ગુજરાતમાં જામ્યો જંગ / આ બેઠકો પર ભાજપ અને કોંગ્રેસમાં ફસાયો પેચ: નેતાઓના રિસામણાં-મનામણાં, જૂના જોગીએ ગેહલોત સાથે કરી મીટિંગ

• ગુજરાતમાં બરાબરનો ચૂંટણીનો માહોલ જામ્યો
• અમુક બેઠકો પર હજુ પર ઉમેદવારોના નામો પર મંથન
• મહેસાણામાં ભાજપ-કોંગ્રેસ-AAP ત્રણેય પાર્ટીનું કોકડું ગૂંચવાયું
• રાજકોટ પશ્ચિમ બેઠક પર કોંગ્રેસમાં ટિકિટને લઇ કકળાટ

ગુજરાતમાં વિધાનસભા ચૂંટણીમાં હવે માત્ર ગણતરીના દિવસ જ બાકી રહ્યા છે ત્યારે તમામ રાજકીય પાર્ટીઓ દ્વારા ધડાધડ ઉમેદવાર જાહેર કરવામાં આવી રહ્યા છે. ભારતીય જનતા પાર્ટીએ 166 ઉમેદવાર જાહેર કરી દીધા છે. આ તરફ કોંગ્રેસે 105 બેઠક પર ઉમેદવારો જાહેર કર્યા છે. તો વળી આમ આદમી પાર્ટીએ પણ 179 બેઠક પર ઉમેદવારો જાહેર કર્યા છે. જોકે, હજુ પણ અમુક બેઠકો પર ભાજપ, આપ અને કોંગ્રેસનું કોકડું ગૂંચવાયેલું છે.

મહેસાણા જિલ્લામાં ત્રણેય પાર્ટીનું કોકડું ગૂંચવાયું
મહેસાણામાં ભાજપ-કોંગ્રેસ-AAP ત્રણેય પાર્ટીનું કોકડું ગૂંચવાયું છે. મહેસાણાની 4 બેઠકો પર કોંગ્રેસના ઉમેદવારની જાહેરાત બાકી છે. જ્યારે મહેસાણા જિલ્લામાં ભાજપ 1,  AAPના 2 ઉમેદવાર જાહેર થવાના બાકી છે. આ અંગે વિગતવાર વાત કરીએ તો વિસનગર ઊંઝા, બહુચરાજી, મહેસાણા બેઠક ઉપર કોંગ્રેસે ઉમેદવાર જાહેર કર્યા નથી. વિસનગર અને ખેરાલુમાં હજુ AAPના ઉમેદવારની જાહેરાત બાકી છે. ભાજપમાં ખેરાલુ બેઠક ઉપર ઉમેદવારના નામ પર મંથન ચાલી રહ્યું છે. 

કોંગ્રેસે રાજકોટ પશ્વિમ બેઠકમાં હજુ ઉમેદવાર જાહેર નથી કર્યા 
રાજકોટ પશ્ચિમ બેઠક પર કોને ટિકિટ આપવી તેને લઈ હવે કોંગ્રેસમાં ભારે મનોમંથન સર્જાયું છે. મહત્વનું છે કે, ભાજપે વિજય રૂપાણીની સીટ રાજકોટ પશ્ચિમમાં ડો. દર્શીતા શાહને ઉતાર્યા છે. આ તરફ હજી સુધી કોંગ્રેસે પશ્વિમ બેઠકમાં કોઈ ઉમેદવાર જાહેર નહીં કરતાં મામલો પેચીદો બન્યો છે. વિગતો મુજબ કોંગ્રેસમાં મનસુખ કાલરીયા અને ગોપાલ અનડકટના નામોમાં પેચ ફસાયો છે. રાજકોટ પશ્ચિમ વિધાનસભા બેઠક પર પાટીદાર અને લોહાણા સમાજનું પ્રભુત્વ વધારે છે. ત્યારે પશ્ચિમ બેઠક પર કોંગ્રેસ લોહાણા કે કડવા પાટીદાર સમાજના  ઉમેદવારને ટિકિટ આપી શકે છે. 

છોટાઉદેપુરની આ બેઠકો પર ઉમેદવારના નામ જાહેર કરવાના બાકી
છોટાઉદેપુર જિલ્લામાં કોંગ્રેસના 2 ઉમેદવાર જાહેર કરવાના બાકી છે, જ્યારે ભાજપે પણ હજુ જિલ્લાની એક બેઠક પર ઉમેદવારનું નામ જાહેર કર્યું નથી.  જેતપુર પાવી અને છોટાઉદેપુર બેઠક પર કોંગ્રેસના ઉમેદવાર જાહેરાત બાકી છે.  જેતપુર પાવી બેઠક પર ભાજપ દ્વારા હજુ ઉમેદવાર જાહેર કરવાના બાકી છે. 

