અમદાવાદ / 'કચરા' જેવી કચરાપેટી! AMCએ એવી ડસ્ટબીન પકડાવી દીધી કે ઘરે પહોંચતા જ તૂટી ગઇ, લોકોએ કૌભાંડના કર્યા આક્ષેપ

• અમદાવાદ મહાપાલિકા વિવાદમાં 
• હલકી ગુણવત્તાના ડસ્ટબીન હોવાની BJP કોર્પોરેટરની ફરિયાદ
• 12 કરોડના ખર્ચે ડસ્ટબીન ખરીદવામાં આવ્યા હતા

ભીનો કચરો અને સુકો કચરો અલગ તારવવા માટે સરકાર દ્વારા જોર શોરથી કહેવામાં આવે છે.  લાખો રુપિયા ખર્ચીને જાહેરાતો કરવામાં આવે છે. લીલો કચરો લીલા ડસ્ટબિનમાં અને સૂકો કચરો વાદળી ડસ્ટબિનનામાં નાંખવાનું  કહેવામાં આવે છે. આ માટે એએમસી  દ્વારા ઘરે ઘરે ડસ્ટબિનનું વિતરણ પણ કરવામાં આવ્યું છે. પરંતુ કહેવાય છેને ગાજે તે વરસે નહી.   મોટા ઉપાડે શરુ થયેલુ આ સરાહનીય કામ આખરે ભ્રષ્ટાચાર પર આવીને અટક્યુ હોય તેમ લાગી રહ્યું છે. મ્યુનિસિપલ કોર્પોરેશન દ્વારા જે ડસ્ટબિન આપવામાં આવે છે હલકી ગુણવત્તાના હોવાની ફરિયાદો ઉઠી છે. ત્યારે ફરી એકવાર અમદાવાદ મ્યુનિસિપલ કોર્પોરેશન ડસ્ટબિનને લઇને વિવાદમાં આવ્યું છે. 

કચરા જેવી કચરા પેટી !

વાત જાણે એમ છે કે ઘાટલોડિયાના મહિલા કોર્પોરેટરને લોકોની અનેક ફરિયાદો મળી કે કોર્પોરેશન દ્વારા વિતરણ કરવામાં આવતા ડસ્ટબિન હલકી ગુણવત્તાના છે. આ મામલે  ભાજપના કોર્પોરેટર દ્વારા જ અમદાવાદ મનપાને આ અંગે ફરિયાદ કરવામાં આવી. ભાજપના કોર્પોરેટરે આ ફરિયાદ સેન્ટ્રલ વર્કશોપના ડાયરેક્ટર વિજય મિસ્ત્રીને કરી. જો કે તેઓએ આ વાત માની નહી ડસ્ટબિન સારા જ હોવાનું રટણ કરે રાખ્યુ હતું.

હલકી ગુણવત્તાના ડસ્ટબિનથી પ્રજા રોષે

વીટીવી ન્યૂઝ દ્વારા અહેવાલ પ્રસારિત કર્યા બાદ લોકોનો પણ રોષ ફાટી નીકળ્યો હતો. લોકો વોર્ડમાં જઇને હલકીગુણવત્તાના ડસ્ટબિન હોવાની ફરિયાદ કરવા પહોંચ્યા હતા. લોકોનું કહેવુ છે કે આજે સવારે જ અમને ડસ્ટબિન આપી ગયા પરંતુ ડસ્ટબિનના ઢાંકણા પણ બંધ થતા નથી. અમુક તો ડસ્ટબિન પહેલેથી  જ તૂટી ગયેલા છે.  લોકો ઘાટલોડિયા વોર્ડ ખાતે ડસ્ટબીન બદલાવવા માટે પહોંચ્યા હતા. ડસ્ટબીન બદલાવવા આવેલા લોકોએ નિવેદન આપ્યું હતું કે અમને આપવામાં આવેલા ડસ્ટબીન ખોલતાની સાથે જ ઢાંકણા તૂટ્યા હતા. તેથી અમે આ ડસ્ટબીનને પરત બદલવા માટે લાવ્યા છીએ.

શું ફરીથી ડસ્ટબિન કૌભાંડ ?

કોર્પોરેટરની ફરિયાદ બાદ સેન્ટ્રલ વર્કશોપના કામ પર સવાલો ઉઠ્યા છે કે જ ડસ્ટબિનની ખરીદી કરવા માટે 12 કરોડનો ખર્ચ કરવામાં આવ્યો તેમ છતાં હલકી ગુણવત્તા કેમ ?  સપ્લાયર દ્વારા હલકી ગુણવત્તાના ડસ્ટબિન પધરાવી દેવામાં આવ્યા અને કોઇનું ધ્યાન જ ન ગયુ ?   સમયસર વેરો ભરનાર પ્રજાને સુવિધાના નામે હાલાકી કેમ ?  સમગ્ર ઘટનાને પગલે અમદાવાદ મ્યુનિસિપલ કોર્પોરેશનમાં ફરી એકવાર ડસ્ટબિન કૌભાંડની ગંધ આવી રહી છે ત્યારે આગામી સમયમાં આ મામલે કોઇ કાર્યવાહી કરવામાં આવે છે કે કેમ તે જોવુ રહ્યું .

સળગતા સવાલો

• અમદાવાદ મનપામાં કેમ થઇ રહ્યા છે કૌભાંડો?
• ડસ્ટબીનના નામે કઇ રીતે કરાયું કૌભાંડ?
• હલકી ગુણવત્તાની ડસ્ટબીન શા માટે ખરીદાઇ?
• હલકી ગુણવત્તાની ડસ્ટબીનથી કોને થયો ફાયદો?
• હલકી ગુણવત્તાની ડસ્ટબીન ખરીદનારા અધિકારી સામે કરાશે કાર્યવાહી?
• અધિકારીઓ કેમ વારંવાર કરે છે હલકી ગુણવત્તાની ચીજ વસ્તુઓની ખરીદી?
• અધિકારીના માથે કોનો હાથ છે?
• શા માટે અધિકારીઓ ભ્રષ્ટાચારમાં લિપ્ત રહે છે?