેદવાર તરીકે વડગામ બેઠક જીતી હતી. પરંતુ આ ચૂંટણીમાં જીગ્નેશ મેવાણી વડગામથી કોંગ્રેસના સત્તાવાર ઉમેદવાર છે.