સોમા પટેલ અને અશોક ગેહલોત વચ્ચે થઈ મુલાકાત 
આ વખતની વિધાનસભાની ચૂંટણીમાં ચોટીલા બેઠકનો ચૂંટણી જંગ રસપ્રદ બની રહેશે. અહીં ભાજપ, કૉંગ્રેસ, આપ અને અપક્ષ વચ્ચે ચતુષ્કોણીય જંગ જામવાની પૂરી શક્યતાઓ છે. ચોટીલા વિધાનસભા બેઠક પર ભાજપે પૂર્વ ધારાસભ્ય શામજી ચૌહાણને મેદાને ઉતાર્યા છે. તો કોંગ્રેસ વર્તમાન ધારાસભ્ય ઋત્વિક મકવાણાને રિપિટ કર્યા છે. આમ આદમી પાર્ટીએ અહીં રાજુ કરપડાને ટિકિટ આપી છે. પૂર્વ સાંસદ અને ધારાસભ્ય સોમાભાઈ પટેલને કોઈ પક્ષે ટિકિટ ન આપતા અપક્ષ તરીકેનું ફોર્મ ઉપાડ્યું છે. સોમાભાઈ પટેલે ચોટીલા બેઠક પરથી અપક્ષ ઉમેદવારી કરવાની જાહેરાત કરી છે. એવામાં ગતરોજ રાજસ્થાનના મુખ્યમંત્રી અશોક ગેહલોતે સોમાભાઈ પટેલ સાથે મુલાકાત કરી હતી. એવું કહેવાઈ રહ્યું છે કે, સોમાભાઈ પટેલ અને કોંગ્રેસ વચ્ચે વાટાઘાટો ચાલી રહી છે. આપને જણાવી દઈએ કે, સોમાભાઈ પટેલે કોંગ્રેસ છોડ્યા બાદ તેઓ ભાજપમાં જોડાયા નથી. 

ટિકિટ કપાતા મનહર પટેલ નારાજ
ગુજરાત કોગ્રેસે આગામી વિધાનસભાની ચૂંટણી માટે બોટાદ બેઠક પરથી રમેશ મેરને ટિકિટ આપી છે. બોટાદથી ટિકિટ કપાતા મનહર પટેલ નારાજ થયા છે. બોટાદ બેઠક પરથી ટિકિટ કપાયા બાદ તેઓએ ટ્વીટ કરીને નારાજગી વ્યક્ત કરી હતી. જેમાં તેઓએ લખ્યું હતું કે,'107-બોટાદ વિધાનસભાનો કોંગ્રેસ પક્ષનો હું સાચો ઉમેદવાર છું, કોંગ્રેસ પક્ષ મારા નામ પર ફેર વિચારણા કરે..મારા જેવા પક્ષને સમર્પિત આગેવાન સાથે પક્ષનો નિર્ણય સ્વાકાર્ય નથી, મારી સાથે 2017નું પુનરાવર્તન થયું…જે પક્ષના વિશાળ હિતમાં નથી.' 

નારાજ મનહર પટેલને મનાવવાના કોંગ્રેસના પ્રયાસ શરૂ
બોટાજમાં ડેમેજ કંન્ટ્રોલ કરવા પ્રદેશ કોગ્રેસના બે ઉપપ્રમુખોને સોંપાઇ જવાબદારી છે. પંકજ પટેલ અને ડૉક્ટર જીતુ પટેલને મનહર પટેલને સમજાવવાની જવાબદારી સોંપવામાં આવી છે. બંન્ને નેતાઓએ મનહર પટેલને સમજાવવાના પ્રયાસો શરૂ કર્યા છે. ટિકિટ કપાયા બાદ પાર્ટીથી નારાજ મનહર પટેલને મનાવવા પ્રદેશ કોંગ્રેસના ઉપપ્રમુખ પંકજ પટેલે પ્રયાસો હાથ ધર્યા છે. પંકજ પટેલ પોતાના પાર્ટી પ્લોટ પર મનહર પટેલને લઇને પહોંચ્યા હતા. જ્યાં મનહર પટેલની સાથે તેમના સમર્થકો પણ પાર્ટી પ્લોટમાં પહોંચ્યા હતા.