ડભાઈ બેઠકના ભાજપના ઉમેદવાર શૈલેષ મહેતાએ ભાયલી ગામે જાહેરસભામાં સ્ટેજ પરથી વિવાદિત નિવેદન આપ્યું હતું. તેમણે કહ્યું હતું કે, ચાર જંગલી કૂતરા સિંહને ઘેરી લે તો પણ શિકાર ન કરી શકે.
ભાજપના ઉમેદવાર શૈલેષ મહેતાનો વીડિયો થયો વાયરલ
BJP ઉમેદવાર શૈલેષ મહેતા વિરોધીઓ પર વરસ્યા
ચાર કૂતરા સિંહને ઘેરી લે તો પણ શિકાર ન કરી શકેઃ મહેતા
ગુજરાત વિધાનસભાની ચૂંટણીમાં બીજા તબક્કામાં મધ્ય ગુજરાત અને ઉત્તર ગુજરાતમાં મતદાન 5મી ડિસેમ્બરે થવાનું છે, ત્યારે મધ્ય ગુજરાત અને ઉત્તર ગુજરાતના ઉમેદવારો મતદારોને આકર્ષવા માટે તનતોડ મહેનત કરી રહ્યા છે. ચૂંટણીના ધમધમાટ વચ્ચે વડોદરાની ડભાઈ બેઠકના ભાજપના ઉમેદવાર શૈલેષ મહેતાએ વિરોધીઓને આડેહાથ લીધા હતા. તેઓએ જાહેરસભામાં સ્ટેજ પરથી વિવાદીત નિવેદન આપ્યું હતું. જેનો વીડિયો હાલ સોશિયલ મીડિયામાં વાયરલ થયો છે.
શૈલેષ સોટ્ટા કોઈથી ગભરતો નથી: શૈલેષ મહેતા
ડભોઈના વર્તમાન ધારાસભ્ય અને ભાજપના ઉમેદવાર શૈલેષ મહેતા (સોટ્ટા)ની વડોદરા પાસે ભાયલી ગામે જાહેરસભા યોજાઈ હતી. જેમાં તેઓએ વિરોધીઓ પર આકરા પ્રહાર કર્યા હતા. આ દરમિયાન તેઓએ જણાવ્યું હતું કે, જેને તકલીફ હતી તે ભાજપ છોડીને ચાલ્યા ગયા છે. ભાયલીના સરપંચને ટિકિટ ન મળતાં આપમાં ગયા અને હવે કોંગ્રેસના ટેન્ટમાં જઈને બેસે છે. ભાયલીમાં એમની એટલી બધી ઉપજ છે? હું જાહેરમાં કહું છું તેમને કે આપણે આપણી હેસિયતમાં રહેવું જોઈએ. તમને મોટા બનાવતા આવડે તો નીચે પાડતા પણ આવડે. શૈલેષ સોટ્ટા કોઈથી ગભરાયો નથી અને ગભરાવાનો નથી.
4 જંગલી કૂતરા સિંહનો ન કરી શકે શિકારઃ શૈલેષ મહેતા
શૈલેષ મહેતાએ વધુમા જણાવ્યું હતું કે, 'જંગલમાં કોઈ ચાર જંગલી કૂતરા સિંહને ઘરી લે પણ સિંહનો શિકાર કરી શકે? તમે અમને ઘેરવાનો પ્રયત્ન કરી શકો, અમારો શિકાર ન કરી શકો. તમે સાજીશ કરી શકશો પણ શિકાર તો નહીં જ કરી શકો.'