ભાજપ ખુલ્લેઆમ ગરબા રમે છે. પણ ગરબા આયોજકોએ વિનંતીઓ કરવી પડે છે. આ અમે નથી કહેતા પણ સોશિયલ મીડિયામાં હાલ રાજકોટમાં ભાજપના ગરબા ચર્ચામાં છે એટલે આવી વાતો ચાલી રહી છે.
સોશ્યલ મીડિયામાં ઉડી રહી છે મજાક
નાચો નહીંતર સાસુના સમ : વીડિયો વાયરલ
ભાજપ પ્રદેશ પ્રમુખનો સૌરાષ્ટ્ર પ્રવાસ રહ્યો વિવાદમાં
ગુજરાતમાં હાલ ગરબા મામલે ઘમાસાણ ચાલી રહ્યું છે. ગુજરાતમાં ગરબા આયોજકો પોતાનો વિનંતીપત્ર લઈને ગાંધીનગર પહોંચ્યા છે ત્યારે ભાજપના ગરબા પણ ચર્ચામાં આવ્યા છે. ભાજપ પ્રદેશ પ્રમુખ C R પાટીલનો સૌરાષ્ટ્ર પ્રવાસની ભારે ટીકા થઈ રહી છે કારણ કે કોરોના કાળમાં ભારે ભીડ ભરેલી રેલી અને તેમાં ખુલ્લેઆમ ગરબા રમાયા તે સૌની આંખે ઉડીને વળગ્યાં હતાં.
સોશ્યલ મીડિયામાં ઉડી રહી છે મજાક
આવામાં હવે જ્યારે નવરાત્રિ નજીક આવી રહી છે અને ત્યારે ફરી એક વખત આયોજકોએ ગાંધીનગર તરફ પરવાનગી માટે દોટ મૂકવી પડી છે. ત્યારે સોશ્યલ મીડિયામાં એવા મેસેજ ફરતા થયા છે કે કે જો આયોજકોએ ગરબાની પરવાનગી લેવી હોય તો ભાજપના ગરબાનો વીડિયો સાથે લઈ જવો અને બતાવવો.
ઉલ્લેખનીય છે કે ગરબાની પરવાનગી માટે થોડાં દિવસો પહેલાં આયોજકોએ ગરબાનું આયોજન કરવા સરકારને વિનંતી કરી હતી પરંતુ તેમને નિરાશા સાંપડી હતી. સરકારે તે સમયે કહ્યું હતું કે હાલ તો ગરબાનું આયોજન શક્ય જ નથી. આગામી સમયમાં પરિસ્થિતિ પ્રમાણે પરવાનગી આપવી કે નહીં તે જોવામાં આવશે. જો કે હવે જ્યારે સરકાર ખુદ દાવા કરી રહી છે કે કોરોના પરિસ્થિતિ નિયંત્રણમાં છે અને ધીરે ધીરે બજાર અને સેવાઓ શરૂ કરાઈ રહી છે ત્યારે ગરબા આયોજકોને પણ એક આશા જાગી છે. સોશ્યલ મીડિયામાં તો એવી પણ મજાક ઉડી રહી છે કે ભાજપના ગરબા જોઈને હવે આયોજકોને પણ લાગી રહ્યું છે કે ગરબાના આયોજનની પરમિશન મળી જશે.
નાચો નહીંતર સાસુના સમ : વીડિયો વાયરલ
ભાજપ પ્રદેશ પ્રમુખ પાટીલના સૌરાષ્ટ્ર પ્રવાસ દરમ્યાન જૂનાગઢમાં શક્તિ પ્રદર્શન કરતી વખતે ભાજપે રસ્તા પર ખુલ્લેઆમ ગરબા ગવડાવ્યા હતાં. તે દરમ્યાન કાર્યકર્તાઓને ગરબા ગાવા માટે સાસુના સમ પણ આપવામાં આવ્યાં હતાં તેવો વીડિયો વાયરલ થયો હતો.
ભાજપ પ્રદેશ પ્રમુખનો સૌરાષ્ટ્ર પ્રવાસ રહ્યો વિવાદમાં
ગુજરાત પ્રદેશ ભાજપા અધ્યક્ષ સી. આર. પાટીલ સૌરાષ્ટ્રની મુલાકાતે હતા. સૌરાષ્ટ્રમાં તેમણે ગીર સોમનાથ, જૂનાગઢ, રાજકોટ જિલ્લા તેમજ રાજકોટ શહેર અને સુરેન્દ્રનગર જિલ્લાની મુલાકાત લીધી હતી. આ મુલાકાતમાં સોશિયલ ડિસ્ટન્સિંગથી લઈને માસ્ક સુધીના તમામ કાયદા તોડતા વીડિયો હાલ સોશિયલ મીડિયામાં ધૂમ મચાવી રહ્યા છે.
ઉલ્લેખનીય છે કે, કોરોના કાળામાં સામાન્ય વ્યક્તિ જો કામ વગર બહાર નિકળે તો તેનો મોર બોલી જતો હતો. જો 4 વ્યક્તિથી વધારે એકી સાથે એકઠા થાય તો પોલીસ અગાસી પરથી પણ શોધીને તેમની સામે ફરિયાદ કરતી હતી. કોઈ સામાન્ય વ્યક્તિ અત્યારે પણ માસ્ક પહેર્યા વગર નિકળે તો તેની પાસેથી 1 હજાર રૂપિયા જેટલો દંડ વસૂલે છે. ઘણા કિસ્સામાં તો ઓફિસ કે રેસ્ટોરંટની અંદરથી પકડીને પણ દંડ વસૂલ્યા છે. પરંતુ આ બધા નિયમ તો સામાન્ય માણસો માટે છે.