વડોદરામાં ચેક બાઉન્સ કેસમાં ભાજપના કાઉન્સિલર કલ્પેશ પટેલને એક વર્ષની સજા ફટકારવામાં આવી છે. રુપિયા 25 લાખનો એક ચેક બાઉન્સ થતા કાઉન્સિલરને કોર્ટ ચુકાદો સંભળાવ્યો હતો. તો આ મામલે કલ્પેશ પટેલે જણાવ્યું કે કોર્ટના હુકમનું સન્માન કરુ અને આ અંગે આગળ અપીલ કરીશ તેમ જણાવ્યું હતું.
મને કલંકિત કરવાનું કૃત્ય છે-કલ્પેશ પટેલ
તો આ મામલે ભાજપના કાઉન્સિલર કલ્પેશ પટેલે જણાવ્યુ કે મને કલંકિત કરવાનું કૃત્ય છે. જે રકમ છે તેના કરતા પણ 10 ઘણી મારી પ્રોપર્ટી છે, મે આગળ અપીલ કરવાની તૈયારી કરી છે. મને વિશ્વાસ છે કે જજમેન્ટ મારી ફેવરમાં જ આવવાનું છે.
નાણાં 60 દિવસમાં ચૂકવવા હુકમ
આ મામલે આજે કોર્ટે ભાજપ કોર્પોરેટર કલ્પેશ પટેલ ઉર્ફે જય રણછોડને ગુનેગાર ઠેરાવી એક વર્ષની કેદની સજા અને ચેકની 25 લાખની રકમ 60 દિવસમાં ઉપેન્દ્ર શાહને ચૂકવી દેવા આદેશ કર્યો છે.
પ્રોજેક્ટમાં નફો આપવાની પણ ખાતરી આપી હતી
ફરિયાદમાં જણાવ્યા મુજબ ફરિયાદી ઉપેન્દ્રભાઇના સગા મારફતે કલ્પેશ પટેલની ઓળખાણ થઇ હતી.ત્યારબાદ નટવરલાલ શાહ મારફતે આરોપીએ 25 લાખની માગ કરી હતી અને પ્રોજેક્ટ પુરો થતા જ નાણા પરત કરવાની અને પ્રોજેક્ટમાં નફો થાય તેમાંથી પણ ભાગ આપવાની ખાતરી આપી હતી.
2016માં લીધા હતા રુ.25 લાખ
વડોદરા ભાજપના કાઉન્સિલર કલ્પેશ પટેલને વર્ષ 2016માં ઉપેન્દ્ર શાહે રુપિયા 25 વાખ આપ્યા હતા. વડોદરાના સમા-સાવલી રોડ પર આવેલ ભાવના પાર્ક સોસાયટીમાં રહેતા ઉપેન્દ્ર શાહ પાસેથી રુપિયા લીધઆ હતા. કન્સ્ટ્રક્શન સાઈટ માટે રુપિયાની જરુર હોવાથી તેઓએ 25 લાખ લીધા હતા પરંતુ પ્રોજેક્ટ પુરો થયા બાદ પણ પૈસા પાછા ન આપ્યા. કલ્પેશ પટેલે 25 લાખનો ચેક ઉપેન્દ્ર શાહને આપ્યો હતો. જે ચેક બેંકમાં જમા કરાવતા બાઉન્સ થયો હતો. જેથી ઉપેન્દ્ર શાહે કલ્પેશ પટેલ સામે વડોદરા કોર્ટમાં ફરિયાદ દાખલ કરાવી હતી અને કોર્ટે કલ્પેશ પટેલને એક વર્ષની સજા ફટકારી.